¹ Omu biseera ebyo abantu bakibbuura bukumi na bukumi ni baali bakumbbaine n’okuniinangana nka bakuniinangana, nasookera oku beegereswa baamweo okubakoba ati mwekumenge ekitumbisisya ky’Abafalisaayo na bakiweweita. ² Baitu, ndoowo ekyaswekeibwe ekitaliswekulibwa; gonze ekyabbisiibwe ekitalimanyibwa. ³ Ale byoona byoona bi mwaali mubaziire omu kirikiirya biriwuurwa omwisana; nekyo ki mwaali mubaziire omu kaama omu kisenge kiriwuurwa kukasolya ka nnyumba. ⁴ Erate, nkubakoba nywe, banywaani bange, nti timutiinanga abo abaitta omubiri, oluzaanyuma nka tibaliina kya kukola okusiingawo. ⁵ Baitu, nabakoba gwe mwatiinanga: mutiinenge oyo, namala okwitta aliina obuyiinza okunaga omu Ggeyeenna, nimwo mbbe, nkubakoba nti oyo, nigwo mubbe mutiinenge ⁶ Enkalyaluya eitaanu tibazitunda mapeesa abiri? baitu ndoowo nemwei okweezo eyerabirwa omu maiso ga Kanca. ⁷ Baitu, neisoke erya kumutwe zanwye zibaliibwe zoona zoona. Timutiinanga: nywe musiinga enkalyaluya eziinji ⁸ Erate, nkubakoba buli alinjuura omu maiso ga bantu, oyo omwaana wa muntu yeena ali mwatuura omu maiso ga bantumwa ba Kanca. ⁹ Baitu, aneegaanira omu maiso ga bantu, alyegaanirwa omu maiso ga bantumwa ba Kanca. ¹⁰ Nabuli muntu asimoola ekigambo oku mwaana wa muntu kirimuganyirwa: baitu oyo alityoboola omwooyo omwikiiri taliganyirwa. ¹¹ Erate, ni ba batwalanga omu makumbbaniro, needi omu bamasaza, nabaliina obuyiinza timweralikiranga ki mwairamu, obate ki mwasimoola; ¹² Olwakubba omwoyo omwikiiri yabeegesyanga omu kiseera ekyo ebibasaniire okusimoola. ¹³ Ale omuntu owa mu kibbuura namukoba ati omwegesya, koba omuganda wange agabane nanje ebya busika byaiswe. ¹⁴ Baitu oYesu ye namukoba ati omuntu, naani eyantairewo okubba omulamuli, obate omugabi waanywe? ¹⁵ Nabakoba ati mulole, mwekumenge okwegomba koona koona; olwakubba obwoomi bwa muntu tinibyo ebintu ebiinji byabba nabyo. ¹⁶ oYesu nabasubiira olugeero, nka akukoba ati Waalowo omuntu omuguuda enddumiro yaamwe neyerya: ¹⁷ nalowooza omunda yaamwe nka akukoba ati nakola ntyai, olwakubba tinnina wenkukumbbanirya bibala byange? ¹⁸ nakoba ati nakola nti: nawenda ebideero byange ninyomboka ebindi ebisiinga obukooto; ni nkubbanirya omwo emmere yange ejikalu yoona yoona n’ebintu byange. ¹⁹ Ndikoba emeeme yange nti emeeme, oliina ebintu biinji ebibikiibwe ebya myaaka eziinj;i wummula, olye, onywe, osagaruke. ²⁰ Baitu, oKanca namukoba ati musirusiru we, omu bwiire bunu, emeeme yaamu bajikutolaku; ale ebintu byotegekere byaabba bya naani? ²¹ Nimwo atyo nali eyebiikira obuguuda, baitu nka timuguuda edi oKanca. ²² oYesu nakoba abeegesya baamwe ati nikyo nzwa mbakoba nti timweralikiiranga bwoomi bwanywe, ki mwalya, gonze emibiri zanywe, ki mwazwaala. ²³ Olwakubba, obwoomi busiinga emmere, n’omubiri gusiinga ebya kuzwaala. ²⁴ mulowooze abanamungoona tibasigga, erate tibakesa; tibaliina ibiikiro,gonze ekideero; erate oKanca abaliisya; nywe timusiinga nnyonyi mirundi ziinji? ²⁵ Naani oku nywe niyeralikiira ayiinza okwongera oku bukulu bwaamwe omukono ogumwei? ²⁶ Ale nimutayiinza ekisiinga obudooli, kiki ekiberalikiirya ebindi? ²⁷ Mubone, Lukka amalanga ni gamera: tigakola mulumo, erate tigatungubwamu lugoye; Baitu nkubakoba nti no Sulemaani omu kitinisya kyaamwe kyoona kyoona, tayazwaalanga erimwe okwaago. ²⁸ Baitu, oKanca nazwaalikisya atyo ekisiko, ekibbwaawo olwa leero emambya ni bakinaga omu kikoomi kya muuro, talisiinga muno okuzwaalikisya nywe abaliina okwikiriza okudooli. ²⁹ Naanywe timuswagananga ki mwaalya obate ki mwanywa, erate timubbanga na myooyo ejitankanatankana. ³⁰ Olwakubba ebintu ebyo byoona byoona biswaganibwa ammanga aga nsi: baitu Oitaanywe amaite nka ebyo mubyendya. ³¹ Baitu muswaage Obukama bwaamwe, n’ebintu ebyo mulibyongerwaaku. ³² Totiinanga, we olugo oludooli; olwakubba Oitaanwye asiima okubawa nywe Obukama. ³³ Mutundenge bi muli nabyo, muwengeyo edi abooro, mwetungirenge ebikapu ebitakairika, obuguuda obutawaawo obwa mwigguru; omwiibbi jataingira, nebinyeeze jebitabisiisira. ³⁴ Olwakubba obuguuda bwanywe jibubba ne myooyo zaanywe nijo zibba. ³⁵ Mwesibenge ebikekera omunkende zaanywe, netaala zanywe nka zikwaaka; ³⁶ Nanywe benyenere mubbenge nka abantu abalindiira Omukama waabwe, waalirira nka akuzwa oku mbaga yabugole; naliiza nakoona oku lwiji, bamwiguurawo mmangu ago. ³⁷ Baliina omukisa abairu abo, omukama waabwe naliiza balyaaja nka bakubonia; Amzuma nkubakoba nti alyesiba nabaikalisya oku mmere, naiza nabaweereza. ³⁸ Ale naliiza omu kisisimuko kya kabiri, obate omu kya kasatu, nabaaja atyo, baliina omukisa abairu abo. ³⁹ Baitu, mweteje kinu, nka omukama wa nnyumba siinga amanya ekiseera omwiibbi weyaizira yandibonerye, tiyaali lekere nnyumba yaamwei kumenyebwa. ⁴⁰ Nanywe mweteeketeekenge: olwakubba omwana wa muntu aliizira omu kiseera kimutasuubira. ⁴¹ OPeetero nakoba ati Mukama waiswe, olugeero luni olugereire iswe, kanda boona boona? ⁴² Omukama waiswe nakoba ati ale naani oyo omubiiki omwesigwa owac magezi, omukama waamwe gwa lirekera aba munnyumba yaamwe, okubagabiranga omugabo gwaabwe ogwa mmere omu kiseera kyaayo. ⁴³ Aliina omukisa omwiru oyo, omukama waamwe naliiza gwa lyaaja nka akukola atyo. ⁴⁴ Amazuma, nkubakobera nka alimulekera byoona byoona byalinabyo. ⁴⁵ Baitu omwiru oyo nalibaza omu mwooyo gwaamwe nti omukama wange alwiire okwiiza;natandika okukubba abairu na bazaana, n’okulya, n’okunywa, n’okutamiira; ⁴⁶ ale omukama wa mwiiru oyo, aliiza oku lunnaku lw’atamusuubira, no mukiseera kya tamaite, alimutematema alimuweerya omugabo gwamwe amwei na bataikiriza. ⁴⁷ N’omwiiru oyo eyetejerye omukama waamwe kiyayenderye, natategeka nataikye kiyayenderye, ali kubbwa ziiji; ⁴⁸ Baitu, atamaite nakola ebisaniire Lukka okumukubisya alikubbwa zidooli; nabuli eyaweweibwe ebiinji, aliswaganibwaaku bianji; n’oyo gwe babikisirye ebiinji, niye gwe balisiinga okubuulya ebinji. ⁴⁹ Naizira kunaga muuro ku nsi; obate nka gwo gukwaaka nkwendya ki? ⁵⁰ Baitu innina okubatizibwa kwe ndibatizibwa; nanje nkuwaralibwa okwiica nikulikiira! ⁵¹ Mulowooza nka naizire kuleeta mirembe ku nsi? nkubakoba nti bbe; wazira okwawukania mbbe; ⁵² Olwakubba okutandika ati walibbaawo abataanu omu nnyumba emwei nka bawukanire, abasatu na babiri, erate ababiri nabastu. ⁵³ balyawukana, Oitaamwe no mwaana waamwe, erate omwaana n’Oitaamwe; omaamwe no mwaala waamwe,erate omwaala n’omaamwe; erate onyubyaala n’omukamwaana waamwe,erate omukamwaana n’onnyubyaala waamwe. ⁵⁴ oYesu nakoba ebibbuura byoona ati, nimubona ekicu nka kikutambula ebugwaisana, ammangu ago mukoba nti oikendi akwaaba kutonya, erate nimwo kibba kityo. ⁵⁵ Ni mubona ompungo nka akuwuluka ebuyinduka guryo, mukoba nti yaaba mpiita, erate nimwo kibba kityo. ⁵⁶ Bakiweweita, mu maite okukebera ekisani ky’ansi n’eigguru, baitu kiki ekibagaana okumanya okukebera obwiire bunu? ⁵⁷ Erate, nanywe nywenkai ekibagaana kiki okusala eby’ansonga? ⁵⁸ Olwakubba nobba okwaaba n’omuntu akuloopa ewa mulamuli, onyinkiranga okugaitangana nakujunaana; aleme okukuwaruura ewa Mwikirwaku, no Mwikirwaku nakuwa omujwaaka no mujwaka nakunaga omunkomyo. ⁵⁹ Nkukukoba nti tolizwa omwo nakadooli okwiica lolisasuura kimwei buli mpiiya.