Okhulobana ¹ Manu Yesu kasiingira katulayo kaacha mu syalo sye wuYudaaya nende ebitundu ebiri ewukwe wo mwaalo Yoludaani. Khandi ebidiikha bya’batu byecha ali, ne nga luyali esaambo yaye, kachaka okhubasomesa. ² Manu aBafalisaayo beecha yali bamuteeba baati, “Sifukirirwa omutu okhwirusya omukhasi waye?” nibamuleba. ³ Kabakowolamo ati, “Musa kabalagira atye?” ⁴ Bawoola baati, “Musa katufukiirira okhuwandiikanga ebbaruwa eyokhwiirusya kho kerusiweenge.” ⁵ Ne Yesu kabawoola ati, “Olwo’wusito we myooyo chenywe sakira Musa kabawandiikira elako lino.” ⁶ “okhutula Weere nikalonga esyalo kalonga omusaacha no’mukhasi. ^{9 7} Omutu sakira analekhenge simwana nende nηηina begaata no’mukhasi waye, ⁸ ne babiri banabeenge omubiri mulala.’ Olwo wunanu nga sibasiiri babiri, ne mulala. 9 Sakira esyo Weere sikaambaniya, omutu atasikawukhaniyanga.” ¹⁰ Manu khandi nibali mu nyumba, abeeki baye bamuteeba emboosi eyo. ¹¹ Yesu kabawoola ati, “Wuli mutu yeesi onerusyeenga omukhasi waye kadeekhya owundi anabeenge amukholirekho owudaamba. ¹² Ne omweene nanalobenge ewawamwe kadeekhera omusaacha wundi, anabeenge akholire owudaamba.” Abaana Abayere Nende Yesu ¹³ Abatu bamuleteranga abaana bayere, okhubadiirakho, ne abeeki baye babawalabira. ¹⁴ Ne Yesu nikawona, kabanyigira. Kabawoola ati, “Mulekhe abaana abayere beche yiindi, ne mutabakayira, olwokhuba abali nga bano owen’engo wa Weere nje owawe. ¹⁵ Masima mbawoola nti, nawuli otafukirirenge owen’engo wa Weere nga omwana muwere sya’liwiingiramo ata nawutono.’’ ¹⁶ . Kabawukula abaana ka’bata musirifu, kabatakho amakhono kaye kabawa enkhabi. Omuraaga Musyaani Omuyiinda ¹⁷ Yesu nikali nawawo khungira, omutu mulala kecha yali nikerukha kamusigamira kamuteeba ati, ‘’omwekesa mulayi,’’ “Ndakhole ntye okhusikhira owulamu owutawawo?” ¹⁸ Yesu kamuwoola ati, “wunangira si omulayi?’’ ‘’si ali mulayi___ _okhutusakho mulala, nje Weere yeηηene. ¹⁹ Omanyire amalako: ‘Siwitanga, otakholanga owudaamba, otebanga, otayinganga omutu syatakholire, otakhayiranga khu siitu sibatakhuweye, otaanga oluyaali mu latawo nende mamawo.’” ²⁰ Kamuwoola ati, “omwekesa ebyo byoosi nabidira okhutula mu wuwere wange.’’ ²¹ Yesu kamwewunja kamudakha. Kamuwoola ati, “Owubanire emboosi ndala,” “cha, okuse byoosi byoli nabyo okabire abaati, kho wiiche wakhabe nowuyinda mukulu. Kho, omale wunonde.” ²² Olwe’mboosi eyo omusaacha kakhookha. Kawawo nanyiggire, olwokhuba kali no’wuyinda wungi. ²³ Manu Yesu kabisyabisya emoni kawoola abeeki baye ati, “Nga sidinyu abayiinda okhwingira mu wene’ngo wa Weere!” ²⁴ Abeeki baye bawuka khulwe emboosi chaye. Naye Yesu kalondamo lundi kabawoola ati, “Abaana, nga sidinyu abo abesika owuyiinda okhwingira mu wene’ngo wa Weere! ²⁵ Syangu engamira okhubita mu lina lye mpiso okhukhira omunyiinda okhwiingira mu wene’ngo wa’Weere.” ²⁶ Abeeki baye besindukha lukali, bemoonya abene nabeene baati, “Manu nanu onyala okhuwonesewa?” ²⁷ Yesu kabatingaala kawoola ati, “Khu mutu sino si sinyalikha, naye eyiri Weere bbe; ebiitu byoosi binyalikha eyiri Weere.” ²⁸ Petero kawoola Yesu ati, “Khwalekha byoosi khwakhuloonda!” ²⁹ Yesu kakowolamo ati, “Mbawoolera amasima yiwuma ata mulala owalekha edaala lyaye oba bamwanaaηηina oba bamboocho oba maama oba bbabba oba abaana oba endalo hulwaange nende enjiri ³⁰ olikhaywa ohufuna amakhabi emya mu ndaalo chino (Amadaala, bamwanaηηina, bamboocho, bamaama, abaana nende endalo__ ni nabo, okhusaandisiwa) nende endaalo chiicha, owulamu owutakama. ³¹ Ne bangi abamberi abaliba abenyuma, ne abenyuma baba bamberi.” Yesu Khandi Alakula Okhufwa Khwaye. ³² Ni bali khungira nibaniina e Yerusalemi, Yesu natangisiisemo, abeeki bawuka, ne abo abali ni’babaloondakho baatya. Khandi Yesu kawukula ekhumi nende babiri kabata entulo kabawoolera ebicha okhumwekholekhakho. ³³ Kabawoola ati, “Khuli okhunina okhucha e Yerusalemi,” ne omwana wo’mutu kakhaliwemo olukhwe nende bakhawona bakulutu nende abasomesa bamalako. Balimukhengera okwokhufwa lundi balimuwayo eyiri abateende, ³⁴ abalimudyaawukhira no’khumufuchakho amate, balimukhubba bamwiita. Endaalo nichiribitawo chidatu alisyuukhira.” Okhusaba Khwa Yakobo Nende Yokana ³⁵ Wunanu Yakobo nende Yokana abaana ba Sebedaayo, becha eyiri Yesu bawoola baati, “Omwekesa,” Khudakha otukholere syoosi syosi si khunakhusabe.’’ ³⁶ Yesu kabateeba ati, “Mudakha mbakholere siina?” ³⁷ Bamuwoola baati, “Tufukirire khwiikhale, mulala khumukhono kwawo omulungi, owundi khumukhono omukooda mu luyaali lwawo.’’ ³⁸ Ne Yesu kabawoola ati, “Simumanyire simusaba.’’ “Munyala okhunywa khusikombe ese sinywaakho oba embatiisa yo khubatiisiwa ese khunabatiisiwiramo?’’ ³⁹ Bamuwoola baati, “Khunyala” Yesu kabawoola ati, “Mulinywa khusikombe ese sinywerakho no’khubatiisiwa mu mbatiisa ese yinabatiisiwiramo, ⁴⁰ ne okhwiikhala khumukhono kwange omulungi oba omukooda siniise okhukaba. Okhutusakho ebifwo ebyo byabo abatekekherwa.’’ ⁴¹ Manu ekhumi nibawulira bino, bachaka okhunyolerera Yakobo nende Yokana. ⁴² Yesu kabalaanga kabaleeta alala kabawoola ati, “Mumanyire abo ababaasiwa okhufuka abateende babafukisa esirifu, nabakhongo bawe babayira kwa’maani. ⁴³ Naye mwinywe sisiri siityo. Naye wuli odakha okhuba omukhulutu mwinywe anabenge mukhosi wenywe, ⁴⁴ nawuli odakha okhuba owamberi mwinywe anabenge muwambe mu’boosi. ⁴⁵ Olwokhuba masima omwana wo’mutu sikecha okhumukholera, okhututusakho okhuhola, nokhuwayo owulamu waye okhuwoniya abangi.’’ Muwofwu Batolomaayo Awona. ⁴⁶ Manu becha boola e Yeriko. Nga Yesu lukatula mu Yeriko nende abeeki baye, ne‘sidiikha sikali, Batulumaayo Muwofwu we’moni, (Omwana wa Timaayo), kali kekhaaye khutulo we ngira nasabirisa. ⁴⁷ Ne nikawulira ati nje Yesu omunasaleesi owicha , kachaka okhulomalomera amukulu nawoola ati, “Yesu, Omwana wa Daudi, ngwiire esisa!” ⁴⁸ Bangi bamukhamukhira khandi bamuwoola awuleere, naye ye kemeeda lukali okhulomalomera amukulu ati, “Mwana wa Daudi, ngwiire esisa!” ⁴⁹ Manu Yesu kema kawoola ati,” Mumulange.” Balanga Muwofwu we moni, bamuwoola baati, “Guma omwooyo! Siingira! akhulanga.” ⁵⁰ Kasukuna era enguwo yaye, katumatuma namakulu kasiingira kacha eyiri Yesu. ⁵¹ Yesu kamukowolamo kawoola ati, “Odakha nkhukholere si?” Muwofwu we moni kamuwoola ati, “Labbii, ndakha okhuwona.” ⁵² Manu Yesu kawoola ati, “Cha,” “okhufukiirira khwawo khukhuwoniisye.” Wangu wene kalimbula kalonda Yesu khungira.