¹ Ale oYesu nakoba abeegereswa baamwe nti walowo omuntu omuguuda eyaalina omuwanika waamwe; oyo ni bamuloopa jaali nk’akusansania ebintu byaamwe. ² Namweta namukoba ati kiki kinu kyenkuwuura oku we. Bala omuwendo gwa buwanika bwaamu; olwakubba toyiinza kubba tte muwanika. ³ Oyo omuwanika nabazira omunda yaamwe, nti nakola ntyai olwakubba, omukama wange antweireku obuwanika bwange? tindina gakuluma, n’okusabiirya kunkwatisya ensoni. ⁴ Mmaite kinakola, nibampeka omu buwanika, banseberya omu nnyumba zaabwe. ⁵ Nayeta buli eyaalina amabanza ga mukama waamwe, nakoba akwekeera nti omukama wange akukutonga ki? ⁶ Nakoba ati ebigero bya mafuta kikumi, nakoba ati twaala ebbaluwa eyo oikale mmangu, owandiike amakumi ataanu. ⁷ Erate, nakoba owondi ati weena, okutongebwa ki? nakoba emitwaalo jangaano kikumi, nakoba ati twaala ebbaluwa yaamu, owandiike kinanai. ⁸ Ale omukama waamwe natendereza omuwanika omulyaaki olwakubba akoore ebya magezi; olwakubba abaana aba biseera binu balabuki omu miijo zaabwe, okusiinga abaana abaisana. ⁹ njeena nkubakoba nti mwekwanirenge eminywaani omu mamona atali mwikiriri, nibiriwaawo, balikusemberya omu weema ziddi ezitawaawo. ¹⁰ Abba omwesigwa oku kintu ekidooli omuno, n’okukikooto abba mwesigwa, erate, abba omulyaaki oku kintu ekidooli omuno, n’oku kikooto abba mulyaaki. ¹¹ Ale nimutabbenge besigwa oku mamona atali mwikiriri, naani alibabikisya obuguuda obwa mazuma? ¹² Erate nimutabbenge besigwa, oku kintu kya muntu owondi, ekyaamu naani ali kikukumisya. ¹³ Ndoowo muwereza ayiinza kuweereza basaiza babiri; olwakubba abba alikyaawaku omwei, nayendya owondi; obate aligumira omwei nayakalyamu amaiso owondi. Timusobola kuweereza Kanca n’omamona. ¹⁴ Abafalisaayo abaali abataki bafeeza, ni bawuliire ebyo byoona byoona, ni bamusekeera. ¹⁵ Nabakoba ati niinywe abefoola abaikiriri omu maiso g’abantu,baitu oKanca ammaite emyooyo zanywe, olwakubba okugulumiira omu bantu kya muzizo omu maiso ga Kanca. ¹⁶ Amaeteka na baranji byabbairewo okwiika oku Yokaana: okuzwa nolwo enjiri ya Bukama bwa Kanca ebuulirwa, erate buli muntu abwingiramu lwa maani. ¹⁷ Baitu kyangu eigguru n’ensi okuwaawo, okusiinga ennukuta emwei eya mateeka okuwaawo. ¹⁸ buli muntu yeena yeena eyapekanga omukali waamwe, nasweera owondi, nka asianire, n’oyo ayasweeranga eyapekeibwe oibaamwei, nka asianire. ¹⁹ Ale waalowo omuntu omuguuda, eyazwaalanga olugoye olwafulungu ne bafuta ejisai, nk’asagarukanga buliizo omu kwesiim: ²⁰ erate, waalowo no mwooro eibara lyaamwe Laazaalo gwebabbasisyanga oku mulyango gwaame, eyaalina amabwa againji, ²¹ niyegombanga okulya ebyagwanga okuzwa oku meenza ya muguuda, erate embweene zaizanga ni zimukombeeranga amabwa. ²² Olwaikire, omooro naffa, naimulibwa abantumwa nibamuta omu kifubba kya Ibulaimu. N’omuguuda nafa, naziikibwa. ²³ Naimuca amaiso gaamwe omu magombe, nk’aali omu bulumi bwa maani, nalengera oIbulaimu alai n’oLaazaalo nk’aali omu kifubba kyaamwe. ²⁴ Nasimoora aigguru nakoba ati oitaange oIbulaimu nsasira,otume oLaazaalo, ainike ensonda ya lugalo lwaamwe omu maizzi, ampolyewolye olulumi lwange, olwakubba nkulumwa omu muuro gunu, ²⁵ OIbulaimu namukoba ati mwaana wange izukira, nka waweweibwenge ebisai omu bwoomi bwaamu, erate n’oLaazaalo atyo ebibbi byaamwei, baitu atubunu akusemeerwa, we okulumwa. ²⁶ Erate, okw’ebyo byoona byoona, akati waiswe nanywe walowo olukonko lulai olwatekeibwewo, abakwendya okuzwa enu jituli balemesebwenge okwiiza, erate balemesebwenge okuzwa eyo okwakalawo okwiiza enu jituli. ²⁷ Nakoba ati ale,nkwegayiriire, Itaange, omutume omu nnyumba ya Itaange; ²⁸ Olwakubba nta n’abaluganda bataanu abamanyisye baleme kwiiza boona omu kifo kinu ekirumu obulumi. ²⁹ Baitu oIbulaimu nakoba ati Baliina oMusa, na Baranji babawuurenge abo. ³⁰ Nakoba ati bbe, Itange Ibulaimu; baitu omwei oku baffu nalyaaba jibali balyendeka omwooyo. ³¹ Namukoba Ati nka nibatawuur Lukka Musa n’abaranji, erate gonze omwei oku baffu nali yimbooka, talibaikirizisya.