¹ ODaliyo yaboine nka kisai okukulya abamasaza kikumi mu abiri abalifuga obukama boona boona. ² Aigguru waabwe nka waliyo abasaiza basatu,omwe okubo nka niye oDanyeri: Abamasaza abo babalenge omusolo omu maiso gaabwe omukama aleme kufeerwa. ³ Ale oDanyeri oyo nagulumiira okusiinga abakulu n'abamasaza ,olwakubba omwooyo ogusai gwaali mu niye.Erate,omukama yaali akwendya okumuwa okufuga obukama boona boona. ⁴ Abakaulu n'abamasaza nibaswaaga ensonga eyasiinga oDanyeri omu bigambo bya bukama;baitu,nibatasobole kubona nsonga,gonze okulemeera omu mulumu gwaamwe olwakubba yaali mwesigwe.Niwataboneke kusiisa koona koona omuye gonze akabbi. Ale abasaiza ni bakoba,"Titukwaaba kubona nsonga eyasiinga oDanyeri oyo,nitutalijibona jaali omu bigambo by'amateeka ga Kanca." ⁶ Ale abakulu abo n'abamasaza ni bakumbaana edi omukama,ni bamukoba bati ,mukama oDaliyo,obbenge omwoomi emiijo n'emiijo. ⁷ Abakulu bakali basatu aba bukama,ababaiririira,abamasaza,abakungu,n'abafuga,bateserye amwe okuteeka eiteeka lya mukama ,n'okulagira ekiragiro ekigumu, nka buli eyasabanga okanca owondi obate omuntu yeena yeena ennaku amakumi asatu,wazira nka asabire niiwe,mukama, alinnagiwa omu bwiina bw'ampologoma. ⁸ Ale mukama,lagira ekiragiro ekyo,erate, oteeke akabonesyo oku biwandikiibwe ebyo,bireme kukyusibwa,nka amateeka g'Abameedi n'Abaperusi nigali,agatakyusibwa. ⁹ Omukama oDaliyo nikyo yazwiire atta akabonesyo kaamwe oku biwandikiibwe n'ekiragiro. ¹⁰ Ale oDanyeri niyetejerye nka'ebiandikiibwe biterebweku akabonesyo,nangira omu nnyumba yaamwe:(erate amadinisa ga kisenge kyaamwe gali gaigule nka okuloleera oYerusaalemi),nainama oku majwi gaamwe emirundi esatu buli lunnaku,n'asaba, niyebalya omu maiso ga Kanca waamwe,nka niyakolanga eirai. ¹¹ Ale abasaiza abo ni bakumbbaana nibasanga oDanyeri nk'akusaba erate, nk'akwegayiira omu maso ga Mukama waamwe. ¹² Ale ni basembera, ni basimoola omu maiso ga mukama oku kiragiro kya mukama bati: Tiwateirewo kabonesyo kaamu oku kiragiro,nka buli eyasabanga okanca yeena yeena obate muntu yeena yeena ennaku amakumi asatu,wazira nk'asabire niiwe,mukama,alinnagibwa omu bwiina bw'ampologoma? "omukama nairamu n'abaza ati,Ekigambo ekyo kya mananu,nk'amateeka g'Abameedi n'abaperusi nigali agatakyuuka." ¹³ Ale nibairamu omukama bati,"ODanyeri oyo,owa mu nsi ya ya bunyagi,takuwuliriirye,mukama,gonze ekiragiro kiwataireku akabonesyo.Baitu asaba emirundi isatu buli lunnaku." ¹⁴ Omukama niyawuliire ebigambo ebyo,niyeinatira muno,naswaga engeri yakuwoniamu oDanyeri okuzwa omu kiragiro kinu.Natawaana olunnaku loona loona okugezaaku okucungura oDanyeri. ¹⁵ Ale abasaiza abo ni bakumbaana edi omukama,ni bamukoba bati," weteje,mukama,lini niryo eiteeka lya Bameedi n'abaperusi, nti tiwabbanga kiragiro gonze eiteeka omukama ly'agumya erikyusika" ¹⁶ Ale omukama nalagira,nibaleeta oDanyeri,nibamunnaga omumpuku y'ampologoma.Omukama nakoba oDanyeri ati,"Omukama waamu gw'oweerezanga buliizo,oyo yakutamba." ¹⁷ Nibaleeta eibbaale,nibalitta oku mulyango gw'ampuku: omukama nalitaaku akabonesyo kaamwe ye,erate n'akabonesyo ka baami baamwe:ekigambo kyoona leke kireme kukyusibwa edi oDanyeri. ¹⁸ Ale omukama nayaba omu ngango yamwe,obwiire obwo natalye imere,baitu nibatamuletere ndongo,otulo nitumubula. ¹⁹ Ale omukama naimuka mambya muno,nayanguwa nayaba okumpuku y'ampologoma, ²⁰ Erate,niyegereie okumpuku awali oDanyeri nabazira aigguru neiraka lyannaku,nakoba oDanyeri,"Danyeri,omuweereza wa Kanca omwoomi,oKanca waamu gw'oweerezanga buliizo asoboire okukutamba edi empologoma?" ²¹ Ale oDanyeri nairamu omukama ati,"mukama bba mwoomi emirembe seregenyi! ²² Omukama wange atumire ontumwa waamwe,naigala eminwa zampologoma ,ni zitanyikyeku kabbi.Olwakubba omu maiso gaamwe nabonekere nka tindiku kabbi: erate,n'omu maiso gaamu,mukama,tinkolanga kabbi." ²³ Omukama nalyooka nassanyuka muno,nalagira okwiya oDanyeri omu mpuku.Ale oDanyeri nayibwa omu mpuku.Baitu,nka ndoowo kabbi koona koona akamwikireku,olwakubba yaali yesigire Kanca waamwe. ²⁴ Omukama nalagira,nibaleeta abaiza aboloopere oDanyeri nibabannaga omu mpuku y'ampologoma,bo,abaana baabwe,na bakali baabwe.Empologoma nizibasinja amaani erate,niziwendawenda amagumba gaabwe goona goona nka bakyaali kwiika ansi. ²⁵ Ale omukama oDaliyo nawandiikira abantu boona boona,ammanga,n'endumi,abaikala omu nsi zoona zoona:ati "emirembe zeyongere jimuli." ²⁶ Nkuteeka eiteeka omu bukama bwange boona boona abantu bakankanenge erate, batiinenge omu maiso ga Kanca wa Danyeri, olwakubba niye Kanca omwoomi,erate,mwoomi emiijo n'emiijo,n'obukama bwaamwe ndoowo alibuzikiirya;n'okufuga kwaamwe kuliikira kimwe ku nkomeero. ²⁷ Atamba erate, acungula,erate, akola obubonesyo neby'amageero omwigguru n'oku nsi; eyatambire oDanyeri edi amaani g'ampologoma. ²⁸ Ale oDanyeri nabba n'omukisa omu miijo za Daliyo, n'omu miijo za kuulo omuperusi.