¹ . Kawoola abeeki baye ati, “Masima mbawoola nti, khu bano abemire ano aliwo abandi abataliwona khu khufwa nawutono okhwoosa lu’baliwona owene’ngo wa Weere niwiicha na’maani.” Okhukaluukhanisiwa ² . Manu endaalo mukaaga nichabitawo Yesu kayira Petero, Yakobo nende Yokana kacha nabo khu lugulu oluleeyi, yibali boosi boηηene muwekisi. Nibali eyo kakaluukhanisiwa ni bawona. ³ Enguwo chaye chamekhamekhana chalafuwa lukali, okhukhirakho omutu yesi yeesi owo’khusyalo onyala okhuchilafuyisa atyo. ⁴ Awene awo Eriya nende Musa babawonekhera, abali nibalomaloma nende Yesu. ⁵ . Petero kakowolamo kawoola Yesu ati, “Labbi, silayi efwe okhuba ano. Manu khwombakhe ebikaali bidatu__ sirala syawo, esindi sya Musa ne esiindi sya Eriya.” ⁶ (Olwokhuba Petero kali syamanyire esyokhukowolamo, olwokhuba bali batiiye lukali.) ⁷ . Manu esireesi syecha syabawiikha, ekono lyatula mu sireesi liiti: “Ono nje omwana wange, Omukoosi. Mumuwulire!” ⁸ Awo nawo nibekhewukha, si bawona mutu yeesi nali nabo okhutusakho Yesu. ⁹ Manu nibali nibekhirira assi wo’lugulu, Yesu kabalagira bakhaye okhuwolerakho omutu bibali nibawene okhwoosa omwana wo mutu lwalisyukhira okhutula mu bafu. ¹⁰ Bawulerera emboosi eyo nibatebana abene na’bene baati, “Okhusyukhira mu bafu syekesa si.” ¹¹ Manu bamuteeba nibawoola baati, “Lwasina abasomesa ba malako bawoola baati Eriya nje oli no’khwekherera okhukowola?” ¹² Yesu kabakowolamo ati, “Mu’wutufu wene Eriya nje otangira okhwiicha, kakonjoola ebiitu byosi byoosi. Lwasiina khandi syaandikiiwa siiti, “Omwana wo’mutu atekwa okhusaanda lukali no’khwekaaniwa? ¹³ . Ne mbawolera nti, “Eriya kamala okhwiicha, khandi bamukhola wuli sibadakha, nga nisyamuwandiikiwakho.” Okhuwona Khwo’musyaani Owalikho Esikhyeeno ¹⁴ Manu nibakowola eyiri abeeki bandi, bawona esidiikha esikhoongo nisibewodokhaniisye nende abasomesa bamalako ni’babayinganiya. ¹⁵ Wangu wene abatu bosi boosi ni bawona Yesu bawuka lukali berukha bacha yaali bamukheesa. ¹⁶ Yesu kabateeba ati, “Mubayinganisiryasi?” ¹⁷ Omusacha mulala mu sidiikha kakowolamo ati, “Omwekesa, nkhuleteeye omwana wange musoliri alikho esikhyeeno esimukayira okhulomaloma. ¹⁸ Nawuli lusimudiira simukhubba eminyikha katusa efwoobe, keluma ameeno kabbangalala. Nsabire abeeki bawo bamwiirusyekho esikhyeeno, byabakhaya. ¹⁹ Yesu kabakowolamo kawoola ati, “Enywe, abo’lusse lutafukiirira ndyakama li okhuba ni nanywe? Ndyosa yeena okhubeesimiirisa? Mu mundeetere omusoliri oyo.” ²⁰ Manu baleeta. Esikhyeeno ni syawoona Yesu, wangu wene syamu’bbangalasa. Kakwa assi kekalangasa, katusa efwoobe. ²¹ Yesu kateeba simwana ati, “Amalire embaka si nali ati?” Kakowolamo ati, “Okhutula mu wudoto.” ²² Amakhabi maangi esikhyeeno simusukuna mu muliro olundi mu maachi nisidakha okhumwiita. Ne noba nonyala okhukholawo syosi syoosi, tukwire esisa otuyeede.” ²³ Yesu kamuwoola ati, “'Noba nonyala'?” Byoosi binyalikha eyiri ofukiirira.” ²⁴ Wangu wene simwana wo’musoliri kalomalomera amukulu kawoola ati, “Nfukiirira; njedde nsasire muwutafukiirira wange.” ²⁵ Manu Yesu nikawona esidiikha nisiri khwewuusa mu sifwo mubali, kakhamukhira esikhyeeno. Kasiwoola ati, “Ewe esikhyeeno sidimbe ne siikafu sya’matwi,” esse, “Nkhulagira, mutuleekho sumukowoleraanga khandi nawutono.” ²⁶ Esikhyeeno syalira sya’mubangalasa ne’tiima lingi ni simutulamo. Omusoliri kawonekhera erala ngo’mulambo bangi bawoola baati, “afwiye.” ²⁷ Ne Yesu kamudiira khumukhono kamusiingisa keema dungerere, ²⁸ Naye Yesu nikengira mu nyumba, abeeki becha bamuteeba mu weekisi baati, “Lwasina efwe sikhunyalire khumwirusyakho esikhyeeno? ²⁹ Yesu kabawoola ati, esye’mbya yino sinyalikha okhumutulakho okhubitira mukhusaba khwoηηene.” ³⁰ Batulayo baabitira mu Galiraaya. Yesu sikadakha omutu yesi yeesi okhumanya yibali, ³¹ Olwokhuba kali ali okhusomesa abeeki baye. Kabawoola ati, “Omwana wo’mutu acha okhuliwamo olukhwe awereseweyo mu makhono ka’batu. Balimwiita, naye olunyuma lwe’ndaalo chidatu alisyuukhira.” ³² Ne sibamanya emboosi eyo siyekesa, manu batya no’khumuteeba. Nanu Okhiira Owukhunuufu? ³³ Manu becha boola e Kaperunawumu. Ne Yesu nikali nali mu nyumba kabateeba ati, “Mubeeye muyingana si khungira?” ³⁴ Manu bawuleera olwokhuba bali bayiingana abene nabeene khungira baati, nanu okhiira owukhunuufu. ³⁵ Yesu kekhala assi, kalaanga ekhumi nababiri kabawoola ati, “Omutu nadakha okhuba owa’mberi, abenge nga nje omukhenerekha mu boosi khandi omukhosi wa boosi.” ³⁶ Kawukula omwana muwere kamwemekha akati wawe. Manu kamuwakata kabawoola ati, ³⁷ “Wuli onasangalirenge mulala khu’baana bawere abali nga bano muliita lyange anabenge kansangaliye; nende wuli mutu yeesi onansangalirenge sinise yanabenge asangaliye, anabenge asangaliye owantuma.” Yeesi Otatuyiinganiya Wefwe Niye. ³⁸ Manu Yokana kamuwoola ati, “Omwekesa, khwawona omutu nikerusya ebikhyeeno muliita lyawo khwamukaana olwokhuba sikali mulala khwiifwe.” ³⁹ Ne Yesu kawoola ati, “Mutamukaaniya.” “Olwokhuba si aliwo okhola ebya mayiya muliita lyange onyala musikha syene esyo kanomalomakho owubi, ⁴⁰ olwokhuba otaasi musiku wefwe aba wefwe. ⁴¹ Mbowolera esyamasima, yeesi obayeresa esikombe sya’maachi khu’lwerita lyange olwokhuba wa Kurisito masima mbawola nti, sya’likhaywa amusaara kwaye nawutono. Esireeta Okhukhola Esibi ⁴² “Nende wuli mutu onakirenge mulala kkhu bawere bano abanfukiiriramo okhukhola esibi, syakhali esirayi omutu oyo bamuwowa olukina lukhoongo mukosi kasukuniwa mu kuyanja. ⁴³ Omukhono kwawo nikukira wakwa mu sibi, okutemangakho. Khalukhi ewe wingire mu wulamu no’lemaye okhulira okhwingira mu geyeena noli nende amakhono kombi; ⁴⁴ eyo enyende yawe yiyitafwira nende omuliro yikutasima. ⁴⁵ Ne okhukulu khwawo nikhukira wakwa mu sibi, khutemeekho. ⁴⁶ Syakhabeye sirayi okhwingira muwulamu owutakama noli omulema okhukhira okhusukuniwa mumuliro okutasima nuli na’makulu kombi. ⁴⁷ Nende emoni yawo niyikira wakwa mu sibi, oyitusangamo. Khalukhi ewe okhwingira mu wene’ngo wa Weere nuli ne’moni ndala okhukhira okhusukuniwa mu geyeena nuli ne’moni chombi. ⁴⁸ “’Eyo enyende yiyitafwira, khandi nga omuliro yikutasima.’ ⁴⁹ Wuli mutu acha okhulungiwa mu muliro. ⁵⁰ “Omunyu mulayi, ne omunyu nikuwamo echamu, onyala okhukukowosamo otye echamu lundi? Mube no’munyu mukati wenywe, khandi mube mu mirembe nawuli otula eyiri owasye.”