¹ Omu bwiire obwo,oMikairi omulangira wa maani,akuuma abantu,aliimukka.walibbaawo ekiseera ky'annaku ekitabbangawo omwiyanga lyoona lyoona okwiica ati.Erate,omu bwiire obwo, abantu baamu balicungurwa,bulyomwei alyajibwa eibara lyaamwe nka liwandikiibwe omu kitabo. ² Erate,bainji okwaabo ababbasirye omucuucu w'ansi baliyinduka,abamwei edi obwoomi obutawaawo,n'abandi edi okuswaala,n'okunyomebwa okutawaawo. ³ Abo te abagezigezi balyakayakana nka okumeremenya kwa bire by'amwibbanga,erate, naabo abayindula abaiji edi obwikiriiri balyakayakana nk'obunyenyenzi emirembe n'emirembe. ⁴ Baitu,we Danyeri,sweeka ebigambo binu; tta akabonesyo oku kitabo,okwiica ekiseera kya nkomeero. Bainji baliruka ani n'aadi,erate n'okumanya ku lyeyongera ⁵ Ale nje,oDanyeri,nindola,erate,bona waalowo abandi babiri nka bemereire.Omwei nka ayemereire oku mabbali oku ludda lunu olwa mwiiga,n'owondi oku mabbali oku ludda ludi olwa mwiiga. ⁶ Omwei okubo n'akoba omusaiza azwaire obafuta,eyaali aigguru oku maizzi ga mwiiga,ati" eby'akitalo ebyo biriica ai okukoma?" ⁷ Ni mpuura omusaiza azwaire obafuta, eyaali aigguru w'amaizzi g'amwiiga ,nk'akugolola omukono gwaamwe oguryo,n'omukono gwaamwe ogumoso edi eigguru,nalayira oyo abba omwoomi emirembe zoona zoona,nka biriica ekiseera n'ebiseera n'ekitundu ky'akiseera:erate,nibalimaara kimwe okuwendawenda amaani g'abantu abaikiiri,ebyo byoona byoona nibiryooka nibiwaawo. ⁸ Ni mpuura,baitu, niteteja:ni ndyooka ni nsimoola nti,Mukama wange,ebirizwa omwebyo biribba bityai? ⁹ N'akoba ati, kwaata amazira gaamu, Danyeri,olwakubba ebigambo biswekeibweku erate,bitekeibweku akabonesyo okwiica ekiseera eky'ankomeero. ¹⁰ Bainji abalyerongooca,abalyetukulya,abalikiriira,baitu,ababbi balikola ebibbi,ale oku babbi ndoowo alyeteja,baitu, abo abaliina amagezi balyeteja. ¹¹ Erate, okuzwa ekiwebwaayo ekyokebwa eky'annaku zoona zoona nikyayibweeyo,eky'amuzizo ekizikiirya nikyemeera,walibbaawo ennaku lukumi mu bibiri nakyendai ¹² Alina omukisa alindiira okwiica oku nnaku olukumi omu bisatu omwasatu neitaanu. ¹³ Baitu,we kwaata enzira yaamu okwiica enkomeero weribberawo:Olwakubba,oliwumula,erate,olyemeera omu mugabo gwaamu,ennaku nizirikoma.