¹ Ale olwaikire niyaingiire oku ssabbiiti omu nnyumba ya mukulu wa Bafalisaayo okulya emmere, ni bamutaaku amaiso. ² Erate, bona, walowo omuntu omu maiso gaamwe, eyaali omulwaire wa ntumbi. ³ OYesu nairamu nasimoola na Beegesya ba mateeka na Bafalisaayo nk’akukoba ati kisai okutamba oku ssabbiiti kanda tinimwo? ⁴ Baitu nibasirika, namukwaataku namutamba, namusiibula. ⁵ Nakoba ati naani okunywe aliina onkaina waamwe, obate onte waamwe nka egwiire omwizuba atajitoolamu ammangu ago oku ssabbiiti? ⁶ nibatasobole tte kumwiramu ebyo. ⁷ oYesu nabasubiira olugeero abo abayeteibwe niyaboine engeri jibakwelobolya ebifo bya mu maiso; nabakobaati ⁸ Omuntu nakwetanga oku mbaga yabugole, toikalanga mu kifo kya mu maiso, kaisi waleme kubbaawo muntu akusiingaku ekitinisya gwayetere, ⁹ noodi yeena eyakwetere, naiza nakukoba seguura onu; nolyooka n’otandika omu nsoni okutwaala ekifo kya mabega. ¹⁰ Baitu noyetebwanga oyabanga n’oikaara omu kifo kya mabega, eyakwetere naiza, okukobe nti munywaani wange igeera enu omu maiso, baitu nobba nekitinisya omu maiso gaabo boikaire nabo oku mmere. ¹¹ Olwakubba buli muntu yeena eyetumbiiza alitoowazibwa, n’oyo eyetoowaza alitumbisibwa. ¹² Erate, oYesu nakoba n’oyo eyamweetere ati n’osumbanga emmere eya kyamisana, obate eya kyaigolo, toyetanga banywaani baamu, gonze abaganda baamu, gonze ababika byaamu, gonze abaguuda abairamu, leke boona baleke kukweeta erate boona, niwabbaawo okukusasula. ¹³ Baitu, n’osumbanga embaga oyetanga abooro, abacencegere, nabaigali ba maiso: ¹⁴ erate oliweebwa omukisa, olwakubba tibaliina kyakukusasula. olwakubba okwaaba kusasulwa omu kuyimbooka kwa baikiriri. ¹⁵ Ale omwe okwaabo abaali baikaire amwei naye oku mmere, niyawuliire ebyo, namukoba ati aliina omukisa aliriira emmere omu Bukama bwa Kanca. ¹⁶ Baitu, namukoba waalowo omuntu ayasumbire embaga ejikooto, nayeta abantu baiinji: ¹⁷ natuma omwiru waamwe nka obwiire bwa mbaga bwikire okukoba beyayetebwe nti mwiize, olwakubba biweire okutekebwatekebwa. ¹⁸ Boona boona n’omwooyo gumwei nibatandika okwegaiira okusaasirwa, eyekereire namukoba ati nguure olusuku, kinsaniire okwimuka okwaaba okulubona; nkwegairire nsasira. ¹⁹ N’owondi, nakoba nguure emigogo za nte itaanu, okuzigezesya; nkwegairiire nsasira. ²⁰ N’owondi nakoba ati mbandwire omukali, nikyo nzwiire nnemeera okwiiza. ²¹ Ale omwiiru naizza nakobera omukama waamwe ebyo. ale omukama wa nnyumba nagongera nakoba omwiiru waamwe nti wuluka mmangu oyabe omu mazira n’omu kibuga, oleete abooro, nabacencegere, nabaigali ba maiso nabakuwenyera. ²² Omwiiru nakoba omukama waamwe nti kyokobere kimaare okukolebwa, baitu wakyalowo ebifo. ²³ Omukama waamwe nakoba omwiiru ati wuluka oyabe omu mazira no mubuzira obakake okwiingira ennyumba yange eizule. ²⁴ Olwakubba, nkubakoba nti Baddi abayeteibwe, ndoowo n’omwei aliroza oku mbaga yange. ²⁵ Ale ebibbuura bikooto byaali bikwaaba naye; nayinduka nabakoba ati ²⁶ Omuntu niyaizanga jendi natcaawe Itaamwe, no maamwe, n’abaana baamwen nabangande, n’abonyoko baamwe, erate n’obwoomi bwaamwe ye, tiyasobolenge kubba mwegesya wange. ²⁷ Buli ataimulenge musaalabba gwaamwe ye, , naiza emabega wange, tiyasobolenge kubba mwegesya wange. ²⁸ Olwakubba,naana oku nywe nka akwendya okomboka ennyumba, atasooka kwiikala nabaliira ebikwetagisya okomboka enyumba eyo okwiika okuwa? ²⁹ Baitu, nka amaare okutaawo omusinji natajimaliirye, boona boona ababona batandika okumusekeera, ³⁰ nka bakukoba bati omuntu onu yasokere okomboka natamaliirye. ³¹ Baitu, mukama ki nabba nka akwaaba okulutalo natasoke kwikaara kuteesa bigambo, obate ayiinza n’omutwaalo ogumwei okulwaana n’emitwaalo eibiri? ³² Obate nka tinikyo, oddi nabba nk’akyaali alai omuno, atuma abakwenda nasaba okugaitangana. ³³ Ale nimwo kityo omuntu yeena yeena oku nywe aterekeryenge byoona byalina,tiyasobolenge kubba mwegesya wange. ³⁴ Ale omunyu gusai,baitu omunyu niguwaamu omugga, muliryaamu ki? ³⁵ Tigusaanira musiri, gonze okugubunga, bagunaga nzai. Aliina amatwi agakuwuura, awuure.