¹ . Nanje ab'oluganda, ni nnaizire jimuli, tinaizire na maani gainji aga bigambo obate amagezi nka nkubakobera ekyama kya Kanca. ² . Olwakubba nasarewo obutamanya kigambo omu nywe,wazira oYesu Kristo oyo eyakomereirwe. ³ . Njeena nabbanga nanywe omu bunaki no mu kutiina n’omu kukankana okwiinji. ⁴ . Erate omu kusimoola kwange n’omu kulamba kwange tibyaali mu bigambo bya'magezi ebisendasenda, baitu byaali mukukutegeeza kwa mwooyo n'amaani. ⁵ . Okwiikiriza kwanwye kulemenga okubbaamu amagezi g’abantu, wazira omu maani ga Kanca. ⁶ . Baitu edi abo abakuure omu mwooyo, tusimoola by'amagezi,baitu amagezi agataali ga mu miijo jini obate abakulu ab'amu miijo gini abawaawo. ⁷ . Baitu tusimoola amagezi ga Kanca omu kyaama, agaali gakwekeibwe, oKanca ge yalagiire eirai ensi nka zikyaali kubbaawo, olwa kitinisya kyaamwei. ⁸ . Ndoowo n’omwei oku bafuzi abamu miijo jini abageetejere,olwakubba singa bageetejere, tibandikomereire Mukama owa kitinisya. ⁹ . Baitu nka nikyawandikiibwe kiti,Eriiso bye litabonangaku n'okutwi bye kutawurangaku, nebitaigiranga omu mwooyo gwa muntu,byoona byoona oKanca nibyo yatekeiretekeire abamwendya ¹⁰ . Baitu iswe oKanca yatuswekuliire oku bwa mwooyo, olwakubba omwoyo aswaga byo byoona byoona erate nebitamanyiibwe ebya Kanca. ¹¹ .Olwakubba muntu ki eyeeteja ebya muntu wazira omwooyo gwa muntu oguli omu ye? Erate kityo ne bya Kanca ndoowo abyeeteja wazira omwooyo gwa Kanca. ¹² Baitu iswe ti twawereibwe mwooyo gwa nsi, wazira omwooyo oguzwa edi oKanca, leke twetejenge oKanca byatuwerya mbbe. ¹³ . N’okusimoola tusimoola ebyo, timu bigambo amagezi ga bantu bye gegesya, wazira omwooyo by'ayegesya; ni tugeregerenya ebya mwooyo ne bya mwooyo. ¹⁴ . Baitu omuntu awa mwiika mbbe taikiriza bya mwooyo gwa Kanca, olwakubba bya budoma jaali; erate tayinza kubyeteja, olwakubba bikeberwa na mwooyo. ¹⁵ Baitu omuntu owa mwooyo akebera byonna byoona, baitu ye mwenyenere takeberwa muntu yeena yeena. ¹⁶ . Olwakubba, naani eyaali ategeire okulowooza kwa Mukama waiswe, leke amwegesye?" Baitu iswe tulina endowooza ya Kristo.