¹ Olwo Oyesu natwalibwa omwoyo mwirungu okwoyeerwa Osetaani. ² Niyamaare asiibire ebiro amakumi annai, emisana nobwire, enzala neryoka n'emuluma. ³ Omwoyeeri naiza namukoba ''n'obbanga oli mwana wa Kanca, kobba amabbaale gaindukemu emere. ⁴ Yeena nairamu namukoba aati, ''kyandiikibwe nti omuntu tiyabbenge mwomi nammere yonkai, okutolaku nabuli kigambo eki zwa omukamwa ka Kanca. ⁵ Olwo Osetaani n'amutwala omu kibuga ekikwera namuta okukituuti kya iramyo, ⁶ n'amukoba ati; ''nobbaanga oli mwana wa Kanca , guluka ogwe ansi; kubba kyandikiibwe aati; 'alikutumisirya abantumwa bamwe: omu mikono gyabwe bali kusagikira, oleme okwekoona okugulu kwamu oku ibbaale.''' ⁷ Yesu n'amukoba ati, ''erate kyawandikiibwe kiti, 'toyoyeeraanga omukama Kanca waamu. ⁸ Olwo, sitaani n'amutwala okulusozi olulai omuno, n'amulanga ensi zabakama boona boona abali omunsi, nekitinyisya kyazo. ⁹ n'amukoba ati, ebyo byona byona nabikuwa niwainama okundamya. ¹⁰ Olwo Oyesu n'amukoba ati, ''zwawo oyabe, Sitaani! Kubanga kyawandikiibwe kiti, ''Oramyanga Okanca waamu, era omuwerezenga yenkai. ¹¹ Olwo Setaani namutaisia bona abantumwa nibaiza okumuwereza. ¹² Awo niyawulire nka Oyokana bamuwayireyo, nayirayo e Ggaliraaya. ¹³ Nga maare okuzwa e Nazaleesi, naiza n'abba e'Kaperunawumu, ekiri oku nyanja ya Ggarilaaya, omunsi ya Zebbuloni n'Onafutaali. ¹⁴ Ekigambo kiikiire onabbi Isaaya ekye yasimoire n'akukoba ati, ¹⁵ Ensi ya Zebbuloni n'ensi ya Nafutaali Enzira ya nyanja, emitala wa Yoludaani, e Ggarilaaya ey'amawanga. ¹⁶ Abantu abaikaaraanga mumulikiirya nibabona eisana lingi. Nabandi abaali baikaara omunsi yakufa n'omukiituuru kyawo, eisana lyabakiire. ¹⁷ Oyesu niyekeera awo okukoba enjiri n'akoba ati; mwendeke emyoyo olwakubba abwabukama bwa mwigguru bali ampi okwika. ¹⁸ Niyaali nka’akutambuura ebuluba wa nyanja ya Ggaliraya, n'abona abaluganda babiri, Simooni gwe beeta Peetero, Ndereya omuganda wamwe, nka bakunaga emigoni omunyanja, olwakubba baali bategi. ¹⁹ N'abakoba ati, ''mwize, mwakale nanje, ndibaindulamu abategi babantu. ²⁰ Amangu ago nibaleka emigoni, nibaikaara amwei. ²¹ Natambulaku omumaiso, nabona aboluganda babiri abandi, Oyakobo omwana wa Zebidaayo, n'Oyokaana omugande nka bali mu bwato amwe n'oitaabwe ozebidaayo nka bakunaga emigoni zaabwe. N'abaata, ²² amangu ago nibaleka awo obwata noitaabwe nibakaara naye. ²³ . O Yesu nararanga omu maramyo gaabwe, era nka n'akutamba endwaire zona zona n'obunaki bwoona omubantu. ²⁴ Ebigambo byamwei nibiraranga omu Busuuli nibamuleetera bobo abaali abalwaire abaali abakulumwa endwaire ezanjawulo, n'obujune, n'emizumu, abasimbu, n'abaali abayondi, bona nibatambibwa. ²⁵ Ebibuura bingi, nka bakuzwa e Ggaliraya ne Dekapoli ne Yerusaelemu n'e Buyudaaya n'ebuluba wa Yoludaani nibaakara amwe.