¹ OYesu nakoba abeegereswa baamwe ati tikisoboka ebyesitalya obutaiza, baitu zimwaajirye oyo abireeta! ² Akiri oyo abuwibwengemu emmengo omwikoti lyaamwe, okunagibwa omu nnyanja, okisiinga okwesitalya omwei okwaabo abato. ³ Mwekumenge: omuganda waamu nasiisanga, omulambbanga; nayendeka omwooyo omusasiranga. ⁴ Erate nakusiisanga emirundi omusanju oku kiro kimwe, erate emirundi musanju nakucukira nk’akukoba ati mpendekere omwooyo, omusasiranga. ⁵ Abakwenda ni bakoba oMukama waiswe bati; otwongereku okwikiriza. ⁶ Omukama waise nakoba ati siinga mubbaire n’okwikiriza nka akampeke ka kakalidaali, mwandikobere omusikamiini gunu nti sigukka osimbbibwe omu nnyanja, erate gwandibawuliire. ⁷ Baitu naani oku nywe, aliina omwiiru nka akuluma, obate nk’akuliisya entaama, naingira nk’akuzwa omulusuku, alimukoba ati izza mmangu ago oikale olye? ⁸ baitu, atamukoba ati tegeka emmere webbuwe, oiwule emmere ndye, mmale okulya no kunywa; naawe leke olye, erate onywe? ⁹ Amwebalya omwiiru oyo olwakukola byalagiirwe? ¹⁰ Erate nywena mutyo, ni mumalanga okukola byoona byoona bimwalagiirwe, mukobenge muti; iswe tuli baiiru abatasaana,ebyatusaniire okukola nibyo bitukoore. ¹¹ Ale olwaikire nibaali omu nzira nka bakwaaba e Yerusaalemi yaali akwakala akati wa samaliya no Ggaliraaya. ¹² Ale niyangiire omu mbuga emwei ni bamwaaja abantu ikumi abagenge abayemereire alai; ¹³ ni basimoora aigguru nibakoba bati oYesu, Omukama waiswe, otusaasire. ¹⁴ Niyaboine, nabakoba ati mwaabe mwerange eddi abakabona. ale olwaikire nibaali nka bakwaaba ni balongooka. ¹⁵ Ale omwei okwaabo ni yaboine nka awonere, naira nayangiriza oKanca neiraka erikooto; ¹⁶ nakutama awaali amagulu gaamwe nka akumwebalya oYesu; erate oyo yaali Musamaliya. ¹⁷ OYesu nairamu nakoba ati eikumi boona boona tibalongookere, baitu balai omwendai? ¹⁸ tibabonekere abaire okwangiriza oKanca, wazira omugeni onu? ¹⁹ Namukoba ati imuka oyabe okwikiriza kwaamu kukutambire. ²⁰ Niyabuliibwe Abafalisaayo nti Obukama bwa Kanca buliiza ddi? nabairamu nabakoba ati Obukama bwa Kanca tibwiiza nka bukubonebwa. ²¹ Ale tibalikoba nti bona, buli anu, obate nti buli addi, olwakubba, bona, Obukama bwa Kanca buli munda yanywe. ²² Nakoba abeegereswa baamwe ati ebiro biriiza lwe mulyegomba okubona olumwei oku nnaku za mwaana wa muntu, baitu timulilubona. ²³ Ale balikoba bati bona, addi! Obate bona, ani! timwabanga, erate timusengeryanga; ²⁴ olwakubba okumesya ni kumesya oku ludda olumwe olwa igguru, nikumesya n’okuludda olundi olwa igguru, atyo omwaana wa muntu nimwo alibba oku kiro kyaamwe. ²⁵ Baitu, okwekeera kimusaniire okuwaralibwa abaiinji, no kuganibwa eba miijo zinu. ²⁶ Erate, nka nibyaali omu biro bya Nuuwa, bityo nimwo biribba no mu biro bya mwaana wa muntu. ²⁷ baali nka bakulya nk’abakunywa, nka bakubandula, nka bakufumbirwa, okwiika oku kiro oNuuwa weyangirire omu bwato, omwiizulo ni gwiiza ni gubasanyawo boona boona. ²⁸ Erate, nka nibyaali omu biro bya Lutti, baali nka bakulya, nka bakunywa ,nka bakugula, nka bakutunda, nka bakusiga, nka bakombok; ²⁹ baitu oku kiro kidi oLutti lweyazwiire omu Sodomu, omuuro ne kibiriiti nibitonya okuzwa omwigguru nibibasanyawo boona boona. ³⁰ Na kityo nimwo kiribba oku kiro ky’amwaana wa muntu lwaliswekulibwa. ³¹ Oku kiro ekyo, alibba aigguru oku nnyumba, nebintu byaamwe nka biri omu nnyumba, taninukanga kubitolamu, naali omu lusuku tairanga mabega. ³² Mwizukire omukali wa Lutti. ³³ Buli aswagana okucungura obwoomi bwaamwe ali bubulya; baitu buli alibubulya alibuwonia. ³⁴ Nkubakoba nti omu bwiire obwo babiri balibba oku kitanda kimwei, omwei alitwaalibwa n’owondi alisigala. ³⁵ Abakali babiri balibba nka bakusyeera amwei, omwei alitwaalibwa, n’owondi alisigala. ³⁶ Babiri balibba omu lusuku, omwei alitwaalibwa, n’owondi alisigala. ³⁷ Nibairamu nibamukoba bati ayi, oMukama waiswe? Nabakoba ati Awabba omulambo awo ensega niwo zikumbbaanira.