Esuura 22
1
Ale embaga eya migaati egitatumbisiswa eyetebwa okwakalaku yaali nka erampi okwiika.
2
oYesu abakabona abakulu ni basala amagezi nibaamwitta, olwakubba baali bakutiina abantu.
3
Ale oSitani nangira omu oYuda ayetebwa oIsukalyoti eyaali okuwendo gwaabo eikumi nababiri.
4
oYuda nayaba nateesa na Bakabona abakulu na baami abarusura nka niyamuwaayo oYesu jibali.
5
nibasemeerwa nibaikaanya okumuweerya empiiya
6
Naikiriza naswaaga eibbanga liyamuwerayo jibali awataali kibbuura.
7
Ale ekiro ekya migaati egitatumbisiswa ni lwiika, olusaniire okusaarwaaku okwakalaku.
8
Natuma oPeetero no'Yokaana nabakoba ati mwabe mututegekere okwakalaku tukulye.
9
Nibamukoba bati okwendya tukutegekere ayi?
10
Nabakoba ati bona, nimwabba mwingiire omu kibuga, mwayaja omuntu ayatangarana nanywe eyetiikire ensuwa ya maizzi mumusengeerye omu nnyumba mweyangira.
11
Mwakoba omukama wa nnyumba muti omwegesya akukobere ati ennyumba yabagenyi erai, mwe
12
Erate, Oyo yabalanga ennyumba ejikooto eya waigguru etimbiibwe: mutegekere omwo.
13
Nibaaba, nibabona nka nakobero: ni bategeka okwakalaku.
14
Ale ekiseera nikyaikire, naikala oku mmere nabakwenda amwei naye.
15
Nabakoba ati negombere muno okuliira amwei okwakalaku kunu nka nkyaali kuwalalibwa.
16
Olwakubba nkubako nti tindikulya nakadooli okwiica lwekulikirira omu Bukama bwa Kanca.
17
oYesu nakwaata ekikompe, niyebalya nakoba ati mutoole kinu mugabane nywekai nanywekai.
18
Olwakubba nkubakoba nti tindinywa okwekeera ati oku bibala bya muzabibu okwiica Obukama bwa Kanca nibuliiza.
19
nakwaata omugaati niyebalya, naguwendawendamu, nabakoba ati gunu nigwo mubiri gwange ogukuwebwaayo oku lwanywe: mukolenge mutyo okunyizukiranga njje.
20
Erate, ne kikompe atyo nibamaare okulya, nk’akukoba ati ekikompe kinu niyo ndagaano ejiyaaka omu isagama lyaange, erikususuka oku lwanywe.
21
Baitu, bona, omukono gooyo akundyamu olukwe guli amwei nanje oku meeza.
22
Olwakubba, omwaana wa muntu okwaaba akwaaba nka nikyalagiirwe: Baitu, zimwajirye omuntu oyo akumulyaamu olukwe!
23
Nibatandika okwebulyangana bonkai na bonkai bati yabba naani okwiswe akwaaba okukola ekyo?
24
Niwabbaawo n’empaka omu bo, nti naani omu bo alowoozebwa okubba omukulu.
25
Nabakoba ati abakama bammanga babafuga; naabo abaliina obuyinza oku bo beetebwa abakola okusai.
26
Baitu nywe timutyo; Baitu omukulu omu nywe abbe nk’omunto; nooyo akulembera abbe nka muweereza.
27
Olwakubba omukulu naani, aikala oku mmere, obate aweereza? Tiniyooyo aikala oku mmere? Baitu nje akati omu nywe ndi nka aweereza.
28
Baitu, nywe abemereire amwei nanje omu koyerwa kwange;
29
nanje mbabikiire Obukama, nka Oitaange niyambikiire nje.
30
Leke mulye, erate munywe oku meeza yaange Omubukama bwange,erate muliikala oku ntebe eza kitinisya,nka mukusaara emisaango ebika eikumi nebibiri eby’Abaisiraeri.
31
Simooni, Simooni,bona oSitaani yegayiriire okubawewa nywe nk’engaano:
32
baitu nje nkusabiire, okwikiriza kwaamu kuleke kukendeera: naawe nomalanga okucuuka,, oggumyanga abaganda baamu.
33
Namukoba ati Mukama wange netekeretekere okwaaba naawe no munkomyo nomu kufa.
34
oYesu nakoba ati nkukukobera we Peetero, onkoko leero tiyakooke nka tonegaine emirundi isatu nti tomaite.
35
Ale oYesu nabakoba ati ninabatumire nka timuliina bikapu, gonze olukobba, gonze enkaitto mwabbaireku kimutaalina? nibakoba bati bbe.
36
Nabakoba ati baitu, atubunu, aliina ekikapu, akitwaale, no walukobba atyo: baitu ataalina mpirima, atunde olugoye lwaamwe ajigule.
37
Olwakubba, nkubakoba nti kinu ekyawandikiibwe kitekeibwe okwikiira oku nje nti yabaliirwe amwei nababbi: olwakubba ekinsaniire kiteekwa okwikiira.
38
Nibakoba bati Mukama waiswe, bona, empiri ibiri nzini, nakoba ati zaamala.
39
oYesu Nawuluka nayaba oku lusozi olwa Zeyituuni nk’empisa yaamwe ni yaali nabeegereswa baamwe ni bamusengeerya.
40
Ale niyaikire omu kifo awo, nabakoba ati musabe muleke kwingira Lukka mukoyerwa.
41
Ye nabawukanaku eibbanga nka wakasukibwa eibbaale nafukamira nasaba,
42
nka akukoba ati Itaang, noyendya ntolaku ekikompe kinu, baitu tinka nje ninkwendya, baitu we kyokwendya kikolebwe.
43
Ontumwa namubonekera nka akuzwa omwigguru nka akumutaamu amaani
44
Nafuba nka akulumwa, niyeyongera okusaba omuno:entuuyo zaamwe niziisana amatondo gaisagama nka gakutonya ansi.
45
Niyaimukire omu kusaba naiza eddi abeegereswa baamwe nabaaja nka babbasirye olwa bujune.
46
nakoba ati ekibabbasisirye kiki? mwimuke musabe muleke kwingira mukoyerwa.
47
Yali nka akyasimoola, bona, ekibbuura, no Yuda omwei okwikumi nababiri nka abakulembbeire nasembera oYesu oku muwa omukifubba.
48
Baitu oYesu namukoba ati omwaana wa muntu okumulyaamu olukwe nka okumugwa omukifubba?
49
Naabo beyaali nabo, nibaboine nibaboine ekikwaaba okubbaawo nibakoba bati Mukama waiswe tuteme nempirima.
50
N’omwei okwaabo natema omwiiru wa kabona asiinga obukulu namusalaku okutwi kwaamwe okwa guryo.
51
Baitu oYesu nairamu nakoba ati koma kwekyo kyonkai. Nakwata okutwi kwaamwe namutamba.
52
OYesu nakoba abakabona abakulu na baami bamw’Iramyo, nabakaire abamwiziire ati munyiziire nka omunyagi, nempirima ne miigo?
53
Ninabbanga nanywe buliizo omw’Iramyo timwangololeireku mikono jaanywe: baitu kinu nikyo kiseera kyanywe, n’obuyinza bwakirikiirya.
54
nibamukwaata nibamutwaala nibamwingirya omu nnyumba ya kabona asiinga obukulu. Baitu oPeetero nasengeerya nka akuzwa alai.
55
Ale nibaali bamaare okuwemba omuuro akati omulubuga, nka baikaire amwei, oPeetero naikala akati omu bo.
56
Ale omwaala omwei niyamuboine nka aikaire awakubonia, namwetegereza, nakoba ati oyo yeena yabbaire naye.
57
Ni yegaana nka akukoba ati omukali, timumaite.
58
ekiseera nikyayakairewo, owondi ni namubona nakoba ati weena oli omwei oku bo. Baitu oPeetero nakoba ati omuntu, Tininje.
59
Waali wakairewo ekiseera, essawa nka emwei, owondi namwetegereza, nakoba ati mazuma nooni yabbaire naye, olwakubba mu Ggaliraaya.
60
Baitu oPeetero nakoba ati omuntu, timaite kyokusimoola. Ale amaangu ago, niyaali akyasimoola onkoko nakooka.
61
Ale Omukama waiswe, nacuuka naloleera oPeetero, oPeetero naizukira ekigambo kya Mukama waiswe niyamukobere nti olwa leero onkoko yaabba akyaali kukooka wanegaana emirundi isatu.
62
Nawuluka enzai nakunga muno Amaliga.
63
Na bantu abaali bakwaite oYesu ni bamuduura nka bakumukubba.
64
Nibamusweeka omu maiso, ni bamubuulya, nka bakumukoba bati lagula, naani akukubbire?
65
Ne bindi biinji nibabimusimoolaku oYesu nka bakumuzuma.
66
Ale obwiire nibwakeire, abakaire ba bantu ni bakunbbaana, abakabona abakulu, erate nabawandiiki, niba mutwaala omu lukiiko lwaabwe, ni bamukoba bati,
67
Obate nka niiwe Kristo, tukobere. Yeena nabakoba ati nebwenabakobera, timwaikirize nakadooli.
68
Ne bwe nababuulya, timwairemu Lukka nakadoli.
69
Baitu, okwekeera ati omwaana wa muntu akwaaba okwiikala oku mukono oguryo ogwa maani ga Kanca.
70
boona boona nibamukoba bati ale we, oli mwaana wa OKanca?oYesu nabakoba ati nka ni musimoire ninje onu.
71
Ni bakoba bati tukwenderyaki abajuurwa? Olwakuba, iswe twewuliriire okuzwa omu kanwa kaamwe ye.