¹ Ale omu biro ebyo waalowo abantu abaali awo abamukobeire eby’Aba galiraaya badi, oPiraato beyatabuliire eisagama lyaabwe ne ssaddaaka zaabwe. ² oYesu nairamu nabakoba ati mukulowooza nka Abagaliraaya abo baali basiisi okusiinga Abagaliraaya boona boona, olwakubba bawaraliibwe batyo? ³ nkubakoba nti tinimwo kityo naye ni mutenyenya mulizikira nyenaa mutyo? ⁴ Obate, baddi eikumi n’omunaanai ekitikiro ekya mu Sirowamu be kyagwiireku nikibaitta, mulowooza baali bakoli babibbi okusiinga abantu boona boona abaali omu Yerusalemi? ⁵ nkubakoba nti tinimwo kityo: baitu ni mutenenya mulizikiira. ⁶ oYesu nasimoola olugeero lunu nti waalowo omuntu eyaalina omutiini ogwaali gusimbiibwe omu mulusuku olw’amizabbibu: naiza nka akutolyaaku ebibala natabibona. ⁷ Nakoba omulumi ati bona, olwa leero emyaaka isatu nka nkwiiza okutoolya ebibala oku mutiini gunu, nintabibona, guteme gukumala kifo kya bwereere. ⁸ Yeena nairamu namukoba ati mukama wange, guleke omu mwaaka gunu, erate ngutemere, nguteeku ebisai; ⁹ Nigulibala oluzwanyuma kisai; baitu, nikibba nka tinikyo, oligutema. ¹⁰ Ale oYesu oku lunnaku lwa ssabiitti niyaali nka akwegesya omu limwe oku makumbbaaniro, ¹¹ erate bona, omukali eyaali yakalwara odaimooni owa bunaki emyaaka ikumi na munaanai; nka asaraire, nka tasobola kwegolola na kadoli. ¹² Ale oYesu niyamuboine, na mweeta ati omukali, osandabwiirwe obulwaire bwaamu. ¹³ Namutaaku emikono ammangu ago nabba mugolokoki, nayangiriza oKanca. ¹⁴ Baitu, omukulu waikumbbaaniro niyanyiigire olwakubba oYesu atambire omuntu oku ssabbiiti, nairamu nakoba ekibbuura ati walowo ennaku omukaaga ezisaine oku korangamu emirumo: ale mwizirenge okweezo okutambibwanga, baitu tiku lunnaku lwa ssabbiiti. ¹⁵ Baitu, Omukama waiswe namwiramu namukoba ati Bakiweweite, buli omwei oku nywe oku lunnaku lwa ssabbiiti tasandabula nte waamwei obate nkaina waamwei omu kisibo najitwaala okujinywesya? ¹⁶ Erate oyo omwaana wa Ibulayimu eyabbuwiibwe osetaani, bona, emyaaka ikkumi n’amunaanai, tasaniire kusindabulwa omubuibbuwe obwo oku lunnaku lwa ssabbiiti? ¹⁷ Ale niyaali nka akubaza ebyo, abananzugu baamwe boona boona ni baswaala, n’ekibbuura kyoona kyoona ni basemeerwa olwa byoona ebya kitinisya eby’akoleibwe ye. ¹⁸ Nikyo oYesu yazwiire okoba ati Obukama bwa Kanca bwiisana na ki? erate nabwiisanisya ki? ¹⁹ Bwiisana akampeke aka kalidaali, omuntu ke yakwaite na kanaga omu numiro yaamwe, ni kakula ni kabba omusaale, ennyonyi eza mwibbanga ni zikkala oku matagi gaagwo. ²⁰ Erate, nakoba ati Obukama bwa Kanca nabwiisanisya ki? ²¹ Bwiisana ekitubisisya,omukali kiyakwaite nakikweeka omu biibo bisatu ebya bwiita, bwoona boona nibutumbeera. ²² Nikyo oYesu natambuura omu bibuga n’omu mbuga nka akwegesya nka akwaaba e Yerusaalemi. ²³ Omuntu namukoba ati Mukama wange, badooli abalicungurwa? yeena nabakoba ati ²⁴ Mufubenge okwingira omu mulyango ogufundi, olwakubba nkubakoba nti baiinji abalitoolya okwingira, baitu tibalisobola. ²⁵ Omukama wa nnyumba nalimala okwimuka naigalawo olwiigi, ni mwekeera okwemeera enzai n’okukonkona olwiigi, nka mukukoba muti Mukama waise, twiguurewo; ale alibairamu ati timbamaite ji mukuzwa; ²⁶ ni mulyooka ni mutandika okukoba muti twaliranga, erate twanyweranga omu maiso gaamwe, erate wayegesyanga omu nzira zaiswe. ²⁷ Ale alikoba ati nkubakoba nti timaite ji mukuzwa: muzwe wendi nyweena abakoore ebitali byabwikiriri. ²⁸ Eyo walibbaayo okukunga no kwenena amaino, ni muli bona, oIbulayimu n’oIsaaka n’oYakobo n’abaranji boona omu Bukama bwa Kanca. ²⁹ Baliiza nka bakuzwa ebuzwaisana ne bugwaisana, no bukiika bwa gumoso no bukiika bwa guryo, Lukka baliikala omu Bukama bwa Kanca. ³⁰ Erate, bona, walowo abaluzwanyuma, abalyekeera erate, walowo abalyekeera abalibba abaluzwanyuma. ³¹ Omu kiseera ekyo Abafalisaayo ni baizza, ni bamukoba bati Zwaani, weyabire: olwakubba oKerode akwendya oku kwitta. ³² oYesu nabakoba ati mwaabe mu mukobe enkerettanyi eyo muti bona, nkupeka odaimooni nkutamba, abantu, olwa leero ne mambya n’oku lunnaku olwa kastu ndikyiirya omulumo gwange. ³³ Baitu kisaniire okutambulaku olwa leero ne mambya, n’olukwiiraku, olwakubba tikisoboka muranji okuzikiira enzai wa Yerusaalemi. ³⁴ Wwe Yerusaalemi, Yerusalemi aitta abaranji, akubba amabbaale abatumibwa jaali! emirundi emekai nka nkwendya okukumbbaania abaana baamu, nk’onkoko na kumbbaania obwaana bwaamwe omu bipapa byaamwe, Baitu timwaikirize! ³⁵ Bona, ennyumba yanywe esigaire kifulukwa, erate nkubakoba nti timulimbona, okwiica ni mulikoba nti aweweibwe omukisa aizza omwibara lya Kanca.