¹ Ale olwaikire ebibbuura nibyamumigiriirye ni bawuura ekigambo kya Kanca, ye yaali ayemereire oku nnyanja Genesaleeti; ² nabona obwaato bubiri nka buli okunyanja: baitu abategi baali babuzwiremu nka bakunaabya ebitimba byaabwe. ³ Naniinaku eryaato rimwei eryaali erya Simooni; namukoba okulyegeryayo kadooli okuzwa okwitale. Naikala nayegesya ebibbuura omu bwaato. ⁴ Niyaali nka ammaare okusimoola nakoba oSimooni nti igeera ebuluba, munagge ebitimba byaanywe mutegge. ⁵ OSimooni nairamu nakoba nti omwaami twategere okukeesya obwiire ni tutakwatisye kintu: baitu olwa kigambo kyaamu nanangga ebitimba. ⁶ Ale nibakoore batyo, ni bakwaata encwii ziinji munno ebitimba byaabwe nibitaka okutiika. ⁷ Ni beeta abairaabwe omu bwaato obundi baize babajuneku. Ni baiza ni baizulya obwaato bukali bubiri, n’okwiika ni gataka okwiika. ⁸ Baitu, oSimooni oPeteero niyaboine nainama oku magulu ga Yesu nakoba ati Ondeke; olwakubba ndi muntu aliina ebibbi, Mukama wange. ⁹ Olwakubba, yawuninkiriire na boona boona abaali naye olwa ncwii eziinji zibakwatisirye, ¹⁰ no Yakobo no Yokana boona batyo abaana ba Zebeddayo abaali baikirize kimwi no Simooni. OYesu nakoba oSimoon ati otatiina: okwekeera ati oizza kuteganga bantu. ¹¹ Ale bawungwiire obwaato bwaabwe ebuluba, nibaleka byoona byoona ni baaba naye. ¹² Ale olwaikire niyaali omu kibuga ekimwei okwebyo, bona waalowo omuntu eyaali aizwiire abigenge, namwegaiira nka aku mukoba ati Mukama wange, notaka oyiinza okusaiirya. ¹³ Nagolola omukono gwamwei namukwataku nka akukoba ati nkutaka, longooka. Ammangu ago ebigenge byaamwe ni bimuwonaku. ¹⁴ ye namukalatira obutakoberaku muntu, baitu yaba werange edi oKabona oweeyo ebya kusaiirwa kwaamu nka oMusa ni yalagiire okubba obujuurwa ji bali. ¹⁵ Baitu ebigambo byamwei ni byeyongera kimwei okusansana, ebibbuura biinji ni bikumbaana okuwuura no kutambibwa endwaire zaabwe. ¹⁶ Baitu ye ni yeeyawula, nayaba omu marungu nasaba. ¹⁷ Ale olwaikire oku lunaku Olumwei okweezo, yaali akwegesya, n’Abafalisaayo nabegesya bamateeka baali baikaire awo, abaali bazwiire omu buli kibuga ekya Ggaliraaya no Buyudaaya no Yerusaalemi: namaani ga Mukama gaali naye okutamba. ¹⁸ Bona, abantu ni baletera omuntu oku kitabo eyaali asalaire: ni basala amagezi okumwingirya, ni bendya okumwica omu maiso gaamwei nibalemwa. ¹⁹ Nibataboine wa kumwingiirya olwa kibbuura, ni baniina aigguru oku nnyumba ni bamwakalya omu ma toffaali nibamwikiriirya ansi oku kitabo kyaamwei omu maiso ga Yesu. ²⁰ Ale niyaboine okwikiriza kwaabwe, oYesu nakoba ati omuntu, ebibbi byaamu bikutoleibweku. ²¹ Abawandiiki na Bafalisaayo nibatandika okuwakana nka bakukoba bati naani oni asimoola ebyakutyoboola? Naani ayiinza okutolaku ebibbi,wazira oKanca yenkai? ²² Baitu, oYesu niyetejerye okuwakana kwaabwe nairamu nabakoba ati mukuwakana ki omu myooyo jaanywe? ²³ Ekyangu kirai okukoba nti ebibbi byaamu bikutoleibweku; obate okukoba nti imukka otambule?. ²⁴ Baitu mweteje nka omwaana wa muntu aliina obuyinza oku nsi okwiyaku ebibbi, nakoba oyo ayaali asalaire, nkukukoba nti imukka oimule ekitabo kyaamu oireyo omu nnyumba yaamu. ²⁵ Ammangu ago naimukka omu maiso gaabwe, naimula ekyo ki yaali abbasiryeku, nayaba ewaamwei, nka okugulumirya oKanca. ²⁶ okuwuninkiira ni kubakwaata boona boona ni bagulumirya oKanca ni batiina munno nka bakukoba bati tuboine ebya maano olwa leero. ²⁷ Ale oluzwanyuma olwebyo, oYesu nazwaayo nabona omusorolya wa musolo eibara lyaamwe Leevi, nka aikaire omu kifo mwe basorolerya omusolo namukoba ati yakala nanje. ²⁸ Naleka byoona byoona naimukka nayakala naye. ²⁹ OLeevi namusumbira embaga ejikooto omu nnyumba yaamwei: erate waalowo ekibbuura kikooto ekya basoroli nekya bandi abaali baikaire nabo oku mmere. ³⁰ Abafalisaayo nabawandiiki baabwe ni bemulugunya olwa begereswa baamwe, nka bakukoba bati, ekibaliisya no kunyeera amwei na basoroli na bantu abaliina ebibbi ki? ³¹ OYesu nabairamu nabakoba ati aboomi tibataka mutabambi wazira abalwaire. ³² Nje tinaizire kweeta baikiriri wazira abantu abaliina ebibbi okuwendeka omwooyo. ³³ Nibamukoba bati abegereswa ba Yokaana basiibire emirundi zinji erate basabire; erate na Bafalisaayo batyo; baitu abaamu balya, banywa. ³⁴ oYesu nabakoba ati ale muyinza okusiibya abaana ba bugole, Lukka abandwire omugole nabba nka ali nabo? ³⁵ Baitu ennaku ziriiza; ale abandwire omugole nalibatolwaaku ni balyooka basiiba omu nnaku ezo. ³⁶ Erate, nabageera olugeero ati ndoowo muntu ayonola oku lugoye oluyaaka ekiraka nakitunga omu lugoye olukaire. Olwakubba nakola atyo, ekiyaaka kyonola olukaire; erate ne kiraka kyayonola oku luyaaka tikiisana nalukaire. ³⁷ Erate, ndoowo asukka mwenge ogukookya omusawo zabyanzo ezikaire; olwakubba omwenge ogukookya goonola ensawo zabyanzo, ni gususuka, nensawo zabyanzo zifafagana. ³⁸ Baitu kisanira omwenge oguyaaka okugusuka omu nsawo zabyanzo eziyaaka. ³⁹ Erate ndoowo muntu anywiire oku mwenge ogukuure ayendya ogutto; olwakubba akoba ati ogukulu nigwo gusai.