¹ Mu ndaalo echo Yokana Omubatiisi kecha, nga awuulira mu sibbarara sye wu Yudaaya, ² nawoola ati, mweyolobye, olwokhuba owenengo wo mwikulu wuli ambi okhwoola. ³ Khubanga ono nje oyo owalomalomwakho okhubita mu nabbi Yisaaya, nawoola ati: “ekono lyooyo olomalomera amukulu mu sibbarara, ati, ‘Mutereese engira yO’mwami, mukololose engira Chaye.’” ⁴ Naye Yokana oyo kambalaanga enguwo echowooya owe ɳɳamira, nga keewoya olukhoba olweseero mu siwuno. Ebyo’khulya byaye byalingi ensike nende owuukhi owenjukhi echerwaanyi. ⁵ Abatu batulanga e Yerusaalemi nende mu wuYudaaya woosi nende ebitundu byoosi ebisibiranire Yoludaani. ⁶ Nibeyolobyanga ebibi byawe, kababatisiraanga mu mwaalo Yoludaani ⁷ Naye nikawona aba Falisaayo bangi nende aba Saddukaayo ni betusiiseyo nibeecha yikali nabatisira, kabawoola ati: Enywe abaana ba maradwaaɳɳi! nanu owabalawula okhwirukha etima lya Weere ericha okhwiicha? ⁸ Manu mwekese ebyaamo ebyekesera erala muti mweyoloobiisye. ⁹ Mutabaasa mu myooyo chenywe muti, ‘Khuli nende Yibbulayimu kuuka yefwe.’ Olwokhuba mbawoola nti Weere anyala mu makina kano okhutusiramo Yibbulayimu abaana. ¹⁰ Naye wunanu embasa yiteeywe khusisikha syemisaala, wuli musaala okutaama ebyaamo ebirayi kunatemewe, kusukuniwe mu muliro. ¹¹ Ese mbabatiisa nende amaachi olwokhweyolobya. Naye oyo olicha nimbweyewo kankhirakho amaani sinkhoyera nokhudiira khu biraato byaye. Oyo alibabatiisa nomwoyo mwolerefu nende omuliro. ¹² Oluderu lwaye lumuli mu makhono, acha okhukhoonja emere endayi awunge mu syaaki, naye omukhuuchi alikusaamba nende omuliro okutasima. Okhubatiisiwa Khwa Yesu. ¹³ Manu Yesu katula e ggaliraaya koola khu Yoludaani eyiri Yokana amubatiise. ¹⁴ Naye Yokana kali adakha okhukhaya, nga awoola ati; Ese ndakha ewe okhumbatiisa, nikhaandi ewe niiwe owichire yindi? ¹⁵ Naye Yesu kakowolamo kaamuwoola ati, Lekha sibe sityo khu lwa wunaanu; olwokhuba situkhoyera siityo okhwoseresa owolerefu woosi. Manu Yokana kafukirira. ¹⁶ Yesu nikamala okhubatiisiwa, wangu weene katula mu maachi, wona, ekulu lyamwikukhira kawona omwoyo wa Weere nikeekha nga ewuusi kamumeseryakho. ¹⁷ Manu ekono niritula mukulu nga liwoola liiti, Ono nje omwana wange, yiindakha: yinsangaalira lukali.