¹ Ale abawooza boona boona na baalina ebibbi baali nka bakumusembeera oYesu okumuwuliirya. ² Abafalisaayo, erate nabawandiiki ni bemulugunya nka bakukoba onu asemberya na baliina ebibbi, erate alya nabo. ³ OYesu nabasubiira olugeero lunu nka akukoba ati ⁴ Muntu ki oku nywe aliina etaama ekyikumi, nabulwaaku emwei, ataleka zidi ekyendai n’omwendai omu mutala, nasengeerya edi eyabuure okwiica nali jibona? ⁵ Ale najibona ajiteeka oku kibegabega kyaamwe nk’akusanyuka. ⁶ Naika ekka ayeta abanywaani, na balirwaana baamwe, nabakoba ati munsemerweku olwakubba mboine ontaama wange eyabbaire abuure. ⁷ Nkubakoba nti lyabbanga isanu omwigguru olw’oyo aliina ebibbi omwei ayendekere omwooyo okusiinga abaikiriri ekyendai n’omwendai abatayendya kwendeka mwooyo. ⁸ Obate mukali ki aliina erupiya eikumi nabulwaaku elupiya emwei, atakoleerya taala nayeya ennyumba, nanyinkira okuswagana okwiica nka ajiboine? ⁹ Najibona, ayeta abanywaani baamwe, nabalirwaana baamwe, nabakoba nti munsemerweku olwakubba nboine erupiya eyabbaire embureku. ¹⁰ Nkubakoba nti nimwo kityo libba esanu omu maiso ga bantumwa ba Kanca olw’oyo alinia ebibbi omwei ayendeka omwooyo. ¹¹ Baitu oYesu nabakoba ati waalowo omuntu ayaalina abataani baamwe babiri: ¹² omuto nakoba Oitaamwe nti taata, mpeerya omugabo gwa bintu ebinsaniire. Ale nabagabira ebya bwoomi byaamwe. ¹³ Ale oluzwanyuma lwannaku tizinji, oyo omwaana omuto nakumbbaania ebyaamwe byoona byoona, natambula nayaba omu nsi eyaalai; nasansanirya eyo ebintu byaamwe omu mpisa ezibbi. ¹⁴ Ale niyamaare okubirya byoona byoona, enzala ejinji neiza omu nsi eyo, natandika okubonabona. ¹⁵ Nayaba niyegaita n’omwaami owa mu nsi eyo; namusindika omukyaalo kyaamwe okulisyanga emberege, ¹⁶ niyegombanga okwiikuta ebisusu emberege zibyalyanga; ni watabbewo muntu okumuwa. ¹⁷ Baitu, niyeiremu, nakoba ati abaweereza bamekai abasasulwa Oitaange, abaikuta emmere nibalemwa, nanje nkufiira anu enzala! ¹⁸ Naimuka ninyaba ewa itaange, ni mukoba nti taata, nsisire eddi eigguru n’omu maiso gaamu; ¹⁹ tinkyasanira kwetebwa mwaana waamu; ntwaala ekka nk’omwei oku baweereza baamu abasasulwa. ²⁰ Naimuka, naiza ewa itaamwe. Baitu yaali nka akyaali alai, oitaamwe namulengera nairuka embiro, namugwa omu kifubba; namuvumbatira muno. ²¹ Oyo omwaana namukoba ati taata, nsisire edi eigguru n’omu maiso gaamu, tinkyasanira kwetebwa mwaana waamu. ²² Baitu, Oitaamwe nakoba abaiiru baamwe, mwaabe muleete mmangu olugoye olukusiinga zoona zoona, mulumuzwalikisye: mumute empeta oku ngalo, nenkaito omu magulu gaamwe. ²³ Muleete n,onyana omunoli mumwitte tulye tusagaruke: ²⁴ Olwakubba omwaana wange onu, yaali afiire, ayimbokere, yaali abuure, abonekere. Nibatandika okusagaruka. ²⁵ Baitu, omawana waamwe omukulu yaali mukyaalo; niyaizire nka yatera okwiika, nawuura engoma nenkende. ²⁶ Oku baiiru nayetaku omwei, namubuulya ni bibbaire. ²⁷ Namukoba ati omuganda waamu aizire; n’oiteewo amwitiire onyana owa masajju, olwakubba amuzwiire nka mwoomi. ²⁸ Baitu, nasunguwala natayendye kwingira: Oitaamwe nawuluka namwegayira, ²⁹ baitu nairamu nakoba Oitaamwe nti bona, emyaka zinu ziinji nka nkukuweereza, erate tingaananga kukola nakadooli kyonkobere; nanje ennaku zoona zoona tompangaku wade kabbuli kusagarukaku nabanywaani bange. ³⁰ Baitu, omwaana waamu oyo, eyaliire ebya bwoomi bwaamu, nabasiani, naizire, omwittiire onyana omuajju. ³¹ Ye namukoba ati mwaana wange, buliizo oli amwei nanjje, erate byoona byoona ebyange byaamu . ³² Baitu, okujaguzza no kusagaruka kwa nsonga, olwakubba omuganda waamu oyo, yaali afiire, ayimbokere, erate yaali abuare, abonekere.