¹ oYesu Nangira omu Yeriko nabba nka akwakalamu. ² Ale bona, waalowo omuntu eyaali ayetebwa eibara lyaamwe Zaakayo, yaali mukulu wabasololi, erate nka muguuda. ³ Nasala amagezi okubona oYesu naali; natasobole olwa kibbuura,olwakubba ekigero kyaamwe yaali mumpi. ⁴ Nairuka namwebembera, naniina oku musaale omusikamooli amubone: olwakubba yaali akwaaba kwakala mu nzira eyo. ⁵ Ale oYesu niyaikire omu kifo waali, nalola aiguru, namukoba ati Zaakayo niinuka maangu, olwakubba olwa leero kinsaniire okwikala omu nnyumba yaamu. ⁶ Naniinuka maangu namwaniriza nka asemereire. ⁷ Nibaboine, nibamwemulugunyiza boona boona nka bakukoba bati angiire okubbasya ewa muntu aliina ebibbi. ⁸ OZaakayo nayemeera nakoba Omukama waiswe nti bona, Mukama wange, ekitundu kya bintu byange nkubawa abooro, obate nka nalyakire omuntu yeena yeena ekintu kyaamwe, nkumusasula emirundi inai. ⁹ oYesu namukoba ati olwa leero okucungurwa kwiizire omu nnyumba munu, olwakubba yeena mwaana wa Ibulaimu. ¹⁰ Olwakubba omwaana wa muntu yaizire okuswaaga ekyo ekyabuure. ¹¹ Ale nibawuliire ebyo, niyeyongera nabasubiira olugeero okubatereza, olwakubba yaali ampi n’oYerusaalemi, erate baali bakulowoza nti Obukama bwa Kanca bukwaaba kuboneka maangu ago. ¹² Nikyo yazwiire nabakoba ati waalowo omuntu omukulu eyaabire omu nsi eyaalai, okulya obukama leke aire. ¹³ Nayeta abaiiru baamwe eikumi nabaweerya empiya ebikumi bibiri, nabakoba ati musubulyenge okwiica nindiira. ¹⁴ Baitu, abasaiza baamwe nibamunoba nibatuma ababaka emabega waamwe, nka bakukoba bati Titukwendya oyo kutufuga. ¹⁵ Ale olwaikire niyaire nka amaare okulya obukama,nalagira okweeta abaiiru biyawaire efeeza, alyooke amanye amagoba ge basubwire. ¹⁶ Eyekereire naiza nakoba ati mukama wange, empiya zaamu amakumi abiri gabyaire empiiya bibiri. ¹⁷ Namukoba ati webale, omwiiru omusai: olwakubba waali mwesigwa oku kintu ekidooli omuno, ale bba n’obuyiinza oku bibuga ikumi. ¹⁸ Naiza owa kabiri nakoba ati mukama wange, empiya zaamu abiri zabyaire empiya kikumi. ¹⁹ Yeena namukoba weena bba oku bibuga bitaanu. ²⁰ Owondi naiza namukoba ati mukama wange bona, empiya zaamu nzini abiri nazibiikire nka nzibbuwire omu kiwero. ²¹ Olwakubba nakutiinire olwakubba oli muntu mukakanyali: akoma kyotaateirewo, okessa kyotaasigire. ²² Namukoba ati akanwa kaamu ka kkusaara omusango, we omwiiru omubbi. Waali omaite nka nje nta mukakanyali, nka nkoma kintaateirewo, nka nkessa kintaassigire; ²³ ale kiki ekyakugaine okuweerya empiya zaange abasubuzi, nanje ninandiizire nandizitwaire namagoba gaazo. ²⁴ Nakoba abaali bemereire awo nti mu mutooleku empiya zaamwe, muziweerye oyo aliina empiya ebikumi ebibiri. ²⁵ Nibamukoba bati Mukama waiwe, aliina empiya ebikumi bibiri. ²⁶ Nkubakoba nti buli aliina aliweebwa, baitu oyo ataalina, erate ekyo ky’aliina kyoona kirimutoolebwaku. ²⁷ Baitu, abo abananzugu bange abatayendya nje kubafuga, mubaleete anu mubaittire omu maiso gaange. ²⁸ Ale niyamaare okusimoola ebigambo ebyo, nakulembera okwaaba e Yerusaalemi. ²⁹ Olwaikire niyaali nka alampi okwiika e Besufaage n’oBessaniya, oku lusozi olwetebwa olwa Zeyituuni, natuma oku beegereswa baamwe babiri, ³⁰ nka akukoba ati mwaabe omu mbuga edi omu maiso ganywe, nimwaigira omwo mwaabona omwaana gwa nkaina nka gubbuwibwe ogutaikalwangaku muntu: mugusandabule muguleete. ³¹ Erate, omuntu nababuulya nti mugusandaburaki? Mukobe mutyo nti Omukama waiswe niye akugwendya. ³² Naabo abatumiibwe nibaaba, nibabona nka oYesu abakobere. ³³ Ale nibaali nka bakusandabula omwaana gwa nkaina, abakama baago nibabakoba bati mukusandabula gwa ki omwaana gwa nkaina ogwo? ³⁴ Nibakoba bati Omukama waiswe niye akugwendya. ³⁵ Nibaguleeta ewa Yesu: nibaliira engoye zaabwe oku mwaana gwa nkaina nibatamburyaku oYesu. ³⁶ Ale yaali nka akwaaba, nibaliira engoye zaabwe omu nzira. ³⁷ Ale niyaali nka alampi okwiika omu ansi wa lusozi lwa Zeituuni, ekibbuura kyoona kyoona ekya beegereswa ni batandika okusemeera, n’okwangiriza oKanca neiraka erikooto olwa bya magero bi baboine; ³⁸ nka bakukoba bati Aweweibwe omukisa Omukama azira omwibara lya Kanca: emirembe omwigguru, ne kitinsya aiguru omuno. ³⁹ Abafalisaayo abamwei aba mu kibbuura nibamukoba bati Omwegesya koma oku beegereswa baamu. ⁴⁰ oYesu Nairamu nabakoba ati nkubakoba nibaasirika, amabbaale gaiza kusimoora aigguru. ⁴¹ Ale oYesu niyasembere ampi nabona, ekibuga nakikungira, ⁴² nka akukoba ati siinga omaite oku lunnaku lunu, we, ebigambo ebya mirembe! Baitu ati bikwekeibwe amaiso gaamu. ⁴³ Olwakubba ennaku zirikwizira, abananzugu baamu, lwe balikombokaku olukomera, balikwerugurya, balikuzingiza ensonda zoona zoona. ⁴⁴ Balikunaga ansi, n’abaana baamu abali omunda yaamu; baitu tibalikulekamu ibbaale eriri okuruguru okwibbaale; olwakubba tiwamaite biro byakucaarwa. ⁴⁵ oYesu Nangira Omwiramyo, niyekeera okupekamu abaali bakutunda ⁴⁶ Lukka nka akubakoba ati kyawandikiibwe kiti erate ennyumba yange yabbanga nnyumba yakuramiryamu: baitu nywe mujifiire mpuku yabanyagi? ⁴⁷ Ale oYesu nayegesyanga omwiramyo buli lunnaku. Baitu abakabona abakulu, nabawandiiki, na bakulu ba bantu nibasala amagezi okumuzkiirya: ⁴⁸ nibatabone ki baakola, olwakubba abantu boona boona bamutaireku muno omwooyo nka bakumuwuliirya.