¹ Ekibuura kyoona kyoona nikiimuka nikimutwaala ewa Piraato. ² Nibasooka okumulopa nka bakukoba bati onu twamuboine nka akukyaamya eiyaanga lyaiswe, nka akubagaana okuweerya oKaisali omusolo, nka akusimoola ye omwenyenere okubba oKristo, Omukama. ³ OPiraato namubuulya nka akukoba ati Niiwe Mukama wa Bayudaaya, Namwiramu namukoba ati osimoire. ⁴ OPiraato nakoba abakabona abakulu ne bibbuura ati Tinkubona nsonga yoona yoona oku muntu onu. ⁵ Baitu bo nibeyongera okukoba bati akusasamalya abantu, nka akwegesya omu Buyudaaya bwoona bwoona, yasokeire Ggaliraaya okwiika naani. ⁶ OPiraato niyawuliire, nabuulya obate nka omuntu oyo mu Ggaliraaya. ⁷ Niyategeire nka wamu bicweeke bya Kerode namuweereza ewa Kerode, olwakubba yeena yaali mu yerusaalemi omu biro ebyo. ⁸ Ale oKerode niyaboine oYesu nasemeera, olwakubba okuzwa eirai yatakanga oku mubonaku, olwakubba yawuliire ebigambo byaamwe; nasuubira okubona nka akukola akabonesyo. ⁹ Namubuulya ebigambo biinji, baitu ye natamwiramu kigambo. ¹⁰ Abakabona abakulu nabawandiiki nibemeera nibagumya muno okumulopa. ¹¹ Ale oKerodi nabasurukale, nibamugaya, ni bamudduura, ni bamuzwalikisya ekizwaalo ekipiryapirya ni bamwiryaayo ewa Piraato. ¹² oKerode no Pirato nibalyooka nibayimbangana oku lunnaku olwo; olwakubba omukwekeera baali bakyawengaine. ¹³ oPiraati nayeta abakabona abakulu nabakungu naba bantu, ¹⁴ nabakoba ati mundeteire omuntu onu nti yakyamirerye abantu; erate, bona, nje nimukemenkereize omu maiso gaanywe, timboine nsonga ku muntu onu omwebyo bimu mulopere. ¹⁵ Erate, gonze oKerode, olwakubba amwiirye jituli, erate bona, ndoowo kigambo kyakoore ekisaanire okumwitiisya. ¹⁶ Baitu, ninnamala okumubonereza, nimutaisya. ¹⁷ Erate kyamusaniranga okubataisirya omubbuwe omwei oku mbaga. ¹⁸ Baitu ni bakayana boona boona amwei, nka bakukoba bati twaala onu, otusindabuure oBalaba. ¹⁹ Oyo niye muntu gwe bataire omunkomyo olwakukakanyala okwaali omu kibuga, n’olwakiitta bantu. ²⁰ OPiraato nasimoola nabo nka akutaka okutasya oYesu. ²¹ Baitu bo nibasimoora aigguru nka bakukoba bati mukomeere, mukomeere. ²² Nabakoba omulundi ogwa kasatu ati Lwaki, onu akoore kibbi ki? timboine okuye ensonga ekumwitisya: ale ninamala okumubonereza namutaisya. ²³ Baitu, bo nibamulemeera olwa maraka agakooto, nka bakwegaiira oku mukomeera. Amaraka gaabwe nigasiinga okukola. ²⁴ OPiraato nasalawo ebigambo nka nibegairiire. ²⁵ nataisya oyo ayanagiibwe omunkomyo olwa bukakanyali n’obwiitti nka nibamwegairiire. Baitu nawaayo oYesu okumukomeera nka nibatakire. ²⁶ Ale nibaali nka bakumutwaala, nibakwaata Omukuleene oSimooni, eyaali akuzwa omukyaalo, nibamutiika omusaalabba, okugwetiika nka akuzwa ennyuma wa Yesu. ²⁷ Ekibbuura ekikooto nikimusengeerya ekya bantu na bakali abamukungiire, erate nabamunakuwaara. ²⁸ Baitu, oYesu nabacukira nabakoba ati abaala ba Yerusaalemi, mutankungira nje mwekungire nywenkai na baana banywe. ²⁹ Olwakubba, bona, ennaku zikwiiza, zebalikoberamu nti baliina omukisa abagumbba, nabanda ezitabyaala, namabeere agatayonca. ³⁰ Nibatandika okukoba ensozi nti mutugweeku no busozi nti mutwevunikeku. ³¹ Olwakubba nibakola binu okumusaale ogubisi, okugukalu kiribba kityai? ³² Erate yatwaliibwe nabandi babiri abakoore okubbi, okwiitibwa amwei naye. ³³ Ale nibaikire omu kifo ekyetebwa e kiwanga, nibamukomeera awo, nabadi abakoore okubbi, omwei oku mukono oguryo, owondi oku gumoso. ³⁴ Ale oYesu nakoba ati Itaange basaasire olwakubba, tibamaite ki bakukola. Nibagabana ebizwaalo byamwei nka bakukubba akalulu. ³⁵ Abantu nibemeera nka bakuloleera. Abakungu boona ni bamusekeera nka bakukoba bati yacunguranga abandi, yeena yecungure,obate niyabba nka niye Kristo wa kanca, omukome waamwe. ³⁶ Abalusura boona ni bamuduura nka bakwiiza jaali, na bakumuweerya omwenge ogukatuuki, ³⁷ Baitu, nka bakukoba bati obate nka niiwe Mukama w’Abayudaaya, wecungure wenkai. ³⁸ Niwabbaawo ne bbaluwa aigguru waamwe nti ONU NIYE MUKAMA W’ABAYUDAAYA. ³⁹ Omwei okwaabo abakoore okubbi abawanikiibwe naye, namuzuma nka akukoba ati tiniiwe Kristo? wecungure wenkai naiswe. ⁴⁰ Baitu, owa kabiri nairamu namunenya, nka akumukoba ati nokutiina totiina Kanca olwakubba, oli ku kibonerezo kimwei naye? ⁴¹ Erate, iswei twajjunaaniibwe nsonga; olwakubba ebisaanire bitwakoore nibyo tukusasulwa: baitu onu takolanga kigambo kitasaniire. ⁴² Nakoba ati Yesu onyizukiranga no liiza omu Bukama bwaamu. ⁴³ OYesu namukobna ati mazuma nkukoba nti olwa leero wabba nanje omu lusuku lwa Kanca. ⁴⁴ Ale obwiire bwaali bwikire nka essawa mukaaga, niwabbaawo ekirikiirya oku nsi yoona yoona okwiica essawa mwendai, ⁴⁵ eisana obutayaka: neijiji lya muyekaalu ni lyonokamu akati. ⁴⁶ Ale oYesu nasimoola neiraka erikooto, nakoba ati Itaange nkuta omwooyo gwange omu mikono zaamu; niyamaare okusimoola ekyo, naweryaayo obwoomi. ⁴⁷ Ale omwaami wa kitongole niyaboine ekibbairewo naramya oKanca, nka akukoba ati mazuma onu abbaire muntu mwikiriiri. ⁴⁸ Ne bibbuura byoona byoona ebyaali bikumbaine okwebonera, nibyaboine ebibbairawo nibairayo nka bakwekubba omu bifubba. ⁴⁹ Na banywaani baamwe boona, nabakali abamusengereiye nka akuzwa e Ggaliraaya, nibemeera alai nka bakubona ebyo. ⁵⁰ Ale bona, niwabbaawo omuntu eibara lyaamwe Yusufu eyaali omukungu, omuntu omusai,, erate omwikiriiri ⁵¹ Oyo tiyateesere kimwei omu kuteesa kwaabwe, gonze omu kikolwa kyaabwe, owa Alimasaya, ekibuga ky’Abayudaaya eyaali alindiririirye Obukama bwa Kanca. ⁵² Oyo nayaba ewa Piraato, nasaba omulambo gwa oYesu. ⁵³ Naguniinulayo naguzzinga omu lugoye lwa bafuta, naguta omumagombbe agabaiziibwe omwibbaale omutateebwanga muntu. ⁵⁴ Ale lwaali lunnaku lwa kuteekateeka, essabbiiti nka yabbaawo mambya. ⁵⁵ Nabakali beyazwiire nabo e Ggaliraya ni basengeerya, nibabona amagombbe, no mulambo gwaamwe wegwatekeibwe. ⁵⁶ nibaira, nibateekateeka ebya kawoowo, na mafuta gamusutai. N’oku lunnaku lwa ssabbiiti nibawuumula nka eiteeka niryaali.