Okhuwoniya Khwo ‘Musaacha Owalikho Dayimooni ¹ . Beecha boola engerekha we nyaanja musitudu esy’Abegeresene. ² . Yesu nikatula mu’lyato, wangu wene omutu owalikho dayimooni owatula muηηani bawukaanana. ³ . Omusaacha ono kamenyanga muηηani, nga yiwuma muutu onyala khandi kamuwowa ata khu lujegere. ⁴ Olwokhuba amakhabi mangi kawoywaanga amakhono na'makulu ne enjegere, ne kakudulaanga enjegere khu'makhono nakhalaka ne mitalimbwa khu'makulu. Akhaya okhubaawo omuutu owamaani yeesi omunyala. ⁵ Esiro nende esideete kaliriraanga muηηani nende khungulu nikekheenga nende amakina. ⁶ Ne nikawonera Yesu aleeyi, kerukha kakwa khumakhumbo kaye kamusigamira mu moni chaye. ⁷ . Kakhuumula nende ekono ekhoongo nawoola ati, “wundakhakho si, Yesu, omwana wa Were, oli amukula lukali? Nechubire eyiri Were oti syoocha khunsandya!” ⁸ Olwokhuba Yesu kali amuwooye ati, “Tula khu musaacha ono, ewe omwoyo mubi!” ⁹ . Kamuteeba ati, “Eriita lyawo niiwe naanu?” Kamukowolamo ati, “Eriita lyaange niise Legioni,” “Olwokhuba khuli bangi.” ¹⁰ Kekalikhira Yesu amakhabi namakhabi akhaye okhubeerusya mu situndu esyo. ¹¹ . Ambi awo khu lugulu waliwo eyicho khoongo elye mbiichi niryaaya, ¹² . dayimoni chasaba Yesu nichiwoola chiiti, “Tusiindikhe khwingire mu mbiichi; ¹³ . Kachiwa owunyala, dayimooni chamutulamo cheengira mu'mbiichi. Eyicho, eryoola ambi elifu chibiri, lyabbabulukha lyaakwa mu nyanja lyebira. ¹⁴ . Manu abali ni bachaaya beerukha baawoolera abomu siko nende abomubyalo, beecha okhuwona ebibeeyewo nga nibiri. ¹⁵ . Niboola ali Yesu, bawona omusaacha owalikho dayimooni nikekhaaye nikambaaye; naalimo amakesi, oyo owalikho Legioni batya. ¹⁶ . Abo abasiwona esyo babakaniyayira ebibeye khumusaacha o'walikho dayimooni__ nende ebye mbiichi byosi. ¹⁷ Abaatu bachaaka okhumwekaIikhira Yesu atule mu syalo syawe. ¹⁸ . Ne Yesu nikali nikeengira mu lyato, oy'omusaacha owalikho dayimooni kamwekalikhira ache naye. ¹⁹ . Yesu kakhaya, ne kamuwoola ati, “kowolayo engo eyiri abaatu bawo obawoolere nga nibiri ebikhuluutu omwami byakhukholeeye, khandi nga lwakhukwiriye esisa.” ²⁰ . Manu omusaacha katulawo kawawo kachaaka okhuwoolera abaatu mu Dekapoli ebiitu byamaani Yesu bya'mukholeye, ne abatu boosi bawuka. Omukhaana Mufu Nende Omukhasi’mulwaaye ²¹ . Yesu lundi kambukhira mu lyato kola khulukerekha lwenyanja, esidiikha sikhoongo syewuusira ali naali wambi nenyanja. ²² . Mulala khubakhuluutu benyumba ya Were eriita lyaye Yayiro, kecha awo. Nikawona Yesu, kamukwa mu makulu ²³ kamwekalikhira lukali naawoola ati, “Omwana wange omukhaana omuyere ali okhufwa. Nkhwekalikhira wiiche omuteekho amakhono kawo akowolemo owulamu alamukhe.’’ ²⁴ . Manu Yesu kaacha naye. Esidiikha sikali syamulonda nisimuyiindikaniya. ²⁵ . Musidiikha omwo mwalimo omukhasi owalwaala okhwidikhirira nikhumumalirekho emyaaka ekhumi nende chibiri. ²⁶ Nawonaawonire lukali mu basawo bangi nakhosesiise byoosi bikali nabyo, nga si ali esimuyeeda musifwo syokhubakho wulayi kemedaanga wemeeda okhuba wubi. ²⁷ . Nikawulira enfuma ya Yesu, katulira emukongo mu sidiikha kaadiira khu nguwo ya Yesu, ²⁸ .Olwokhuba kabaasa mumwoyo ati, ‘’Nindiira wudiira khunguwo chaye, mba ndawone.” ²⁹ Wangu wene okhwidikhirira khwakamirawo kawulira mu'mubiri kwaye ati awonire ensaando yaye. ³⁰ . Wangu wene Yesu kamanya ati amaani akawoniya kamutuliremo. Kakaluukhana musidiikha kateeba ati, ‘’Naanu odiiye khunguwo change?’’ ³¹ . “Abeeki baye bamuwoola baati, “Waawona esidiikha nga lusikhweyiindikanisyekho, khandi wateeba oti, 'naanu okhwediiyekho?'’’ ³² . Ne Yesu kemeeda okhutingaala awone oyo osikholire. ³³ Naye omukhasi, olwokhumanya ebyali nibimwekholekhirekho, kaacha kamukwa mumakulu natengerekha no’wuti, kamuwolera amasima koosi. ³⁴ . Kamuwoola ati, “Omukhaana, okhufukirira khwawo khukhuwoniisye. Weweerewo ne’mirembe owoneye erala ensaando yawo.” ³⁵ Ne Yesu nikali nasilomaloma, abasaacha bandi abatula mu nyumba ya Yayiro, ewo mukhuluutu we nyumba ya Were. Becha nibawoola baati, “Omukhaana wawo afwiye, onyaasira siina khandi omwekesa?’’ ³⁶ Ne owutafaayo khu bibawoola, Yesu kawoola omukhulutu we nyumba ya Were ati, “Syotya; fukirira wufukiirira.’’ ³⁷ . Sikafukiirira omuutu yeesi okhucha naye okhutusakho Petero, Yakobo nende Yokana mwanaaηηina Yakobo. ³⁸ . Ne niboola mu nyumba yo’mukhuluutu we’nyumba ya Were, Yesu kawona okhuchokaana, nabalira, nende abakhubba wuuwi. ³⁹ . Manu kengira kabateeba ati, “Siina esibachokaaniya nende esibalisya? omwana khaba syafwiye, okhutusakho akonire wukona.’’ ⁴⁰ . Abaatu bamuchekha lukali. Ne nikabatusa boosi, kayira simwana wo'mwana nende ηηina nende abo abeeki baye bakali nabo, kengira omwana mukali. ⁴¹ . Kaadiira omukhono kwo'mwana kaamuwoola ati, “Talisa kumi!” (Amakhuluutu kaasyo mbo, “Mukhana muwere, Nkhuwoola nti siingira!”). ⁴² . Wangu wene omukhaana kasiingira kakenda kewodooniya (Kali ne'myaaka ekhumi nende chibiri.) Khulwasino abaatu bawuka okhuwuka okhwamaani. ⁴³ . Kabachwichwisa lukali Omuutu yeesi akhaye okhusimanya esyo, kabawoola bamuwe esyo’khulya.