¹ Ale olwaikire oku lunnaku olumwei okweezo, oYesu yaali nka akwegasya abantu Omwiramyo, nka akukoba enjiri, abakabona abakulu, n’abawandiiki amwei n’abakaire ni bamwiizira; ² nibabaza nka bakukoba bati tukobere; buyiinza ki obukukolesya binu? erate naani eyakuwaire obuyiinza obwo? ³ Nairamu n’abakoba ati njeena kambabuulye ekigambo kimwei; munkobere: ⁴ okubatiza kwa Yokaana kwazwiire mwigguru, obate mu bantu? ⁵ Nibateesa bonkai n’abonkai nka bakukoba bati nitwakoba nka nti kwazwiire mwigguru; yakoba ati kiki ekyabagaine okumwikiriza? ⁶ Baitu, nitwakoba tuti kwazwiire mu bantu; abantu boona baatukubba amabbaale: olwakubba baikiriza kimwei oYokaana okubba omuranji. ⁷ Nibairamu bati tibamaite ji kwazwiire. ⁸ OYesu nabakoba ati njeena tinabakobere nywe obuyiinza obunkolesya binu jibwazwiire. ⁹ Niyekeera okukobera abantu olugeero lunu nti omuntu omwei yasimbire olusuku lwa Mizabbibu, nalulekera abalumi, nayaba omu nsi ejindi n’alwaayo. ¹⁰ Ale omu biro bya mwaaka eby’akukungula abalumi nabatumira omwiiru, bamuweerye oku bibala eby’amulusuku lw’amizabbibu: baitu abalumi nibamukubba, ni bamusindika nka taalina kintu. ¹¹ Nayongera okutuma omwiiru owondi; n’oyo nibamukubba, nibamuswaaza, nibamusindika nka taalina kintu. ¹² Nayongera natuma owa kasatu: n’oyo yeena nibamusumuta, nibamugoba. ¹³ Oyo omukama wa lusuku lw’amizabbibu nakoba ati nakola ntyai? Ka ntume omwaana wange gwenyedya omuno: obate oyo bali muwa ekitinisya. ¹⁴ Baitu, abalumi ni bamubwoine, ni bateesa bonkai n’abonkai, nka bakukoba bati Onu niye musika: tumwitte, obusika bubbe bwaiswe. ¹⁵ Ni bamupeka omu lusuku lw’amizabbibu, nibamwitta. Ale olibakola atyai omukama wa lusuku lw’amizabbibu? ¹⁶ Aliiza nazikiirya abalumi abo, n’olusuku lw’amizabbibu aliluweerya abandi. Ni bawuliire ebyo, nibakoba bati bireke kubbaawo. ¹⁷ Baitu oYesu nabaloleera nakoba ati ale kiki kinu ekyawandikiibwe kiti Eibbable abomboki libagaine, eryo niryo eryafookere omutwe gwa ku nsonda. ¹⁸ Buli aggwa okwibbbale eryo, aliwendekawendeka; baitu oyo gwerigwaaku, lirimufoola nka ocucu. ¹⁹ Ale abawandiiki n’abakabona abakulu ni basala amagezi oku mukwaata obwiire obwo, ni batiina abantu; olwakubba betejere nka okubo nikwo agereire olugeero olwo. ²⁰ Nibamubonenkeerya, ni batuma abakumukeita nka befoire abaikiriri, basinziire oku bigambo bysamwei, basobole okumuwaayo edi okufuga kwa waisaza nedi obuyiinza bwaamwe. ²¹ Ni bamubuulya, nka bakukoba bati Omwegesya, tumaite nka osimoola erate nk’oyegesya mananu, erate tososola mu bantu, baitu oyegesya mananu enzira ya Kanca: ²² Kisai iswei okuwanga oKaisaali omusolo, obate tinimwo? ²³ Baitu oYesu niyeteja obukumpania bwaabwe, nabakoba ati mundange eddinaali. ²⁴ ekiisani ekiruku n’obuwandiike bwa naani? bo nibakoba bati bya Kaisaali. ²⁵ oYesu nabakoba ati ale ebya Kaisaali mu musasulenge oKaisaali, n’ebya Kanca mu musasulenge oKanca. ²⁶ Nibatasobole kutoola nsonga mu kigambo ekyo omu maiso ga bantu, ni nibewuunya kyairemu, nibasirika. ²⁷ Abasaddukaayo abamwe nibaiza jaali, abakoba nti ndoowo kuzukira; nibamubuulya, ²⁸ nka bakukoba bati Omwegesya, oMusa yatuwandikiire nti omuganda wa muntu naffa nka aliina omukali, nka taalina mwaana, omugade awase omukali oyo airiryeewo omugande eibyaire. ²⁹ Ale waalowo ab’aluganda musanjju, eyekereire nawasa omukali, naffa nka tabyaire mwaana; ³⁰ n,owakabiri; ³¹ n’owakasatu n’amuwasa; erate batyo baddi omusanjju ni baffa, ni batalekewo baana. ³² Ekyaiririire n'omukali naffa. ³³ Ale omu kuyimbooka alibba mukali wa naani okwaabo? Olwakubba, boona boona omusanjju bamubandwire. ³⁴ OYesu nabakoba ati abaana ba nsi enu babandula, bafumbirwa. ³⁵ Baitu, badi abaikiriziibwe okwiika omu nsi eyo n’omukuyimbooka kwamu baffu, tibabandula, erate tibasumbirwa. ³⁶ Olwakubba n’okuffa, tibayiinza kuffa tte: Olwakubba bali nka abantumwa; erate nibo baana ba Kanca, nka nibali abaana ba kuyimbooka. ³⁷ Okumanya nka abaffu baliyimbooka, n’oMusa yakirangire oku kisaka niyamwetere Omukama oKanca wa Ibulaimu,erate oKanca wa Isaaka,erate oKanca wa oYakobo. ³⁸ Baitu, ye ti Kanca wa baffu, baitu wa bwoomi: olwakubba boona boona babba bwoomi ku bwaamwe. ³⁹ Abawandiiki abamwe nibairamu, nka bakukoba bati mwegesya osimoire kusai . ⁴⁰ Olwakubba tibayiinzire ku mubuulya kigambo kyoona kyoona tte. ⁴¹ oYesu Nabakoba ati babaza batyai nti oKristo niye mwaana wa Daudi? ⁴² Olwakubba oDaudi omwenyenere abaza omu kitabo kya Zabbuli nti Omukama yakobere Omukama wange ati ikala oku mukono gwange oguryo, ⁴³ okwica nindifoola abananzugu baamu entebe ya magulu gaamu. ⁴⁴ Odaudi amweeta Mukama waamwe, ale mwaana waamwe atyai? ⁴⁵ Ale abantu boona boona nibabbaire nka bakumuwuliirya, nakoba abeegesya baamwe ati ⁴⁶ mwekumenge abawandiiki abendya okutamburanga omu Lukka ngoye ezirai, abendya okulamucibwanga omu butale, n’entebe za mu maiso omu makunbbaniro, n’ebifo ebya kitinisya oku mbaga. ⁴⁷ Abanyaga amayumba ga banamwandu, abasaba omuno omu bukuyikuyi: abo balisaarwa omusango ogusiingayo obukooto.