¹ . Mugoberenge okwendya; erate mwegombenge ebirabo bya mwooyo, baitu ekikusiinga mubulirenge. ² . Olwakubba asimoola omunnumi tasimoola edi bantu wazira edi oKanca. olwakubba ndoowo akuwuura, baitu omu mwooyo akusimoola byaama . ³ . Baitu abuulira, asimoola edi abantu ebizimbba, n'ebisemerya, n'ebigumya, ⁴ . Asimoola omunnumi yeyomboka yenkai, baitu abuulira ayomboka Iramyo. ⁵ . Ale nkubendya nyweena nyweena nikibba kikusoboka musimolenge ennumi, baitu okusiinga mubulirenge: erate oyo abuulira niye asiinga obukulu asimoola ennumi, wazira nka akutegeeza e’iramyo leke linywezebwe. ⁶ Ati buni ab'aluganda, obate nindiiza ji muli nka nkusimoola ennumi, ndi bagasa ntyai, nintalisimoola naanywe obate omukuswekururwa ,obate omu kweteja, obate omu kubulira, obate omu kwegesya. ⁷ . Erate nebivuga ebitaliimu bwoomi, nka endere, obate ennanga nibitavuga omu maraka agamanyibwa, omuntu yeteja atyai olwembo olufuyiibwe, obate olukubiibwe? ⁸ . Erate siinga enggombe tezwaamu eiraka eri kutegerekeka, naani alyeteekateekera okulwana? ⁹ . Nimwo kiri kityo okunywe, siinga omuntu asimoola omunnumi ezitakwetejebwa, ekisimoire kiryetejebwa kityai? olwakubba mulisimoora mwibbanga. ¹⁰ . Nimwo te omu nsi mulumu ennumi ziingi, ale ndoowo lutaalina makulu. ¹¹ . Baitu siinga timaite makulu ga lulumi mbba mupaati edi oyo akusimoola, Baitu nimwo yeena abba atyo jendi. ¹² . Nanywe mutyo, olwakubba mwegomba eby'amwooyo, mufubenge muno okuswagana ebyo ebigumya e’Iramyo. ¹³ . Erate asimoola omu nnumi asabenge okufuna amaani okuyindula byasimoire. ¹⁴ . Olwakubba ninsaba omu nnumi, omwooyo gwange gusaba, baitu okweteja kwange tikubala bibala. ¹⁵ . Ale kiki kinakola? nasabanga omu mwooyo, erate nasabanga n'amagezi, nayembanga omu mwooyo,erate nayembanga n’amagezi. ¹⁶ . Olwakubba n’osaba omukisa omu mwooyo, oyo atetejerye kyokobere airamu atyai nti Amiina olwa kwebalya kwaamu, atetejerye kyosimoire? ¹⁷ . Olwakubba we webalya kusai, baitu omuntu owondi nka tazimbiibwe. ¹⁸ . Nebalya oKanca olwakubba nsimoola ennumi okubasiinga nywena nywena. ¹⁹ . Baitu omw’Iramyo nkwendya akiri nsimoole ebigambo bitaanu ebyetejebwa, nka nkwegesya abandi, okusinga ebigambo omutwaalo ogumwe omu lukumi ebitetejebwa. ²⁰ . Ab'aluganda, timubbanga baana bato omu kweteja ebintu binu: Mubbe bato omu bibbi,baitu omu kweteja mubbe bakulu. ²¹ , Kyawadikiibwe omu mateeka kiti, ndisimoola n'abantu banu omu bantu abannumi ezindi n’omu minwa jabapaati; erate gonze nimwo kityo tibalimpulirya, nimwo akusimoola oKanca. ²² . ennumi nikyo zizwa zibba akabonesyo, Baitu ti edi abaikiriza wazira edi abataikiriza: baitu oburanji bugasa abo abaikiriza ti abo abataikiriza. ²³ . Ale e’Iramyo lyoona lyoona niribba nka bakumbaniire amwe boona boona nibasimoola ennumi, niwaizawo abatamaite obate aba taikiriza,tibalirowooza nti mulalukile? ²⁴ . baitu siinga boona boona nibawa oburanji, niwaigira ataikiriza obate atamaite, ebikusimoolwa, biiza kumuletera okwenenya,erate n’okusaarwa omusango. ²⁵ . Ebyaama eby’amu mutima gwaamwe biswekulibwa; erate alivuunama amaiso nasiinza oKanca, nka akusimoola ati, oKanca ali munywe kakimwe. ²⁶ . Ale kiri kityai, ab'aluganda? ni mukumbaana buli muntu aliina nolwembo, aliina okwegesya, aliina ekimuswekuliirwe, asimoola ennumi erate owondi nayindula, byoona byoona bikolebwenge olwa kwomboka. ²⁷ . Siinga wabbaawo omuntu akusimoola omu nnumi, basimolenge babiri obate obutayakala mu basatu, baitu basimoolenge omwei n,omwei, erate omwe oku bwo ayindulenge bye basimoire. ²⁸ . Baitu niwabba nka ndoowo akuyindula, asirikenge omw’Iramyo, asimorenge omu meeme yaamwe n'oKanca. ²⁹ . Nabaranji basimoolenge babiri obate basatu, erate abandi bawulenge ebyo ebisimoirwe. ³⁰ . Baitu siinga omwe okwaabo obaikaire aswekururwa ekigambo, akusimoola asirikenge. ³¹ . Olwakubba nywena muyinza okwebulira omwei kwomwei, boona boona begenge, erate boona banywezebwenge. ³² . Emyooyo za baranji zifugibwa abaranji; ³³ . Olwakubba oKanca tiwaluyogaano baitu wa mirembe; nka nikiri omu maramyo ga baikiiri goona goona. ³⁴ . Abakali basirikenge omw’Iramyo: olwakubba tibaikirizibwa kusimoola, baitu bafugibwenge nka amateeka nigasimoola. ³⁵ . Erate nibendyanga okweega ekigambo kyoona kyoona, babulyenge abaibaabwe nka bali eka: olwakubba kyansoni okusimoranga omw’Iramyo. ³⁶ . Mulowooza nka ekigambo kya Kanca kyatandikiire muinywe obate kyaikire edi nywe nywenkai? ³⁷ . Omuntu yeena yeena niyerowozanga okubba omuranji obate owa mwooyo, yetejenge bye mbawadiikira, nka nikyo kiragiro kya Mukama waiswe. ³⁸ . Baitu omuntu yeena yeena nateteja, aleme kweteja. ³⁹ . Ale baganda bange mwegombenge okuwa oburanji, erate timuzizanga kusimoolanga omu nnumi. ⁴⁰ . Baitu byoona byoona bikolebwenge nka nikisaana erate omu mpisa ezisai.