¹ .OYesu nabasubiira olugeero nikibasaniire okusabanga buliizo, obutakerwanga: ² nakoba nti waalowo omulamuzi omu kibuga ekimwei, atatiinanga Kanca, erate nka tawa muntu yeena yeena kitinsya. ³ Erate, waalowo onamwandu omu kibuga ekyo eizanga ewa mulamuzi oyo, nka akukoba ati ndamula no munanzigu wange. ⁴ Omulamuzi natasooke kwikiriza, baitu oluzwanyuma nabaza omunda yaamwei nti gonze nka tintiina Kanca, erate nka tintaamu muntu yeena yeena kitinisya; ⁵ baitu olwakungadya onamwandu onu kwangadirye namulamula, aleme kusigala nka aizza buliizo. ⁶ Omukama waiswe nakoba ati muwuure omulamuzi oyo atali mwikiriiri kya kukoba. ⁷ Ale no Kanca taliramula balonde baamwe, abamukungiira emisana n’obwiire nka akyaguminkiriza. ⁸ nkubakoba nti alibalamula mmangu. Baitu omwaana wa muntu naliiza, alyaajja okwikiriza oku nsi? ⁹ Nabandi abaali bakwerowooza oku bwaabwe, okubba abaikiriri nka bagaya abandi, oYesu nabasubiira olugeero lunu nti ¹⁰ abantu babiri baingiire omu nnyumba ya Kanca okuramya, omwei Mufalisaayo, owondi muwooza. ¹¹ Omufalisaayo nayemeera nasaba yenkai ebigambo binu nti Kanca, nkukwebalya olwakubba tinyisana nka abantu abandi boona boona, abanyagi, abalyaake, abasiani, gonze nk’onu omuwooza. ¹² Nsiiba emirundi ibiri omussabbiiti, mpaayo ekitundu ekyaikumi oku byoona byoona byenfuna. ¹³ Baitu omuwooza nayemeera alai natatake nakwimuca maiso gaamwei mwigguru, baitu niyekubba omukifubba, nka akukoba ati Kanca, onsasire nje aliina ebibbi. ¹⁴ Nkubakoba nti oyo yenkai, yaireyo omu nnyumba yaamwe nka aweweibwe obwikiriri okusiinga oddi; olwakubba buli ayegulumirya alitowazibwa, n’oyo eyetowaaza aligulumira. ¹⁵ Ale nibaleeta abaana abato waali, okubakwaateku, baitu abeegereswa ba Yesu ni bababoine ni bababoigoora. ¹⁶ Wazira oYesu nabeeta nti nka akukoba ati muleke abaana abato baize jendi, mutabagaana, olwakubba abali nka abo Obukama bwa Kanca, nibwo bwaabwe. ¹⁷ Amazuma nkubakoba nti Buli ataikirizenge Bukama bwa Kanca nka omwaana omuto talibwingiramu nakadooli. ¹⁸ N’omuntu omukulu omwei namubuulya nka akukoba ati Omwegesya omusai, nkole ki okusikira obwoomi obutawaawo? ¹⁹ OYesu namukoba ati okunyeteraki omusai? ndoowo musai okutoolaku odi omwei yenkai oKanca. ²⁰ Amateeka ogamaite nti tosiananga, toittanga, toibbanga, owanga ekitinisya omaawo n’oiteewo. ²¹ Nakoba ati ebyo byoona byoona nabikwatanga okuzwa omu buto bwange. ²² OYesu ni yawuliire ekyo namukoba ati okubulwaaku kimwei, tunda byoona byoona byoli nabyo, obigabire abooro, olwo olibba n’obuguuda omwigguru: ale omale oize onsengeerye. ²³ Baitu ni yawuliire ebyo, nanakuwala muno, olwakubba yaali muguuda muno. ²⁴ Ale oYesu niyaboine, nakoba ati ka kizibu abaliina obuguuda okwingira omu Bukama bwa Kanca. ²⁵ Olwakubba kyangu ongamiya okwaakala omu nyindo yampisso okusiinga omuguuda okwingira omu Bukama bwa Kanca. ²⁶ Abawuliire ebyo nibakoba bati olwo naani ayinza okulokoka? ²⁷ Baitu, oYesu nakoba ebitasoboka edi abantu, bisoka edi oKanca. ²⁸ OPeetero nakoba bona, iswe twalekere ebyaiswe ni tukusengeerya. ²⁹ Oyesu Nabakoba ati amazuma nkubakoba nti ndoowo muntu ayalekere ensisira, gonze omukali, gonze owa luganda, obate ababyaire, obate abaana, olwa Bukama bwa Kanca. ³⁰ otaweebwe tte mirundi ziinji omu bwiire bunu, n’omu bwiire obukwiraku obwoomi obutawaawo. ³¹ OYesu natwaala abo eikumi nababiri nabakoba ati mubone, tukwaaba e Yerusaalemi, n’ebyo byoona byoona ebyawandikiibwe abaranji oku mwaana wa muntu biikiire. ³² Aliwebwaayo edi omu bamaanga, aliduurwa, aliswazibwa, alicwantibwaku amacwantai, ³³ bali mukubba enkobba, bali mwitta, erate oku lunnaku olwa kasatu aliyimbooka. ³⁴ Abeegereswa baamwei, ni batetejerawo nakimwei. Ekigambo ekyo kyaali kibakwekeibwe, nibateteje ebyasimoleibwe. ³⁵ Ale olwaikire oYesu niyaali nka alyampi okwiika e Yeriko, omwigali wa maiso yaali aikaire oku nzira nka akusabiirya; ³⁶ ammangu ago niyawuliire ekibbuua kya bantu nka kikwaakala, nabuulya ati kiki ekyo? ³⁷ Nibamukoba bati oYesu Omunazaaleesi akwakala. ³⁸ Nabazira aigguru ati oYesu, omwaana wa Daudi, onsasire. ³⁹ Nabadi abaali bekereire ni bamuboigoora okusirika. Baitu, niyeyongera muno okubazira aigguru, nka akukoba Yesu omwaana wa Daudi, onsaire. ⁴⁰ OYesu nayemeera, nalagira oku muleeta waali, ale niyasambeire ampi, namubuulya ⁴¹ ati okwendya nkukoore ki? Nairamu nakoba Mukama wange nkwendya kubonia. ⁴² OYesu namukoba zibukka: okwikiriza kwaamu kukcungwire. ⁴³ Amaangu ago nazibukka amaiso, nabonya namusengerya nga akuwangiriza o kancca abantu bonabona ni babwoine ni bugirizza okancca