¹ Olwoola Yesu kayiriwa no'mwoyo mwolerefu mu sibbarara okhukhemewa sitani. ² Nikamala okhuwoonga endaalo amakhumi kane, esideete nende esiro, enjala kho yamuluma. ³ Omukhemi keecha yaali kamuwoola ati, Noba noli Omwana wa Weere, woola amakima kano kekhole ebyokhulya. ⁴ Yesu kakowolamo kawoola ati, Syawandiikiwa siiti: Omutu syabaanga mulamu khulwebyokhulya byoɳɳene, okhutusakho nawuli mboosi eyitula mu khanwa wa Weere.”’ ⁵ Khandi sitaani kamuyira khu siko syolerefu, kamuta khu sisuli sye’nyumba ya Weere, ⁶ kamuwoola ati, “Nooba nooli mwana wa Weere, tuuma okwe asi.” Olwokhuba syawandiikiwa siiti: “'Alikhutumira bamalayika baye, bakhudiiririre mu makhono kaawe, okhaye okhwekumula khukina. ⁷ Yesu kamuwoola khandi syosi syawandiikiwa siiti: Syokhemanga Omwami wawo Weere. ⁸ Khandi, sitaani kamuyira khu lugulu oluleeyi lukali kaamwekesa ebyaalo nowuyiinda wa byo. ⁹ Kamuwoola ati, Ebyo byoosi ndabikhuwe, nonafuumale wanyinamira. ¹⁰ Yesu kamuwoola ati, Ntulekho, sitaani! Olwokhuba syawandiikiwa siiti: Winamiraanga Weere, khandi omukholeraanga yeɳɳene.’” ¹¹ Awo sitaani kamulekha, bamalayika becha bamukholera owuyeedi wukali . Yesu Achaaka Okhuwuulira ¹² Olwoola Yesu nikawulira ati Yokana bamudiiye, kakowolayo e Ggaliaaya. ¹³ Natulire e Nasaaleesi kacha kamenya e Kaperunawumu, esiri khu nyanja mu syaalo sya Sebbulooni nende Nafutaali ¹⁴ okhwoseresa emboosi nnabbi Yisaaya yi kalomaloma nawoola ati: ¹⁵ Esyaalo Sebbulooni nende esyaalo sya Nafutaali, khungira yenyaanja, engerekha wo mwaalo Yoludaani, e Ggaliraaya asyaalo syabateende__ ¹⁶ abatu abali nibamenya mu siirema bawene owulafu wungi; nende abo abalingi mu syaalo esye siinikha syokhufwa owulafu wubawonekheye. ¹⁷ Okhutula awo okhucha mu moni Yesu kachaka okhuwuulira nawoola ati Mweyolobye, olwokhuba Owenengo womukulu wuli ambi okhwoola.” Yesu Alaanga A Beeki Abasookha ¹⁸ Yesu nikali nakeenda hu lukerekha lwe’nyanja ye Galiraaya, kawona abenda ndala babiri, Simooni yibalaanga Petero nende Andereya mwanaaɳɳina. Ni basukuna enjero mu nyanja, olwokhuba bali abanaabi. ¹⁹ Kabawoola ati, “Mwiiche mu noonde, nja okhubakhola mube abanaabi ba’batu.” ²⁰ Mangu ako balekha enjero bamuloonda. ²¹ Yesu nikasudakho mu moni, kawona abenda ndala bandi babiri, Yakobo omwana wa Sebedaayo nende Yokana mwanawaɳɳina. Bali mu lyaato alala nende saawe Sebbadeeyo, niboonga enjero chawe. Kabalaanga, ²² mangu ako, balekha awo eryaato nende saawe bacha nende Yesu. Yesu Awoniya Abalwaye ²³ esu kamalakho Galiraaya, yoosi nga abasomesera mu makhuɳɳaaniro kaawe, nawuulira enjiri eyo’wene’ngo, khandi nga awoniya owulwaye woosi nowuchuuni woosi mu batu. ²⁴ Efuma yaye yaswaaniya Siriya, bamuleetera boosi abali abalwaaye, abali ni bawambiswe endwaye chitasi nasirala, nende ebibasandya, nende abemisaambwa, nende abentulume, nende abali ni bakokoomba, kabawoniya. ²⁵ Ebidiikha nebidiikha okhutula e Galiraaya, nende e Dekapoli, e Yerusaalemi, e wuYudaaya nende engerekha wo mwalo Kwa Yoludaani byamulonda.