¹ Yesu ni kawona ebidiikha, kaniina khu ntulo wolugulu kekhala asi. Manu abeeki baye becha yali, ² kachaka okhuwuulira nawoola ati: ³ Bali nende enkhabi abo abaati mu mwoyo, abo Owenengo wo mukulu waawe. ⁴ Bali nende enkhabi abali mu ngisa, olwokhuba abo balisangaasiwa. ⁵ Bali nende enkhabi abaloonga, olwokhuba abo balisikhira esyaalo. ⁶ Bali nende enkhabi abalumwa enjala nowuluwo khulwo wolerefu, olwokhuba abo bacha okhwikuta. ⁷ Bali nende enkhabi abo abesisa, Olwokhuba abo balikwiirwa asisa. ⁸ Bali nende enkhabi abali nende omwoyo omulayi, olwokhuba abo baliwona Weere. ⁹ Bali nende enkhabi abakowosa abatu alala, olwokhuba abo bakhalangiwe abaana ba Weere. ¹⁰ Bali nende enkhabi abawalaniwa khu lwowolerefu, olwokhuba abo owenengo wo mukulu wawe. ¹¹ Enywe muli nende enkhabi ni banabanyekenge, ni babasaandya ni babatakho emboosi embi yi mutakholire khu lwange. ¹² Musangaale mwekhoye lukali, olwokhuba omusaara kwenywe mukali mukulu, olwokhuba batyo nje lu bawalaniwa ba nnabbi abaliwo khale ni mutabawo. Omunyu Nende Owulafu ¹³ Enywe muli munyu kwe syaalo. Naye omunyu ni kuwaamo echamu, kwakhakowosewamo kutye khandi? Sikukhoyera khandi, okhutusakho okhusukuniwa erwanyi abatu okhukusenakirira. ¹⁴ Enywe muli mubasu kwe syaalo. Esiko nisyombakhiwa khu lugulu, sisinyalikha okhukisiwa. ¹⁵ Abatu sibaambya etaara khandi balita asi wesimweero. Okhutusakho balita amukulu khu sisiindi syaalyo, kho lyadukhire wulayi abatu boosi abali mu nyumba. ¹⁶ Mungeri nasirala owulafu wenywe wumulikhenge wutyo eyiri abatu, bawonenge ebiitu birayi bimukhola kho bakiniye senywe oli mukulu. Okhwoseresa Amalako. ¹⁷ Mutabaasa muti neecha okhutusawo amalako oba ebya ba nnabbi; si necha okhutusawo okhutusakho okhwoseresa. ¹⁸ Olwokhuba mbawoola masima nti ekulu nende esyaalo okhwoosa lubiriwaawo, enjukuta ndala ata akhatonyese khalala akhomumalako sikhaliwaawo, okhwoosa byoosi lubirimala okhwolerera. ¹⁹ Manu nawuli onakhalakenge erala khu malako ako ata erikhiramo owutono khandi nga asomesa abatu atyo alilangiwa omutono mu wenengo wo mukulu, naye wuli anakadiireenge khandi nga akasomesa nje, oyo olilaangiwa omukhuluutu mu wenengo owo mukulu. ²⁰ Olwokhuba mbawoola nti, okhutusakho nga owolerefu wenywe wukhiririsa owolerefu wa bawandiisi nende owaba Falisaayo, si mulingira ata nawutono mu wenengo wo mukulu. Okhwiita ²¹ wawulira ngasyawolewa nabakhale nibawoola baati, Siwitaanga, naye omutu naneteenge anabeenge aniyeye omusango, ²² Ne sesi mbawoola nti, nawuli mutu odiirira owasye etima, aliba aniyeye omusango. Khandi, onawolenge owaasye ati engawo yino, okhoyire eyiriwe mu lukhiikho. Naye onawoolenge owasye ati, omusiru ono!Aliba muwudinyu wokhusukuniwa mu muliro okutasima. ²³ Khulwesyo nobaanga nooletire esiwanwa syawo khu olutaari ne wichulisa oti olikho nowutawulirisaniya nowasyo musitu syoosi, ²⁴ lekha awo esiwamwa syawo khu olutaari. Okowoleyo otaangire omale okhufukiirisaniya nowaasyo kho okowole oteeyo esiwaanwa syawo. ²⁵ Fukirisaniyanga wangu nende oyo okhuwabira, sikhole ni musiiri khugira olwokhuba anyala kakhuwaayo eyiri abakheengi bemisaango. Abakhengi bemisaango bakhuyira eyiri abasirikale, abasirikale bakhuta mu jeera. ²⁶ . Masima nkhuwoolera nti, Syolitulamo okhwoosa lwolituunga nakhakhera akhasembayo. Owudaamba ²⁷ Mwawulira nga syawoolewa siiti, Syokholanga owudaamba. ²⁸ Naye mbawoolera amasima nti nawuli otingaala omukhasi nemoni chowekombi, aba amalire okhukhola owudamba naye mu mwoyo kwaye. ²⁹ Manu emoni yawo eyomukhono omuluungi niyakhakira wakwa musibi, yituseemo oyisukune ale. Sirayi esitundu sirala hu mubiri kwawo okhusikhirira okhukhira omubiri kwawo kwoosi okhusukuniwa mu muliro kutasima. ³⁰ Khandi ata omukhono kwawo omulungi nikwakhakira wakwa musibi, kutemekho okusukune ale. Sirayi okhufwirwa esitundu syawo sirala okhukhira omubiri kwawo kwoosi okhucha mu muliro kutasima. Okhulobana ³¹ Khandi syawolewa siiti, Omutu nikerusyaanga omukhasi waye, amuweenge ebbaruwa eyimwirusya. ³² Naye Sesi mbawoola ati, nawuli mutu onerusyeenge omukhasi waye, olwesisobyo syoosi okhumalakho esyowudaamba, anabeenge aleteeye omukhasi oyo okhuba omudaamba, nende oyo onadekhyeenge yiberusya anabeenge akholire owudaamba. Okhulayira ³³ Khandi, mwawulira abakhale nibawoolerwa baati, Otakhalakanga esilayiro syawo, naye wosereseraanga Omwami biwalayira. ³⁴ Naye sesi mbawoola nti, otalayiranga ata nawutono: ata mukulu, olwokhuba nje esisaala sya Weere; ³⁵ Ata esyaalo, olwokhuba ye nje khwaata amakulu kaye; ata nende Yerusaalemi, olwokhuba nje esiko syomwenengo omukhuluutu. ³⁶ Khandi ata otelayiranga omutwe kwawo, olwokhuba syonyala okhukalukhaniya akhafiiri khalala oba khalafu oba akhamali. ³⁷ Naye emboosi chenywe ni mufukiriiye, chibenge Eee, Eee, ni mukaanire chibenge Khaba, Khaba. Naye ebikhira ebyo bitula eyiri omubi. Emoni Khu Moni ³⁸ Mwawulira abakhale nibawoolerwa baati, Emoni khu emoni, nende eriino khu lino. ³⁹ Naye sesi mbawola nti, mutakayiraanga omubi. Naye omutu nakhukhubbanga khu lusaya lwo mukhono omulungi omukalukhanisiryanga nende olwomukooda lwoosi. ⁴⁰ Omutu nadakhanga okhukhuwabira okhuyira ekanju lyawo, omulekheraanga nende ekooti lyawo lyosi. ⁴¹ Omutu nakhuyinganga okhukeenda naye eyiro lala, kendaanga naye nende eryokhubiri. ⁴² Okhusabanga omuwanga, omutu nadakhanga okhumuwola otamukhubbanga omukongo. Okhudakha Abasiku ⁴³ Mwawulira nisiwolewa siiti, Odakhanga okhusibiranire, osyuulenge omusiku wawo. ⁴⁴ Naye ese mbawoola nti: mudakhenge abasiku benywe khandi musabireenge ababawalana, ⁴⁵ kho mubenge abaana ba Senywe oli mukulu. Olwokhuba eryuba ye alyadusira ababi nende abalayi, enfula yikwira abalayi nababi. ⁴⁶ Olwokhuba ni munadakheenge abo ababadakha boɳɳene, munafunenge siyanwa siina? Nabasolosa omusolo boosi si nje bakhola batyo? ⁴⁷ Nimunakheseenge abasuku beenywe booɳɳene anabengewo ngawuhana si? Abateende sibakhola batyo? ⁴⁸ Khulwesyo mube abolerefu nga seenywe oli mukulu, lwali omwolerefu.