¹ OBerusazza omukama nasumbira abaami baamwe lukumi embaga ejikooto,nanywera omu maiso gaabo olukumi omwenge. ² OBerusazza niyakombembere oku mwenge,nalagira okuleeta ebintu ebya zaabu n'ebya ffeeza oNebukaduneeza oitaamwe biyatweire omu yeekaalu eyaali omu Yerusaalemi:omukama n'abaami baamwe,abakali baamwe, n'abazaana baamwe babinywiremu. ³ Ale ni baleeta ebintu ebya zaabu eby'atoleibwe omu yeekaalu,ennyumba ya Kanca,omu Yerusaalemi.Omukama,aabaami baamwe,abakali baamwe n'abazaana baamwe, ni babinyweramu. ⁴ Ni banywa omwenge,ni bayangiriza abakanca aba zaabu n'aba ffeeza,aba bikomo,aba byooma,aba misaale,n'abamabbaale. ⁵ Omu bwiire obo niwaboneka engalo za mukono gwa muntu,niziwandiika omu maiso gaitaala okwitakali lya ku kisenge kya lubiri:omukama nabona ekitundu kya mukono nga kikuwndiika. ⁶ Ale amaiso ga mukama nigakyusibwa jaali,n'ebirowoozo byaamwe ni bimweralikiirya,n'amagulu gaamwe nigatamuwaniira,erate, n'amajwi gaamwe nigakubbangana. ⁷ Omukama nabazira aigguru okwingirya abakoba okubaza nabafu,Abakaludaaya,n'abalaguli,Omukama nakoba abagezigezi aba Babulooni ati," buli eyasoma okuwandiika kunu,erate eyandanga amakuru gaakwo,yazwalikisibwa olw'afulungu,erate alibba n'olujegere lwa zaabu omwikoti lyaamwe,erate alibba mukulu owa kasatu omu bukama." ⁸ Ale nimwingira abagezigezi ba mukama,baitu ni batasobole kusoma kuwandiika okwo,gonze okutegeeza omukama amakuru. ⁹ Omukama oBaerusazza niyeralikira muno,amaiso gaamwe nigakyusibwa jaali:abaami baamwe ni babulwa amagezi. ¹⁰ Ale okajwejwete naigira omu nnyumba ya mbaga olwa bigambo bya mukama n'abaami baamwe;okajwejwete nabaza ati mukama,obbenge omwoomi emirembe seregenyi:ebirowoozo byaamu bireme kweralikiira,baitu n'amaiso gaamu galeme kukyusibwa. ¹¹ Walowo omusaiza omu bukama bwaamu,aliina omwooyo gwa bakanca abaikiiri:n'omu mirembe zaiteewo eisana,n'okweteja n'amagezi,nk'amagezi ga bakanca,byabonekeire mungoyo;N'omukama oNebukaduneeza oiteewo,omukama,yamufoire omukulu wa bafuusa,nabakoba okubaza n'abafu,n'Abakaludaaya,n'abalaguli. ¹² Olwakubba amwooyo ogusai omuno,n'okumanya,n'okweteja,n'okulotololo ebirooto,n'okulanga ebigambo ebyaama,n'okwinonola erate,n'okumalawo obuzibu,byoona byoona bya bonekeire mu Danyeri oyo,omukama guyatumire oBerutesazza.Atubunu,beete oDanyeri erate,yeena yakukobera ebiwandikiibwe. ¹³ Ale nibaingirya oDanyeri edi omukama.omukama n'amukoba ati,Niiwe oyo oDanyeri,owamu baana babunyage bwa Yuda,oitange omukama guyayire omu Yuda. ¹⁴ Nkuwuliireku'nk'omwooyo wa bakanca guli mu niiwe,erate, eisana,n'okweteja,n'amagezi agasai omuno bibonekera mu niiwe. ¹⁵ Atubuni abakabukikabuki nabakoba okubaza na bafu babaingiirye omu maiso gange okusoma ekiwandiiko kinu n'okunkobera amakuru gaakyo,baitu tibasoboire kunkobera makuru gaakyo. ¹⁶ Baitu, we nkuwulireku,nka osobola okukoba amakuru erate,n'oiyawo obuzibu bunu.Atubunu,niwasoma ekiwandiiko erate,n'onkobera amakuru gaakyo,wazwalikisibwa olw'afulungu,erate, wateebwa omukuufu gwa zaabu omwikoti,erate olifooka mukulu wa kasatu omu bukama. ¹⁷ Ale oDanyeri nairamu nakoba omu maiso ga mukama ati, ebisiimo byaamu bba nabyo we,n'empeera yaamu jiwe owondi:erate,nasomera omukama ebiwandikiibwe, nimukobera amakuru. ¹⁸ We mukama,oKanca Ali aigguru omuno yawaire oNebukaduneeza oiteewo obukama n'obuyiinza,n'ekitinisya,n'obukulu: ¹⁹ erate,olwa buyiinza buyamuwaire,abantu boona boona,ammanga,n'endumi ni batetemuka ni bamutiina:yaittanga buli guyayendyanga okwiitta;erate,yawonianga guyayendyanga okuwonia;erate,yagulumiryanga guyayendyanga okugulumirya,erate yakakanianga guyayendyanga okwikakania. ²⁰ Baitu,omutima gwaamwe ni gwegulumiirye n'omwooyo gwaamwe nigukakanyala nimwo atyo n'okukola akola eby'amalala,nagobebwa oku ntebe yaamwe eya bukama,erate nibamwiyaku ekitinisya kyaamwe. ²¹ Nagobebwa omu baana b'abantu:n'omutima gwaamwe nigukyusibwa nk'ogwabisolo,nabba amwe n'amazike,n'alisibwa ekisiko nk'ente.Omubiri gwaamwe nigutotan'omusulo gwa mwigguru okwiica niyetejerye nk'oKanca Ali aigguru omuno niye afuga obukama bw'abantu erate,nk'akulya okubo buli gwayendya. ²² We,omwaana waamwe oBerusazza,okyali kwikakania mutima gwaamu,gonze nka wamaite ebyo byoona byoona. ²³ Baitu,wegulumirya edi Omukama waigguru,Nibaleete ebintu bya munnyumba yaamwe omu maiso gaamu,we,n'abaami baamu,n'abakali baamu erate n'abazaana baamu, ni mubinyweesya omwenge:n'oyangiirya abakanca ba ffeeza,naba zaabu,aba bikomo,aba byooma,aba misaale,n'abamabbaale,ababonia,gonze okuwuura,obate okumanya:n'oKanca oyo aliina omwiika gwaamu omu mukono gwaamwe,erate,amaite amazira gaamu goona goona. ²⁴ Ale oKanca natuma omukono okuzwa omu maiso gaamwe,nebiwandiike ebyo ni biwandikibwa. ²⁵ Erate ebiwandiike nibyo binu,"MENE,MENE,TEKEL,UFARSIN." ²⁶ Amakuru ga kigambo nigo ganu,MENE;oKanca abaare obukama bwaamu,erate,abukomerye. ²⁷ TEKEL,otekeirwewo ekipimo,erate, ²⁸ oyajiibwe nka okubulaku.RES;Obukama bwaamu bugaburwe,buweweibweedi Abameedi n'abaperusi. ²⁹ Ale oBerusazza nalagira,ni bazwalikisya oDanyeri olugoye lw'afulungu,namuta olujegere lwa zaabu omwikoti lyaamwe,n'alangiira okuye nka niye yabbanga omukulu wa kasatu omu bukama. ³⁰ Omu kiro ekyo oBerusazza omukama Omukaludaaya naittibwa. ³¹ Erate oDaliyo Omumeedi naweebwa obukama,niyaali nka yakamala emyaaka nka enkaaga nabiri eja bukulu.