¹ Ale oYesu niyaizwiire Omwooyo omwikiiri naira nka akuzwa omu Yoludaani,Omwooyo namutwaala omwirungu, ² namalayo ennaku amakumi anai,nka akoyerwa Ositaani.Erate tiyalyanga kintu omunnaku ezo; ale nizaweire,enzala nemuluma. ³ Ositaani namukoba ati obate nka oli mwaana wa Kanca,koba eibbale linu lifooke emmere. ⁴ OYesu namwiramu ati kyawandikiibwe kiti Omuntu tabbanga mwoomi na mmere yonkai. ⁵ Namuniinisya,namulanga obukama boona boona obwa mu nsi omu kaseera kadooli. ⁶ OSetaani namukoba ati nakuwa we obuyinza bunu boona boona,nekitinisya kyaabo;Olwakubba naweweibwe nje:erate ngabira buli gwenyendya. ⁷ Ale niwaramya omu maiso gange,bunu boona boona bwabba bwaamu. ⁸ oYesu nairamu namukoba ati kyawandikiibwe kiti oramyanga Omukama oKanca waamu,nigwo owerezanga yenkai. ⁹ Namutwaala e ayerusaalemi,namuta okukitikiro kya Iramyo,namukoba ati obate nka oli mwaana wa Kanca,ale wenage ansi; ¹⁰ Olwakubba kyawandikiibwe kiti Alikuweereza abantumwa baamwe bakukuumire kimwei; ¹¹ Erate kiti Balikuwaniira omu mikono jaabwe, Oleme Okwesitala okgulu kwaamu okwibbaale. ¹² OYesu nairamu namukoba ati kyasimoirwe kiti Toyoyeranga mukama oKanca waamu. ¹³ OSetaani niyamaare buli koyera namulekaku akaseera. ¹⁴ Ale oYesu naira e Ggaliraaya omu maani aga mwooyo:Okumanyika kwaamwe nikwaaba nka kusansaana omu nsi ezirirainewo. ¹⁵ Nayegesyanga omu makumbbaniro gaabwe boona boona nka bakumuyangiriza. ¹⁶ Naizza e Nazaalesi ji yakuliire;oku lunnaku lwa Ssabbiiti nayegesya omwikumbbaniro nka niyaali empisa yaamwe, Nayemeera okusoma. ¹⁷ Ni bamuwa ekitabo kya muranji oIsaaya,Naswekula ekitabo,nabona ekitundun awawandikiibwe nti ¹⁸ Omwooyo wa Mukama ali kunje, Olwakubba ansukireku amafuta okukobera abooro ebigambo ebisai:Antumire okulangiira abanyage okutaisibwa,N’okuzibula abaigali ba maisio,Nabanyigizibwa okutaisibwa, ¹⁹ Okulangiira omwaaka gwa Mukama ogwakwikirizibwamu. ²⁰ Naswekaku ekitabo,nakiriirya omuweereza naikala;abantu boona boona abaali omwikumbbaniro nibamusimbaku amaiso. ²¹ Natandika okubakoba ati olwa leero ebyawandiikibwa binu bikiriire omu matwi ganywe. ²² Boona boona ni bamwetegereza,nibewuunya olwa bigambo bya kisa ebizwiire omu kanwa kaamwe: nibakoba bati onu tiniye mwaana wa oYusufu? ²³ Nabakoba ati timulirema kunkoba lugeero lunu nti Omusawo, wewonie wenkai: byoona byoona bitwawuliire nka bikukolwa omu Kaperunawumu,bikoore naanu oku kyaalo kyaamu. ²⁴ Nakoba ati amazuma nkubako nti ndoowo Muranji aikirizibwa omu kyaalo kyaamwe. ²⁵ Baitu, amazuma nkubakoba nti walowo abanamwandu bainji omw’Isiraeri omu biro by’Eriya,eigguru niryaigaliirwe emyaaka eisatu ne myeezi omukaaga,enzala jinji niyagwiire oku nsi yoona yoona; ²⁷ Erate,waalowo abantu bainji abagenge omw’Isiraeri omu biro bya Erisa Omuranji: Ndoowo n’omwei okubo eyalongookere,wazia oNaamani yenkai Omusuuli. ²⁶ Eriya tiyatumiibwe edi omwei okwaabo,wazira e Zalefasi,omu nsi ya Sidoni,edi omukali onnamwandu. ²⁸ Nibaizula obuwandi boona boona abaali omw’Ikumbbaniro nibawuliirwe ebigambo ebyo; ²⁹ ni baimuka nibamusindikiirya enzai wa kibuga nibamutwaala okw’ibbanga lya lusozi lwe bayombokereku ekibuga kyaabwe bamunage ansi. ³⁰ baitu,Nabakalamu akati nayaba. ³¹ Naikiriira e Kaperunawumu,ekibuga kya Ggaliraaya: nabeegereswa oku lunnaku lwa ssabbiiti: ³² ni bawuninkiira olwa kwegesya kwaamwe,olwakubba ekigambo kyaamwe kyaalina obuyinza. ³³ Ale omwikumbbaniro mwaalumu omuntu eyaaluku odaimoni; nakunga neiraka erikooto ³⁴ ati woowe,okutujunaana ki we, Yesu omunazaalesi? Oizire anu kutuzikiirya? Nkumaite we nooli omwikikiiri wa Kanca. ³⁵ OYesu namuboigoora nka akukoba ati sirika, muzweeku.Odaimooni niyamunagire ansi namuzwaaku nka tamukoore kabbi. ³⁶ Okuwuninkiira nikubakwaata boona boona nibebuulyangana bonkai nabonkai nka bakukoba bati kigambo ki kinu? Olwakubba alagira nobuyinza namaani abadaimooni nibazwaaku. ³⁷ Okumanyika kwaamwe nikubuna omu buli kifo ekya nsi erirainewo. ³⁸ Naimuka nazwa omwikubbaniro naingira omu nnyumba ya Simooni. Ale onyubyaala wa Simooni yaali nka akwatiibwe omusujja gwinji,nibamwegayiira oku Lukka lwaamwe. ³⁹ Nayemeera waali . naboigoora omusujja; niguwona: ammangu ago naimuka nabaweereza. ⁴⁰ Ale eisana nilyaali likugwa, bona abaalina abalwaire abandwaire ezitaali zimwe nibabamuletera,buli omwe okwaabo namutaaku emikono zaamwe, nabatamba. ⁴¹ nabadaimooni nibabazwaaku bainji, nibakunga nka bakukoba bati we oli mwaana wa Kanca. Nababoigoora natabaikiriza kusimoola kigambo, olwakubba betejerya nka niye Kristo. ⁴² Ale obwiire nibwakyeire, nazwaayo nayaba omu kifo awataali bantu: Ebibbuura nibimuswaagana nibaiza waali,nibendya okumugaana okubazwaaku. ⁴³ Baitu,nabakoba ati kinsaniire okukoba enjiri ya Bukama bwa Kanca no mu bibuga ebindi; Olwakubba nikyo kyansidikisirye. ⁴⁴ Ale nakoba enjiri omu makumbbaniro aga mu Ggaliraaya.