¹ Nanje,omu mwaaka ogwekereire ogwa Daliyo omu Meedi,nayemereire oku munyweeza n'okumuwa amaani oMikairi. ² Atubuni,nabakobera amazuma.Bona,walyemeera abakama basatu omu Buperusi, n'owakanai niye alisiingira muno boona boona obuguuda.Erate nalifooka owa maaniolwa buguuda bwaamwe,alikubiriza boona boona okulwaana n'obukama bwa Buyonaani. ³ N'omukama owa maani alyemeera,alifuga n'obuyinza bwinji,erate,alikola nka nakwendya. ⁴ N'alyemeera,obukama bwaamwe buli wendeka,erate, bulyawulibwaamu edi empowo einai ez'amwigguru:baitu, tibuli gabirwa ibyaire lyaamwe,erate, tibulibba nk'okufuga kwaamwe ku yafugire.OLwakubba obukama bwaamwe bulisigulwa,edi abandi nka ti baana baamwe. ⁵ N'omukama owa bukiika bwa guryo,alibba n'amaani,baitu omwei oku bakulu baamwe;oyo alibba n'amaani gainji okumusiinga,alifuga.okufuga kwaamwe kulibba kufuga kwa maani. ⁶ Emyaaka jidooli nijirimala okwakalawo balyegaitta amwe:n'omwaala wa mukama owa bukiika obwa guryo aliiza edi omukama wa bukiika obwa gumoso okulagaana.Baitu,omwaala talibba n'amaani ga mukono gwaamwe,erate talyemeera,gonze omukono gwaamwe.Baitu,omwaala aliwebwaayo n'abo abamuletere,n'oitaamwe,n'oyo eyamuwaire amaani omu biro ebyo. ⁷ Baitu,omwana owa mu baluganda baamwe alyemeera omu kifo kyaamwe.Alirumba eye n'angira ekigo kya mukama owa mu bukiika obwa gumuso.Alibalwanisya erate,alibawangula. ⁸ Erate,no kubakanca baabwe,n'ebiisani byaabwe ebisaanunkye,n'ebintu byaabwe ebisai ebya feeza n'ebya zaabu,alibinyaga,erate alibitwaala omu Misiri.Erate,alimala emyaaka ezimwe nka alekere omukama wa bukiika obwa gumoso. ⁹ Ale omukama wa mu bukiika obwa gumoso aliwamba enfo za mukama wa bukiika obwa guryo,Baitu, alibizwaku n'airayo omu nsi yaamwe. ¹⁰ Na baana baamwe balirwaana,balikumbania ekibuura kikooto.balisigala nka bakwiiza erate,balimalawo woona woona;balyakalamu paka ku kigo kyaamwe. ¹¹ N'omukama wa bukiika obwa guryo alisunguwala ,alizwaayo,alirwaana naye,omukama owa mu bukiika obwa gumoso.Omukama owa bukiika bwa gumoso alireeta eiye erikooto,baitu,eiye ririwebwaayo omu mukono gwaamwe. ¹² Erate,eiye liritwalibwa,n'omutima gwa mukama wa bukiika obwa guryo gulyeyimusa ,erate,alikubba obukumi bwiinji,baitu taliwangula. ¹³ N'omukama wa bukiika obwa gumoso,alimukya te eiye erindi,nka likusiinga eryekereire.Emyaaka nka zakairewo,omukama wa bukiika bwa gumoso aliiza neiye erikooto nka lirina eby'aklwanisya binji muno ¹⁴ N'omubiro ebyo walibbaawo baiji abalyemeera okulwaana n'omukama owa mu bukiika obwa guryo.Erate n'abaana baabo abalina eitima omu bantu baamu balyeimukya okukiriirya okwolesebwa;baitu baligwa. ¹⁵ Alle omukama owa mu bukiika obwa gumoso aliiza,alikubba olusozi,n'awamba ekibuga ekiriku ebigo ebinji.N'eiye erya mu bukiika bwa guryo tiriribasobola,gonze abalwaani baamwe abasiinga.Tiwalibbaawo maani goona goona okubasobola. ¹⁶ Baitu,oyo aiza okumulumba alikola nka nakwendya ye;Ndoowo alyemeera omu nzira yaamwe.Erate,alyemeera omu omu nsi eya kitinisya,erate omu mukono gwaamwe mulibbaamu okuzikiirya. ¹⁷ Erate,Omukama wa bukiika obwa gumoso,alikyuusa amaiso gaamwe okwiiza n'amaani ga bukama bwaamwe goona goona, yeena alibba nendagaano jaalikola n'omukama wa bukiika bwa guryo,alimuwerya omwaala wa bakali okumusiisa,Baitu,talisobola erate,talimuyamba ye . ¹⁸ Oluzwanyuma lw'abyo omukama wa bukiika bwa gumoso alikyuusa amaiso gaamwe edi ebizinga,aliwamba biinji:baitu,omukulu waiye alikomya amalala gaamwe,erate alimwirirya ekizume kyaamwe. ¹⁹ Ale nakyuusiza amaiso gaamwe edi ebigo bya mu nsi yaamwe ye,baitu,alyesitala erate, aligwa, ale taliboneka ²⁰ Niwalyooka niwemeera omu kifo kyamwe omwei alyakalyamu omusolooza olwa kitinisya kya bukama. Baitu, omu nnaku tizinji,balimuzikiirya,timusungu,gonze omu ntalo. ²¹ N'omu kifo kyaamwe mulyemeera omuntu anyomebwa,abantu gubataliwaire kitinisya kya bukama: baitu aliiza omu biro bya mirembe,erate,alweebwa obukama olwakwegondya. ²² Erate, eiye balirisaniryawo kimwe okuzwa omu maiso gaamwe.Ale eiye n'omukulu wandagaano balimuzikiirya. ²³ Erate, nka bamaare okulagaana naye,alikola ebya bukuusa:olwakubba aliniina,erate,alifooka owa maani gonze nka aliina abantu badooli. ²⁴ Nkatalabwiire aliizira n'ebifo ebisiinga obujimu ebya mwisaza: erate,alikole abaizeza baamwe bibatakoore,gonze abaizeiza babaizeiza baamwe.Alibagabira omwandu,n'omunyago,erate n'obuguuda: nimwo mbbe,aliteesa okunnaga ebigo,baitu, kumala kaseera. ²⁵ Erate,aligolokokya amaani gaamwe,n'omutima gwaamwe okulwaanisya Omukama wa bukiika obwa guryo, n'eiye erinji omuno.N'omukama wa bukiika obwa guryo alirwaana entalo neiye erinji omuno erya maani againji baitu, talisobola,olwakubba balimusaara enkwe. ²⁶ Nimwo mbbe,naabo abaliire oku mmere yaamwe nibo balimuzikiirya,n'eiye lyaamwe liryanza:erate,bainji abaligwa nka baittiibwe. ²⁷ N'abakama abo bakali babiri emitima zaabwe ziribba zakukola bubbi,erate balisimoola ebya bubeyeji nka baikaire oku meeza emwe: baitu,tibiribona mukisa.Olwakubba, enkomeero eriika mu biro ebyalagiirwe. ²⁸ Ale Omukama wa bukiika bwa gumoso nairayo omu nsi yaamwe n'obuguuda bwinji: n'omutima gwaamwe gulikyaawa endagaano ejikiiri:erate alikola byayendya,nalyooka nairayo omu nsi yaamwe. ²⁹ Omu biro ebyalagiirwe alirayo,alyaaba omu bukiika obwa guryo.Baitu,omu biro byaluzwanyuma tikirbba nka nikyaali omu biro eby'ekereire. ³⁰ Olwakubba ebyombo ebya Kittimu biriiza okulumba :nikyo alizwa y'ennatira,alirayo,alisunguwaara endagaano ejikiiri,alikola byayendya,alirirayo kimwe,alirowooza abo abalekere endagaano ejikiiri. ³¹ Erate,eiye liryemeera oku ludda lwaamwe,erate balisiisa ekigo ekikiiri.Baliiyawo ebiweebwaayo ebyokyebwa eby'annaku zoona zoona,balyemeerya eky'amuzizo ekizikiirya. ³² Naabo abalikola okubbi nka baleka endagaano alibabeyegabeyega n'okwegondya: baitu,abantu abamaite oKanca waabwe balibba n'amaani balikola eby'abuzira. ³³ Naabo abaliina amagezi omu bantu balyegesya bainji: baitu,ekyooji n'omuuro,okubuwibwa,n'okuyagibwa biribannaga ennaku ziinji. v 34 Ale nibaligwa,baliyambibwa n'obuyambi budooli: baitu,bainji abalyegaitta nabo olw'akwegondya. v 35Nabamwe okubo abaliina amagezi baligwa okubawomesya,n'okubalongookya,n'okuberukya,,okwiica oku kiseera eky'ankomeero:olwakubba ekiseera eky'alagiirwe ki kyaali kwiika. ³⁶ N'omukama alikola nka nakwendya:erate,alyegulumirya,alyekulya okusiinga okanca yeena yeena,erate, alisimoola eby'akitalo oku Kanca wa ba kanca:erate,alibona omukisa okwiica obusubgu lwe bulikiriira:olwakubba eby'ateseibwe birikolebwa. ³⁷ Ale talirowooza bakanca ba baizeiza baamwe,gonze abakali ki bakwendya,erate,talirowooza katonda yeena yeena:olwakubba alyekulya okusiinga boona boona. ³⁸ Baitu omu kifo kyaamwe,aliwa ekitinisya okanca wa bigo,erate,okanca abaizeiza baamwe gu batamaite alimuwa ekitinisya n'ozaabu n'ofeeza,n'amabbaale g'amuwendo ogwiinji,n'ebirabo by'amugaso. ³⁹ Alirumba ebigo by'amaani againji,nk'akuyambibwaaku okanca omugenyi.Buli alimwikiriza alimwongeraku ekitinisya.Earte,alibawa okufuga abantu abainji,erate,aligabanyamu ensi nk'empeera. ⁴⁰ N'omu kiseera ky'ankomeero,omukama wa bukiika bwa guryo alirumba:n'omukama wa bukiika obwa gumoso aliiza oku mulumba nk'ompungo,nk'aliina amagaali,n'abaikaire oku mbalaasi,n'ebyombo ebinji,erate,alingira omu nsi,alyanzala nka amaizzi,n'abakalamu. ⁴¹ Erate,alingira omu nsi ya kitinisya,enkumi n'enkumi za Israeri zirigwa,baitu banu balitambibwa omu mukono gwaamwe;Edomu, n'oMowaabu,n'abaizukirya aba baana ba Amoni. ⁴² Erate, aligolola omukono oku nsi,n'ensi ya Misiri teriwona. ⁴³ Alibba n'obuyinza edi eby'amuwendo bya zaabu,n'ofeeza,n'okubuguuda boona boona obwa Misiri; n'Abalibiya n'Abaesiyopya balimusengeerya. ⁴⁴ Baitu,ebigambo ebirizwa omu buzwa isana,n'omu maniina birimweralikiirya: erate,alizwaayo nk'asunguwaire muno okuzikiirya n'okumaarawo kimwei abainji. ⁴⁵ Erate, alyomboka eweema za lubiri lwaamwe akati w'anyanja n'olusozi olwa kitinisya olwikiiri:erate,aliiza oku nkomeero yaamwe,ale ndoowo ali mujuna.