¹ Omu mwaaka ogw'ekereire ogwa Daliyo omwaana wa Akaswero owaibyaire ly'Abameedi eyaliire obukama bwa bakaludaaya: ² omu mwaaka ogw'ekereire omu miijo zaamwe nje oDanyeri,ninaali nkusoma ebitabo ebirumu ekigambo kya mukama,nka nikyaswekuliire oNabbi oYeremiya,nineja nka walibbawo emyaaka nsanju okwiica okuzika kwa Yerusaalemi nikulikoma. ³ Ninyindula amaiso gange edi Omukama okanca,okumuswaaga nka nkusaba erate, nka nkwegayiira,nka nkusiiba enzala erate, nka nzwaire obutiicetiice n'okwiikala omwikoke. ⁴ Ni nsaba Omukama oKanca wange ninyatula ebibbi byaiswe.Ninsimoola nti Mukama,oKanca oli mukulu erate,w'antiisa,aikiriirya endagaano n'okusaasira edi abo abamwendya n'abakwaata amateka gaamu. ⁵ Twasiisire erate, twakoore aby'abugwaagwa n'okujeema, nka tukyuuka okuleka ebiragiro byaamu n'amateeka gaamu. ⁶ Baitu, titwawuliriire bairu baamu aba Nabbi abasimoire omwibara lyaamu edi abakama baiswe,abakulembeze baiswe,abaizeiza baiswe,erate, n'abantu boona boona aba mu nsi ⁷ Edi we,Mukama, obwikiriiri nibo bwaamu,baitu edi iswe, amaiso okukwatibwa ensoni,nk'aati,olwakubba abantu ba Yuda erate,naabo ababba omu Yerusaalemi, n'oIsraeri.Muni nimwo muli abali okumpi naalai omu nsi zoona zoona ziwabagobeiremu.olwa kusiisa ku bakoore jooli. ⁸ Mukama amaiso okukwatibwa ensoni nikwo kwaiswe,abakama baiswe,abakulembeze baiswe, n'abaizeza baiswa,olwakubba twasiisire jooli. ⁹ Omukama oKanca waiswe ye aliina okusaasire n'okusonyiwa,olwakubba twamujemeire. ¹⁰ Erate,titwawuliire iroboozi lya Mukama oKanca waiswe,okutambuura omu mateeka gaamwe giyateire omu maiso gaiswe okwakala omu bairu baamwe aba Nabbi. ¹¹ Nimwo mbbe,oIsraire yeena yeena asoberye amateeka gaamu erate,akyuukire aleme kugondera iroboozi lyaamu.Okukolimirwa,n'ekirairo ebyawandikiibwe omu mateeka ga Musa omwiru waa Kanca,bitusukiibweku,olwabba twasiisire jooli. ¹² Omukama agumirye ebigambo biyasimoire jituli erate,edi abafuzi baiswe,niyatuletereku obubbi obukooto.Olwakubba,ansi waigguru lyoona lyoona tikikolebwanga nka nikyakoleibwe oku Yerusaalemi. ¹³ Nka nikyawandikiibwe omu mateeka ga Musa,nimwo kityo obubbi boona boona bwatwizireku.Erate,baitu tukyaali kusaba kisa kya Mukama oKanca waiswe,leke tuleke ebikolwa ebitaali bya bwikiriiri erate, tubbe n'amagezi omu mazuma goona goona. ¹⁴ Omukama nikyo yazwiire aloleera obubbi,n'abutuletaku:olwakubba Omukama oKanca waiswe mwikiriiri omu bikolwa byamwe byoona byoona byakola,naiswe titwawuliire iroboozi lyamwe. ¹⁵ Atubuni,Mukama oKanca waiswe,eyayire abantu baamu omu Misiri n'omukono ogw'amaani erate, eyefuniire ekitinisya,nka leero: twasiisire ,twakoore kubbi. ¹⁶ Mukama, nk'obwikiriiri bwaamu boona boona ni buli,obusungu bwaamu n'obukambwe bukyuuke buzwe oku kibuga kyaamu oYerusaalemi,olusozi lwaamu olwikiiri:olwakubba olwa kusiisa kwaiswe,n'obutali bwikiriiri bwa baizeiza baiswe,oYerusaalemi n'abantu baamu bafookere ekizume edi abo abatwetoloire. ¹⁷ Atubuni,Kanca waiswe,wuura okusaba kw'amwiru waamu,n'okwegayiira kwaamwe,erate oku bwa Mukama,oyakisye amaiso gaamu awaikiriiriwaamu awazikire. ¹⁸ Mukzma wange,tegga omutwi kwaamu,owuure:olibulye amaiso gaamu,ololeere ebyaiswe ebyazikire,n'ekibuga ekitumiibwa eibara lyaamu:olwakubba,tituleeta kwegayiira kwaiswe omu maiso gaamu olw'abwikiriiri bwaiswe,wazira olwa kusaasira kwaamu okwiinji. ¹⁹ Mukama,wuura: Mukama,sonyiwa: Mukama wuura okole: otalwaawo: oku bwaamu wenkai,Mukama wange,olwakubba ekibuga kyaamu n'abantu baamu batumiibwe eibara lyaamu. ²⁰ Ale ninaali nkusimoola erate,nka nkusaba,erate nka nkwatula okusiisa kwange n'okusiisa kw'abantu bange oIsrairi,erate nka nkuleeta okwegayiira kwange omu maiso ga Mukama oKanca wange okulwa lusozi olwikiiri olwa Kanca wange: ²¹ Nimwo mbbe,ninaali nkusimoola omu kusaba,omusaiza oGabulyeri nigo naboine omwebyo binayoleseibye omukwekeera,nagulukiibwe mangu,n'ankomaku nka omu kiseera ekya saaddaaka eyakasweeko. ²² N'ampa okweteja n'ankoba ati,Danyeri,atubuni,nyizire okukugeziwalya omu kweteja. ²³ Niwasokere okwegayiira,ekiragiro ni kiwuluka,nanje nyizire okukukobera:olwakubba oli mwende munno:ale lowooza ekigambo ekyo, weteje biwayoleseibwe. ²⁴ Esabbiiti nsanju na musanju ziterebwewo abantu baamu n'ekibuga kyaamu ekikiiri okukomya okusiisa,n'okumalawo okukola okubbi,n'okwingirya obwikiriiri obutaliwaawo,n'oktta akabonesyo okw'ebyo biwayoleseibwe n'okwebyo ebyalangiibwe,n'okusuka amafuta okw'oyo asiinga obwikiiri. ²⁵ Ale mmanya wetejerye kimwe nka okuzwa ekiragiro nikyawulukire okwiryaawo n'okomboka oYerusaalemi okwiica okwooyo asukibweeku amafuta,omukulembeze,walibbaawo essabiiti musanju,erate walibbaawo esabbiiti nkaaga n'aibiri,nikyombokebwa tte,n'enzira,n'olusalosalo,gonze omu biro byakutawaana ²⁶ Erate,esabbiiti nkaaga naibiri nka zakairewo,oyo asukiibweku amafuta balimuzikiirya,erate,talibba n'akintu.N'eiye lya mukulembeze akwiiza lirizikiirya ekibuga n'awaikiiri:nenkomeero yaakyo eriiza n'okwanzala kwa maizi.erate,okwiica oku nkomeero walibbaawo entalo,okuzikiirya okwalagiirwe. ²⁷ Erate alikola endagaano ejigumu n'abantu okumala esabbiiti emwei: n'omukitundu ekya sabbiiti alikomya essaddaaka n'ebiwebwaayo,n'oku kipapa eky'abyamuzizo kuliiziraku omuzikiirya,okwiica ebyo byoona byoona okwikiriira n'okuzikiirya,okwo nikwo kwalagiirwe,obusungu bulisukibwa okw'oyo azikiirya.