¹ Ale oku lunnaku olwekereire omu nnaku omusanju, omu kibbambya emanbya, nibaiza oku magombbe nibaleeta ebya kawoowo bibategekere. ² Nibabona eibbaale nka liyiibwe okuzwa oku magombbe. ³ Nibaingiramu , nibatasanga mulambo gwa Mukama waiswe. ⁴ Ale olwaikire nibaali nka basamiriire olwekyo, bona, abantu babiri nibemeera webaali, nka bazwaire engoye ezikumesyamesya; ⁵ ale nibaali batinire, nka bakutamirye amaiso gaabwe, nibabakoba bati kiki ekibaswagisya omwoomi omu bafu? ⁶ taalowo ani, baitu ayimbokere: mwizukire biyasumoire nanywe nka acaali omu Ggaliraaya, ⁷ nka akukoba ati kisaniire omwaana wa muntu okuwebwaayo omu mikono ja bantu abata nebibbi, noku komeerwa, noku lunnaku olwa kasatu okuyimbooka. ⁸ Ale nibaizukira ebigambo byaamwe, ⁹ nibazwa oku magombbe nibairayo, ebyo byoona byoona nibabikobera baddi eikumi noomwei nabandi boona boona. ¹⁰ Baali oMalyamu oMagudaleena, no Yokaana, no Malyamu omaamwe wa Yakobo nabakali abandi amwe nabo, ni bakobera abatume ebigambo ebyo. ¹¹ Ebigambo ebyo, nibiisana omu maiso gaabwe nka ebya busirusiru nibataikiriza. ¹² Baitu oPeetero nainuka nairuka oku magombbe, nakutama, nalengeza nabonamu ebiwero bya bafuta nka biri byonkai, naira ewaamwe nka akwewuunya ekibbairewo. ¹³ Ale bona,oku lunnaku olwo babiri okubo baali nka bakwaaba omu mbuga ebara lyaayo Emawo, eyaali alai no Yerusaalemi, nka esutadyo nkaaga. ¹⁴ Nibanyumya bonkai nabonkai ebyo byoona byoona ebibbairewo. ¹⁵ Ale olwaikire, baali nka bakunyumya, erate nka bakwebulyangana, oYesu yenyenere nabasembeera, nayaba amwei nabo. ¹⁶ Baitu amaiso gaabwe ni gaigalwa baleme okumweteja. ¹⁷ oYesu nabakoba ati bigambo ki bimukubulyangana nka mukutambula? Ni bemeera nka bawotokere. ¹⁸ Omwei okubo eibara lyaamwe; Kulyoppa nairamu namukoba ati We osula wenkai omu Yerusaalemi atamaite ebibbairemu omu biro binu? ¹⁹ oYesu Nabakoba ati bigambo ki? nibamukoba bati ebya Yesu omu Nazaleesi eyaali omuranji owa maani omu biyakolanga ne biyabaziranga omu maiso ga Kanca n’omu bantu boona boona. ²⁰ Nabakabona abakulu, nabakungu baiswei ni bamuwareyo oku musaara omusango ogwa ku mwitta, ni bamukomeera. ²¹ Baitu, iswei twalai tukusuubira nti niye alicungura oIsiraeri. Erate nokubinu byoona byoona, olwa leero zinu ennaku isatu ebigambo binu bukya bibbaawo. ²² Erate, nabakali abamwei aba waiswe batuwuninkiriirye, abakeire okwaaba oku magombbe, ²³ nibatayajirye yo mulambo gwaamwe, nibaiza nibakoba bati ba boine okwolesebwa kwa bantumwa abakobere nti mwoomi. ²⁴ Nabamwei okwaabo ababbaire naiswe bayabire oku magonbe ni bayaja batyo nka abakali ni bakobere, Baitu nibatamubona. ²⁵ Ale oYesu nabakoba ati nywe abasirusiru, abagayaali omu myooyo okwikiriza byoona byoona abaranji bibasioire. ²⁶ Tikyasaniire oKristo okubonyabonyezebwa ebyo, leke angire omu kitinisya kyaamwe? ²⁷ Nasookera oku oMusa noku baranja boona boona, nabamanyisya omu byawandiikibwa ebyo byoona byoona ebyamuwandikiirwe ye. ²⁸ Nibasembera ampi ne mbuga ji baali bakwaaba: oYesu nabba nka akubakalya okwaaba omu maiso. ²⁹ Ni bamuwaliriza nka bakukoba bati ikala naiswe; Olwakubba obwiire bwabire okusweeka, neisana liweireyo ati oYesu nangira okwikala nabo. ³⁰ Ale olwaikire yaali aikaire nabo oku mmere, nakwaata omugaati niyebalya naguwendamu nabawa. ³¹ Amaiso gaabwe ni gazibuka ni bamweteja; nabulawo bo obuta mubona. ³² Nibebulyangana bati emyooyo zaiswei tizabbaire nka ziututyemuka omunda yaiswe, niyabbaire akusimoola naiswe omu nzira, nka akutuswekuura ebyawandiikibwa? ³³ Nibaimuka omu kiseera ekyo nibairayo e Yerusaalemi, nibaaja eikumi nomwei, naabo bibaali nabo, nka bakumbbaine ³⁴ nka bakukoba bati amazuma Omukama waise ayimbookere, erate abonekeire oSimooni. ³⁵ Boona nibabakobera biddi ebya munzira, oYesu nebwebamwetejerye omu kumenyamu omugaati. ³⁶ Ale baali nka bakyabaza ebyo, oYesu omwenyenere nayemeera akati waabwe, nabakoba ati emirembe jibbe nanywe. ³⁷ Bitu nibekanga nibatiina, nibalowoozaa nka bakubona mizimu. ³⁸ oYesu nabakoba ati ekikuberalikiirya kiki? nokubuusabuusa ku kwizira ki omu myooyo zaanywe? ³⁹ mubone engalo zaange, na magulu gaange, nka ninje mwenyenere, munkwaateku mubone, olwakubba omuzimu tiguliina nnyama na magumba, nka nimukubona nje nindi nabyo. ⁴⁰ Niyamaare okubaza ekyo nabalanga engalo zaamwe na magulu. ⁴¹ Ale nibaali nka bakyaali kwikiriza olwesanu, nka bakwewuunya, oYesu nabakoba ati muliina ekiriibwa ani? ⁴² Nibamuwa ekitundu kya kyennyaja ekyookye. ⁴³ Nakikwaata nakiriira omu maiso gaabwe. ⁴⁴ Nabakoba ati binu nibyo ebigambo byange binabakobeire, nka nkyaali nanywe, nikisaanira byoona byoona okwikiriira, ebyawandikiirwe nje omu mateeka ga Musa no mubaranji no mu zabbuli. ⁴⁵ Nalyooka naswekula amagezi gaabwe beeteje ebyawandiikibwa; ⁴⁶ nabakoba ati nimwo kityo kyawandikiibwe oKristo okubonyabonyezebwa no kuyimbooka omu bafu oku lunnaku olwa kasatu; ⁴⁷ erate amaanga goona goona okukoberwanga okuwendeka omwooyo, nokutolebwaaku ebibbi omw’ibara lyaamwe, okusookera oku Yerusaalemi. ⁴⁸ Niinywe bajuurwa beebyo. ⁴⁹ Erate bona, nkubaweereza nywe okusuubiza kwa itaange, baitu mubbe omu kibuga okwica ni mulizwalikisibwa amaani agazwa aigguru. ⁵⁰ Nabatwalaa enzai nabaikya e Besaniya: naimuca emikono zaamwe nabawa omukisa. ⁵¹ Ale olwaikire nka akyabaweerya omukisa, nabawukanaku natwaalibwa omwigguru. ⁵² Boona ni bamuramya, nibaira e Yerusaalemi nakusemeerwa kwinji. ⁵³ Nibabbanga Omwiramyo buliizo, nka bakweebalya oKanca.