¹ . Ale ab'aluganda nkubategeeza, enjiri jinababuulire okusokera kimwe, mwajaniriize,erate mukyajemerereku, ² . Erate ji mwacunguribwemu; ni mugumya ebigambo binababuliire, okwiyaku nkaa mwaikiririze bwereere. ³ Olwakubba nabategezere ekigambo ekikulu omuno nanje kinaweweibwe, nka oKristo yafiire olwa bibbi byaiswe nka ebyawandikibwa nibikoba. ⁴ . Erate nka yazikiibwe, erate nka yayimbokere oku lunaku olwa kasatu nka eby'awadikibwa nibikoba. ⁵ . Erate nka yabonekeire oKeefa, n'alyooka nabonekera eikumi n'ababiri. ⁶ . Nalyooka nabonekera ab'aluganda abakala omu bitaanu omulundi gumwei, erate bainji okwaabo abakyaali obwoomi okwiica ati, gonze abandi bafiire. ⁷ . Erate n'alyooka nabonekera oYakobo, erate nabonekera abatume boona boona. ⁸ . Oluzwanyuma lwa bwoona bwoona nalyooka nibabonekera nanje omwaana onkerembe. ⁹ . Olwakubba nje ndi muto omu batume atasaine kwetebwa omutume, olwakubba nayiganyirye e’Iramyo lya Kanca. ¹⁰ . Baitu olwa kisa kya Kanca bwendi nimwo ndi: ne kisa kyaamwe ekyaali jendi tikyaali kya bwerere; baitu nakoore emirumo jinamwingi okusiinga boona boona: Baitu tininje, wazira ekisa kya Kanca ekyaali nanje. ¹¹ . Ale obate nje obate bwo, nimo tutyo tubuulira erate mutyo nimwo mwaikiriize. ¹² . Baitu oKristo nabuulirwa nka yayimbokere omu bafu, erate lwaaki abamwe omu nywe bakoba oti; ndoowo kuyimbooka kw'abafu? ¹³ .baitu obate ndoowo kuyimbooka kw'abafu, erate no Kristo tiyayimbokere yeena. ¹⁴ . Erate obate nka oKristo tiyayimbokere, ale okubuulira kwaiswe tikulumu, erate n’okwikiriza kwa nywe tikulumu. ¹⁵ . Erate, baitu tuboneka nka abajuurwa ababubeyeji aba Kanca, olwakubba twamanyisirye okanca nka yayimbocerye oKristo,gwatayimbocerye, nibabba nka abafu tibayimbooka. ¹⁶ . Erate, oba nka abafu tibayimbooka, baitu n’oKristo tiyayimbokere. ¹⁷ . Erate,oba nka oKristo tiyayimbokere, okwikiriza kwanywe tikuliku ki kugasa; mukyaali mu bibbi byanywe. ¹⁸ . Erate naabo abafiriire omu Kristo bazikiriire. ¹⁹ . Obate nka omu bwoomi bunu bwonkai nimwo tubbeera neisuubi omu Kristo, tuli ba kusasirwa okusiinga abantu boona boona. ²⁰ . Baitu ati, ekituufu oKristo yayimbokere omu bafu, niye kibala ekyekeera omu abo boona boona abafiire. ²¹ . Olwakubba okufa kwaabwe kwaleteibwe muntu, erate n’okuyimbooka kwa bafu kwaletebwe muntu. ²² . Olwakubba boona boona nka nibafiriire omu Adamu, erate batyo omu Kristo boona boona nimwo bali fookera abwoomi. ²³ . Baitu buli muntu omu kifo kyaamwe ye: oKristo niye yasokere, ale naliiza abaamwe baireku. ²⁴ . Olwo te enkomeero n'eryooka neika naliwaayo Obukama edi oKanca niye otaamwe; nalibba nka amaare okwiyawo okufuga koona koona, n'amaani goona goona, n’obuyinza. ²⁵ . Olwakubba kimusanira okufuganga okwica lwa lita abananzigu baamwe boona boona ansi wa magulu gaamwe. ²⁶ . Omuzigu alisembayo okutoolebwaawo, niye kufa. ²⁷ . Olwakubba kyawandikiibwe kiti,oKanca ataire ebintu byoona byoona ansi wa magulu gaamwe.Baitu nakoba ati; ebintu byoona byoona byatereibwe ansi wa magulu gaamwe, kibba kikumanyisya kiti, nka oyo tiyatereibwe ansi, eyateire byoona byoona ansi waamwe. ²⁸ . Baitu byoona byoona nibirimala okutekebwa ansi waamwe, erate n’omwaana omwenyenere leke atekebwe ansi w'oyo, eyataire byoona byoona ansi waamwe, okanca leke abbenge byoona byoona omu byoona byoona. ²⁹ . Baitu balikola batyai ababatiziibwe oku lw'abafu? Obate nka abafu tibaliyimbokera kyarumwe, kiki akibabatizisya oku lw'abo? ³⁰ . Naiswe lwaki okubba omu kabbi buli kiseera? ³¹ . Nkukakasa, olwa kwenyumiriza kwenina omunywe, ndi nakwo mu Kristo Yesu Omukama waiswe, nanje nfa buli kiro. ³² . Obate nka nalwaine n'ebisoro omu Efeso nka omuntu obuntu, ngasibwa ntyai? Obate nka abafu tibayimbooka, "tulye, tunywe olwakubba, tukufa emambya. ³³ . Temubbeyegebwanga: "Eminywaani ejibbi jisiisa episa ezisai" ³⁴ . Mwimukire omu bwikiriiri, timwiira mu kusiisanga te, olwakubba abandi tibamaite Kanca; nsimoire kubakwatisya nsoni. Omubiri gwa kitinisya. ³⁵ . Baitu omuntu ayinza okubuulya otti,abafu baliyimbooka batyai? erate omubiri ki gwebaliiza nagwo? ³⁶ . Musirusiru we, ensigo josigga temeruka nka tefiire: ³⁷ . N’ejosigga tosigga mubiri ogulibba, wazira empeke ejerere, kanda ya ngaano, obate ya ngeri jindi, ³⁸ . Baitu oKanca ajiwa omubiri nka nayendya,erate buli nsiggo ajiwa omubiri gwaayo yonkai. ³⁹ . enyama yoona yoona tinyama emwei; baitu ejindi y'abantu, n'ejindi yabisolo, nejindi ya nnyonyi n’ejindi yancwi. ⁴⁰ . Erate walowo emibiri ja mwigguru n’emibiri ja mu nsi, baitu ekitinisya ekya mwigguru kindi ne kya mu nsi kindi. ⁴¹ . Ekitinisya eky'aisana kindi,ne kitinisya eky'akweezi kindi, ne kitinisya kya bunyenyenzi kindi: olwakubba akanyenyenzi tikenkana kairawako kitinisya. ⁴² . Erate n'okuyimboka kwa bafu nimwo kutyo. Gusiggibwa mu kujunda erate,guyimbooka mu butajunda. ⁴³ . Gusiggibwa awataali kitinisya, guyimbooka mu kitinisya, gusiggibwa mu bunaki, guyimbooka mu maani. ⁴⁴ . Gusiggibwa nka omubiri gwa mwiika; guyimbooka nka omubiri gwa mwooyo. Obate nka walowo omubiri gwa mwiika, erate walowo n'ogwa mwooyo. ⁴⁵ . Erate nimwo kityo kyawandikiibwe kiti, omuntu eyekereire Adam yafookere omwiika og’woomi, Adam eyasembereyo yafookere omwooyo oguleeta obwoomi". ⁴⁶ . baitu eky'amwooyo tikyekeera, wazira eky’amwiika; oluzwanyuma ky’amwoyo. ⁴⁷ . Omuntu eyekereire yazwire mu nsi, waitakali, omuntu owa kabiri yazwire mwigguru. ⁴⁸ . Nka odi owaitakali niyaali, erate n’abaitakali nimwo bali batyo, erate nka nka odi owa mwigguru niyaali, erate n'aba mwigguru nimwo bali batyo. ⁴⁹ . Erate nka nitwatwaire ekiisani kyodi owaitakali, erate tulitwaala ne kiisani kyodi owa mwigguru. ⁵⁰ . Baitu kinu nikyo nkukoba abaluganda, nka omubiri n'eisagama, tibisobola kusikira Bukama bwa Kanca, erate n’okujunda tikusikira butajunda. ⁵¹ . Bona, nkubakobera ekyaama: isweena isweena titulifa, baitu, isweena isweena tulifuulibwa, ⁵² . maangu ago, nka okutemya ekikowe, akagombe kankomeero kalivvuga:olwakubba kalivvuga, nabafu bali yimbooka outajunda te, naiswe tulifuulibwa. ⁵³ . Olwakubba ogujunda gunu kisaniire okuzwaala obutajunda, n'ogufa gunu okuzwaala obutafa. ⁵⁴ . Baitu ogujunda gunu nigulimala okuzwaala obutajunda, n'ogufa gunu okuzwaala obutafa, ekigambo ekyawandikiibwe leke kikiire kiti. okufa kumiriibwe omu kuwangula. ⁵⁵ . We okufa, okuwangula kwaamu kuli ludai? we magombe, okunena kwaamu kuli ludai? ⁵⁶ . Okunena kwa kufa nikyo ekibbi, n'amaani ga kibbi nigwo mateeka: ⁵⁷ . Baitu oKanca yebalibwe, atuwangulya iswe oku bwa Mukama waiswe oYesu Kristo. ⁵⁸ Ale, baganda bange benyendya. mugumenge obutatangatanga, nka mweyongeranga buliizo buliizo omu mulumo gwa Mukama waiswe, olwakubba mu maite nka okufuba kwanywe tikwabwerere omu Mukama waiswe.