¹ . Njeena aboluganda,tinasoboile kusimoola n'anywe nk'abamwooyo, baitu nk'abamubiri,nk'abaana abankeremba omu Kristo. ² . nabanywisirye matai, baitu tiimmere; olwakubba mwabaire mukyaali kujisobola erate naati mukyaali kujisobola. ³ .Olwakubba mukyaali ba mubiri, olwakubba omu nywe nka nimukyaalimu obwiiya,n'okutongana,timuli ba mubiri, erate timutambula nk'abantu obuntu? ⁴ .Olwakubba omuntu nasimoola ati, Nje ndi wa Pawulo; n’owondi ati, nje ndi wa Apolo; nka timuli bantu buntu? ⁵ .Ale apolo niye naani? N’oPawulo niye naani? bawereeza buwereeza ababaikirizisya; erate buli muntu nka Omukama waiswei niyamuwaire. ⁶ . Nje nasiggire, apolo n'asukiira; baitu oKanca niye yakuurye. ⁷ . Ale nikyo kityo; asigga tikintu, gonze asukiira;wazira oKanca akulya. ⁸ . Baitu asigga n'asukiira, benkanankana, baitu buli muntu aliweebwa empera oku sinziira oku mulumo gw'alibba akoore. ⁹ . Iswei tukoora amwe n'oKanca, erate nywe muli nnimiro ya Kanca, muli nyumba ya Kanca. ¹⁰ . Nka ekisa kya Kanca ni kiri ki naiwereibwa, nka omomboki omukugu owa magezi, nasakire omusinji, n’owondi nayombokaku ,baitu buli muntu yegenderezenge nka akombokaku. ¹¹ .Olwakubba ndoowo muntu asobola kutaawo musinji gundi wazira ogwo ogwa terebweewo. niye Yesu Kristo. ¹² . Baitu omuntu yeena yeena nayombokanga oku musinji ogwa ozaabu,effeeza, amabbaale ag'amuwendo ogwiinji, emisaale ,eisubi, ebisasiro; ¹³ . omulumo gw'abuli muntu gulibonesebwa, olwakubba olunaku ludi luli gulanga,olwakubba guliswekururwa mu muuro; n’omuuro ogwenyenere gulikema omulumo gwa buli muntu ni gwiisana. ¹⁴ . Omulumo gwa buli muntu, gwe yayombokereku niguli sigalawo, aliweebwa empeera. ¹⁵ . Omulumo gwa buli muntu niguliya alifiirwa;baitu ye mwenyenere alicungurwa . ¹⁶ . Timumaite nka muli Iramyo lya Kanca, erate nka omwooyo gwa Kanca abba mu niinywe? ¹⁷ . Omuntu yeena yeena nazikiiryanga eIramyo lya Kanca, oKanca ali muzikiirya oyo; olwakubba eIramyo lya Kanca likiiri: niinywe. ¹⁸ . Omuntu yeena yeena tiyebbeyeganga.omuntu yeena yeena niyerowoozanga okubba omulabuki omunywe omu miijo jini, afookenge musirusiru, leke afooke omugezi. ¹⁹ . Olwakubba amagezi ga munsi muni nibwo busirusiru edi oKanca. Olwakubba kyawandikiibwe kiti, akwatisya abagezi omu nkwe zaabwe. ²⁰ . Erate ati, Omukama yeteja empaka eza bagezi nka tizirumu. ²¹ . Omuntu yeena yeena nikyo azwa aleka okwenyumiinkiirya omu bantu. olwakubba byoona byoona byanywe. ²² . Obate Pawulo, obote Apolo, obate keefa, obate nsi, obate bulamu, obate kufa, obate ebirowo, obate ebikwaaba okubbaawo; byoona byoona byanywe; ²³ . nyweena muli ba Kristo; no Kristo w Kanca.