Yesu Aliisa Abaatu Elifu Chine ¹ Olwoola mu ndaalo echo esidiikha siindi esikhongo syewuusa. Nga lubali nibawuma esyo’khulya, Yesu kalaanga abeeki baye kabawoola ati, ² ‘’Ndiirira esibeera abaatu bano; olwokhuba leero endaalo chiri chidatu nibali nange nibawuma esyo’khulya. ³ . Nimbaseewula okhukowolayo nibawoongire enjala, banasirikhire khungira, olwokhuba abandi batula eyale.” ⁴ . Abeeki baye bamukowolamo baati, “Yeena mu sichimi muno Omuutu yanyala okhufuna emigaati chimala okhubaliisa?” ⁵ . Yesu kabateeba ati, “Muli nende emigaati chiinga?” bamuwoolera baati “musanfu.” ⁶ . Yesu kalagira ebidiikha okhwikhala assi khwiroba. Kawukula emigaati musanfu, kebasa kakhalakamo kawa abeeki baye bachiwe abaatu, abeeki baye baakhola baatyo. ⁷ . Abeeki bali nende owunηηeni wosi wutaanu; Yesu kawa owuηηeni enkhabi kawoola abeeki okhubakabira. ⁸ Abaatu balya bekuta. Nibamala abeeki bawuusa ebikhaliichikhire ebyasikalawo ebimwero bichufu musanfu. ⁹ Abaatu bali ambi elifu chine. Nikamala okhubasiiwula, ¹⁰ kengira mu lyato nende abeeki baye baacha mu syalo sya Dalumanusa. ¹¹ Manu Abafalisaayo batula becha bachaaka okhuteeba Yesu. Nibamukhema, bamuteeba akhawonero akhatula mukulu. ¹² Yesu kekhiisa omwoyo kwaye lukali, kawoola ati, “Lwasi abendaalo chino, bakoonya akhawonero khe byamayiya? Masima mbawoolera nti, “Yuwuma akhawonero, akhali bawewa.” ¹³ . Keecha kabalekha, kakowoola enyuma mulyato kambukha kaacha oluwande lundi. Amamera Ka Bafalisaayo Nende Kerode ¹⁴ . Manu abeeki baye becha bebirira okhukiinga emigaati, okhutusakho omugaati mulala kubali nakwo mulyato. ¹⁵ . Yesu kabakhuutira nawoola ati, “Mube moni,” “mweriinde amamera ka’Bafalisaayo nende aka Kerode.’’ ¹⁶ 16. Bateesa abene na’beene bawoola baati, “Khulwokhuba khuwuma migaati.’’ ¹⁷ . Yesu nikamanya bibateesa, kabateeba ati, “Siina esibalomyalomya muuti khuwuma migaati? Simuwona nawo simumanyire? Emyoyo chenywe miwandakanyu? ¹⁸ . Muli nende emoni ne mukhayire okhuwona, muli na’matwi ne mukhayire okhuwulira? Khandi simwichulisa? ¹⁹ . Oludaalo lunakhalakira emigaati chitaanu khu lwa’abaatu elifu chitaanu, ebimweero biinga ebye emigaati echakhaliichikha bimwawuusa?” Bamuwoola baati, “Ekhumi nabibiri.” ²⁰ . ‘’Ne ninakhalaka emigaati musanfu okhuliisa abaatu elifu chine, mwawuusa ebimweero ebichufu biinga ebye emigaati chakhaliichikha?” Baamuwoola baati, “Musanfu.” ²¹ . Yesu kabawoola ati, “Musiiri khandi okhutegeera?” Okhuwoniya Khwomusaacha Muwofwu E'Besusaida ²² . Beecha boola mu Besusayida, abaatu bandi baletera Yesu omuwofu wemoni bamwekalikhira okhumudiirakho. ²³ . Kadiira omusaacha muwofwu khu mukhono kamutusa erwanyi wo lukoongo. Namalire okhumufuucha amate khumoni no’khumutaakho amakhono kaye, Yesu kamuteeba ati, “Owona esitu syosi?” ²⁴ . Katingaala amukulu, kawoola ati, “Mbona abaatu; bafaana nga emisaala bakeenda nibewodookhaniya.” ²⁵ . Khandi Yesu katakho amakhono khumoni cho’muwofwu. Awo na’wo emoni chaye chalimbukha, okhuwona khwaye khwakowoolamo, kawona wuli situ syoosi wulayi. ²⁶ . Yesu kamuseewula namuwoola ati, “otacha mu syalo.’’ Petero Katula Kurisito ²⁷ . Yesu nende abeeki baye beecha batula baacha mungoogo cha Kayisaliya esya Firipo. Nibali khungira, kabateeba ati, “Abaatu bananga baatye?” ²⁸ . Abeeki baye bamuwoola baati, “Yokana Omubatiisi, abandi baati Eriya; ne abandi baati, mulala khu ba nabbi.” ²⁹ . Ne Yesu kabateeba ati, “Nanywe munaanga nanu?” Petero kaamukowolamo ati, “Niiwe Kurisito.” ³⁰ . Yesu kabakhuutira okhutawoolerakho omuutu yeesi emboosi chimudiirakho. Yesu Alakula Okhufwa Khwaye ³¹ . Kachaaka okhubasomesa, simukhoyera omwana wo’muutu okhusandisiwa lukali nokhwekaaniwa abakhulutu be’bikha nende bakhawona bakhulutu, nabasomesa bamalako, no’khwitiiwa, ne niyabitawo endaalo chidatu asyuukhire khandi. ³² . Kalomaloma emboosi eyo alaafu na’lafu, Petero kamuyira entulo kachaaka okhumwoolobya. ³³ . Naye Yesu kakalukhana kewunja abeeki baye, koolobya Petero nawoola ati, “Kowola enyuma wange sitaani!” “Olwokhuba syobaasa ebya Were, ne obaasa ebya baatu.” ³⁴ Yesu kalaanga ebidiikha nende abeeki baye, kabawoola ati: “Omuutu nadakha okhunoonda, ali no’khwefwirisa omwene ketwiikhe omusalabba kwaye kanoondekho. ³⁵ . Olwokhuba wuli odakha okhuwoniya owulamu waye aliwukosya, ne nawuli olikosya owulamu waye khulwange nende khulwenjiri aliwuwoniya. ³⁶ .Sirayi si omuutu syaafuna okhulya esyalo syoosi, namala afwiirwa owulamu waye? ³⁷ . Oba omuutu kakhofwanisye si okhuwoniya owulamu waye? ³⁸ Olwokhuba nawuli owundiirirwa ensoni ese nende emboosi change mu ndaalo chino echo wudaamba khandi embi, omwana wo’muutu yeesi alimudiirirwa ensoni oyo lwa’lichiira mu luyaali lwa Simwana nende bamalayika abolerefu.”