¹ Awo olunyuma lwebyo Omwami wefwe nadoola abeeki bandi amakhumi musanfu, nabatuma syababiri babiri okhumwetangirira okhucha mu nawuli siko omwene yikali natekekhire okhucha. ² Nabawoola ati, ekessa lingi, ne abakesi nje abatono. Manu mwekalihire Weere wabakesi atume abatu bayera bakhole omulimo kwaye mundalo yaye yokhukesamo. ³ Muche! Mbatuma enywe ngotukoondi tudotto akati mu manani. ⁴ Mutacha nesawo, oba olukhoba, oba ebiraato, khandi mutakheesa omutu yeesi khungira. ⁵ Na wuli nyumba yimwingiramo, mutangirenge okhuwoola muuti; enkhabi chibe mu nyumba muno. ⁶ Nimunabeengemo omasaacha wenkhabi, enkhabi chenywe chinamubengekho; ne nisitabeenge siityo, chinabakowolerenge. ⁷ Mu nabeenge mu nyumba eyo, nga mulya, nga munywa khu byabeene nyumba, khulwokhuba omukhosi womulimo, akhoyera omusaara, mutatulanga mu nyumba ndala okhwingira mu yiindi. ⁸ Na wuli siko simwolangamo, manu nibabasangalira, mulyanga syosi syoosi sibanabenge nibabatereye mu moni chenywe. ⁹ Muwoniyenge abalwaaye abali omwo, mubawolenge muuti. Owenengo wa Weere wubasudirekho ambi. ¹⁰ Ne nawuli siko simwolangamo bakhaya okhubasangalira, mutulanga mu makira ke siko esyo nimuwoola muuti, ¹¹ Ata nolufu lwo musiko syenywe, olweddiye khumakulu keffe khulubekhukhumulirakho Ne mumanye sino muuti: Owenengo wa Weere wusudire ambi. ¹² Mbawoola enywe nti Sodoma yiriba nokhuwonawonesewa okhutono okhukhirakho esiko esyo. ¹³ Endaalo chikhwakanire ewe, Kolusini! Chikhwakanire ewe, Besusayida! Khulwokhuba, ebyamaani byakholewa ewenywe, khamakha biba byakholewa e Tuulo, nende Sidoni, bano baba beyolobya khale, nibekhaye mu bicheere nekokhe. ¹⁴ Ne, Tuulo nende Sidoni biriba no'khuwonawona okhulibakho kayikayi khuludaalo lwo musaango okhukhira enywe. ¹⁵ Ne ewe, Kaperunaumu, olisingisiwa okhwola mu bireesi?Bbe, oliisiwa okhwoola e makombe. ¹⁶ Obawulira enywe, aba awulira esse, olekeresa enywe, aba alekeresa nange; ne oyo olekeresa esse aba alekeresa owantuma. ¹⁷ Abo Nsanfu, bakowola nesangaalo, ni bawoola baati, Omwami, nende ba dayimoni batuwulira mu litta lyawo. ¹⁸ Kabakowoolamo ati: Nawona sitaani okhutula mukulu nakwa assi nga olumesiya. ¹⁹ Muwone, mbaweye owunyala owokhusenaanga khu miyokha nende otwere echo'wusiba nende amaani koosi akomusuku khandi siwanabengewo esibakhola owubi khaba nawutono. ²⁰ Ne mutasangalira esyokhuba siiti ba dayimoni babawulira, ne musangaale okhuba ametta kenywe kawandikiwa mwikulu. ²¹ Awo musikha esyo Yesu, nikechuuye esangaalo mu mwoyo mulafu, kawoola ati; Nhwebasa ewe, Bbabba, Weere wekulu nesyalo, khulwokhuba bino wabikisa abakesi nende abasoma, ne wabiwikhulira abaana bayere. Eee, Bbabba, olwokhuba nje lusyadakhiwa siityo mu moni chawo. ²² Byoosi Babba nje owabiimba, awuma omutu omanyire omwana nga lwali okhutusakho simwana, nende okhumanya lata yefwe nga lwali, okhutusakho omwana, nende oyo, omwana yadakha okhumuwikhulira. ²³ Namala akalukhanira eyiri abeeki baye nabawolera mu wekisi ati, chiri nomukisa emoni chiwona enywe bimuwona. ²⁴ Khulwokhuba mbawoola nti, ba nabbi bangi nende abenengo badakhanga okhuwona enywe bimuwona, ne sibasiwona badakha okhuwulira enywe bimuwulira ne khaba sibabiwulira.Olukaado LwoMusamaliya Mulayi. ²⁵ Khuludaalo lundi, omulyepulyepu mu malako nikeema nga ateeba Yesu ati, Omusomesa,nkhoole si okhusikhira owulamu wutaliwaawo? ²⁶ Namukowolamo ati, syawandikiiwa siitye mu malako? Osisoma otye? ²⁷ Kakowolamo ati:Dakhanga omwami Weere wawo nomwoyo kwawo kwoosi nende ebibaaso byawo byoosi na maani kawo koosi namakesi kawo koosi dakha nokhusibiranire nga luwedakha omwene. ²⁸ Yesu kamukowolamo ati, Okowoyemo wulayi.Kholanga otyo, onabenge nowulamu. ²⁹ Naye olwokhutadakha okhukhirwa, sakira kateeba Yesu ati, Owunsibiranire nje nanu? ³⁰ Mukhumukowolamo Yesu kamuwoola ati: Aliwo omutu owali atula e Yerusalemi nikekhirira e Yeriko, nikemawo akwa mu basiku. Bamwambula bamukhubba, ni bawaawo, bamulekha ngawumakho khatono okhufwa. ³¹ Khawona kali kekhirira khungira yene eyo, ne nikawona omusaacha oyo yibakhubbire, kakhededya, kamulekha awo. ³² Nomu Leefwi yesi atyo, nikamuwona mu sifwo esyo kakhededya. ³³ Naye Omusamaliya, nikali nakenda, kabita omusaacha akali: ne nikamuwona, kamudirira esisa. ³⁴ Kasuda ali, kamuwowa ebinyuwu byaye, kamuchukhakho amafuta nomwenge namuta khunsunkhiri yaye, namuleeta mu sifwo syabakeni abakona, kamulabirira. ³⁵ Oludaalo lulondakho kawukula erubya chibiri ensangasa kachiwa omwene nyumba, kamuwoola ati, Mulere, esitu syosi syoliba nokhosesise okhukhisawo ningowooye ndikhukowoserawo. ³⁶ Nanu khu badatu bano yobaasa oti nje osibirana nomusaacha wakwa mu makhono kabasiku? ³⁷ Omulyepulyepu mu malako kamuwola ati, Oyo owamukwira esisa.Yesu kamukowolamo ati, Weesi cha okhole otyo.Mudaala lyawe Malisa Nende Malyamu ³⁸ Nga Yesu nende abeeki baye nibali khungira nibawaawo, boola khu lukoongo, yi omukhasi olangiwa Malisa kasangalira Yesu mu daala lyaye. ³⁹ Ne omukhasi oyo kali nende mwanaηηina olangiwa Malyamu, owekhalanga mu makulu ko’mwami wefwe, natekeresa emboosi chaye. ⁴⁰ Ne Malisa kalingi ne’mirimo mingi echokhukhola, ni keecha ali, namuwoola ati; “Omwami, syofwayo olwa mwanaama okhundekha okhuba nindidikhana senηηene? Manu muwoole kanjeedekho!” ⁴¹ Ne Omwami wefwe kamukowolamo ati, Malisa, Malisa weralikhirira olwokhuba oli ne’bitu bingi, ⁴² ne esidakhiwa siri sirala syonηene olwokhuba Malyamu adooyewo omukawo omulayi, okutalimutusiwakho. Okshusomesa Khwa Yesu Khu Khwekalikhira