¹ Yesu nikamala okhulanga abeeki baye alala ekhuumi na babiri, kabayeresa owunyala namaani okhwirusiya dayimoni nende okhuwoniya amalwaye, ² kabatuma okhucha okhuwuulira owenengo wa Weere, nende okhuwoniya abalwaye. ³ Kabawoola ati: mutakinganga esitu syosi syoosi__ ata endawukhi, awuma ensawo, awuma ebyokhulya, ata efwesa, khandi mutabanga nende ekanju chibiri. ⁴ Ne wuli nyumba mu munengirenge, mubenge omwo, era omwo nje mumuba mutulenge nimutula mu siko esyo. ⁵ Abatu abatabasangalirenge, nimunabenge nimutula mu siko esyo, mukhukhumulenge olufu lwo mu makulu kenywe, sibe nga owujulisi owubalumirisa. ⁶ Manu baacha bewodokhaniya ebiko byosi byoosi, nibawuulira enjiri, nibawoniya abatu, na wuli awutu. ⁷ Awo omwenengo Teturachi, kawulira byosi byoosi ebyakholewa. Kakanakana lukali, khulwokhuba abandi bali bawoola baati Yokana asyuukhiye mu bafu, ⁸ abandi baati Eriya kali awonekhire, ne abandi baati, ba nabbi bakhale, mulala khwabo asyukhiye. ⁹ Naye Kerode kawoola ati, Natema khu Yokana omutwe. Ne oyo nje nanu omwene mboosi chakira awo chimbulira? Manu kakesakho okhumuwona. Yesu Aliisa Elifu Chitaanu ¹⁰ Awo abatume nibakowola, bamwekesa byosi byoosi bibali nibakholire. Ne abayiira entulo, muwekisi mu siko esilangiwa Besusayida. ¹¹ Ne ebidiikha nibyamanya, byamulondakho. Kabasangalira, kalomaloma nabo emboosi chOwenengo wa Weere, nende abo abali nowetaafu wokhuwonesewa kabawoniya. ¹² Awo eryuuba lyali likoloobya, abo ekhuumi na babiiri beecha yaali, bamuwoola baati, sewula abatu bache mu biko nende mu byalo ebyewodokhanisye, bakonye ebyokhulya nende awokhukona, khulwokhuba ano khuli mu syalo lukkali. ¹³ Kabakowolamo ati, Mu bayerese esiitu balye. Nibamwekesa baati, efwe khuwuma siitu okhutusakho emigaati chitaanu n ‘enηηeni chibiiri__ fwana khuche mukhatale khukule ebyo’khulya binamale esidiikha sino.” ¹⁴ (Abasaacha baliwo nga elifu chitaanu). Nawoola abatume baye ati mubeekhase, mu bikanda bya abatu amakhumi kataanu kataanu.” ¹⁵ Abeeki bakhola baatyo.” Nibabeekhasa bosi boosi. ¹⁶ Ne awukula emigaati chitaanu nende enηηeni chibiri, nasingisa emoni chaye mukulu, nikeebasa, nabikhalakakhalaka, nayeresa abatume baye okhukawula abatu. ¹⁷ Balya, bekuta bosi boosi, abatume badoola ebyali nibikhukhumukhire bechusa ebimwero ekhumi na bibiri. Petero Kaatula Yesu Kurisito ¹⁸ Awo olwola, Yesu kali nga’saba ayenηηene, abeeki baye bali alala naye. Nabateeba ati, “mubasa ebidiikha bino binaanga nanu?” ¹⁹ Bamukowolamo baati, abandi bakhulanga Yokana omubatiisi; ne abandi baati Eriya, ne abandi baati ba nabbi bakhale mulala khu abo alamukhire. ²⁰ Nabawola ati: nanywe munaanga nanu? Petero nakowolamo namuwoola ati niwe Kurisito wa Weere. ²¹ Yesu kabachwichwisa nabawolera ati, mutawolerakho omutu yeesi emboosi eyo. ²² Nawoola ati sikhoyera omwana wo’mutu okhuwonawonesewa lukali nende okhwekaniwa nende abakofu nabawandiiki nabasomesa bamalako, ne khandi atekwa okhwitiwa, ne khuludaalo lwokhudatu asyukhisiwe abe omulamu khandi. ²³ Nabawoolera bosi boosi ati:Omutu yeesi nadakha okhunondakho, kerekherese khu lwaye, akiinge omusalabba kwaye nawuli wukhya, kanoonde. ²⁴ Khulwokhuba wuli odakha okhuwoniya owulamu waye aliwukosiya, naye olikosiya owulamu waye khulwange aliwuwoniya. ²⁵ Sirayi sina esirigasa omutu okhulya esyalo syoosi, ne nga amalire okhuwukosiya, oba okhweyita omwene? ²⁶ Khulwokhuba nawuli owundirirwa ensoni nende emboosi change, oyo nende omwana womutu alimudirirwa ensoni, lwalichira mu luyaali lyaye, nende olwa simwana nende mu lwa ba malayika abolerefu. ²⁷ Ne mbawolera amasima nti aliwo abemire ano, abatalikhomba khu khufwa okhwola lubaliwona owen’engo wa Weere. Okhukalukhanisiwa ²⁸ Awo olwoola, olunyuma lwendaalo munaana, kayira Petero, Yokana nende Yakobo, kaniina khu lugulu okhusaba. ²⁹ Awo lukaali nasaba, efwani yemoni chaye yakalukhana, enguwo chaye chakalukhana chaaba endafu lukali ngolumesiya lwenkhubba. ³⁰ Abatu babiiri, Musa nende Eriya, ³¹ bawonekha nibali mu'luyaali lubitiriye nibalomaloma nende Yesu. Khu khuwawo khwaye okhwali khucha okhwolerera mu Yerusalemi. ³² Petero nende bakali nabo bali bakunukha ne nibamokera erala, bawona oluyaali lwaye nende abatu babiri nibemire naye. ³³ Nga abasaacha nibali nibalekha Yesu, Petero kamuwola ati, Omwami wange, silayi efwe okhuba ano. Khwombakhe ebikaali bidatu__ silala syawo, esindi sya Musa, esindi sya Eriya. (Bino kabiwoola natamanyire byalomaloma.) ³⁴ Nikali asilomaloma, esireesi syecha syabawiikha, baba nokhutya nga lubali nibakotera mu sireesi! ³⁵ Ekono lyatula mu sireesi, niriwola liiti, “Ono nje omwana wange, yinadoola; mumuwulire.” ³⁶ Ekono eryo nirilomalomire, beyakana nga Yesu ali yenηηene. Abeeki bakisa sinno bakhaya okhuwolerakho omutu ebyo bi bali ni baweene. Okhuwona Khwo’musyani Owalikho Omwoyo Mub ³⁷ Oludaalo lulondakho, nibekha okhutula khu lugulu, esidiikha sikhoongo syamwakanira. ³⁸ Omusaacha mulala khubali mu sidiikha kalomalomera amukulu kawola ati, Omwekesa khwekalikhiye wewunje khu musyani wange khulwokhuba namwiwula omuderwa. ³⁹ Manu wona omwoyo mubi kumudiira, nikaayula; natachanatachana natusa efwobe mukhwanwa. Syamutulakho khangu khandi amalawo owulamu waye. ⁴⁰ Ne nekalikhira abeeki bawo okhukwirusiya ne sibanyala. ⁴¹ Yesu namukowolamo ati, Oo, enywe abemirembe chitafukirira khandi echakota, ndyakama liina okhuba nanywe nende okhubagumikirisa? Leeta ano omusyani wawo. ⁴² Ata omusyani nikali khwasicha, omwoyo mubi kwamudiira kwamusukuna assi natachanatachana lukali lwene. Ne Yesu kawalabira omwoyo mubi, kawoniya omusyani, kamukowosera simwana. ⁴³ Boosi bawuka lukali olwamaani ka Weere. Nibali basiwuka byoosi Yesu bikali nakholire, kawoola abeeki baye ati, ⁴⁴ Muwulirise wulayi emboosi chino chiindi okhubawolera: omwana womutu acha okhuwewayo mu mikhono cha batu. ⁴⁵ Ne khaba sibategeera sino si syekesa. Emboosi echo chakisiwa khubo, bakhaya okhuchitegeera, ne batya okhumuteeba amakhulutu ke’mboosi echo. Nanu Oliba Omukhongo Okhiririsa ⁴⁶ Okhuyingana khwachaka mu beeki nga bakoonya okhumanya nanu oliba omutangirisi wawe. ⁴⁷ Ne Yesu ngalukamanya ebyali mu bibaso byawe, kawukula omwana muwere, na musudiya ambi naye. ⁴⁸ Kabawoola ati, wuli onasangalirenge omwana muwere ono mulita lyange anabenge kansangaliye ese; ne oyo onasangalirenge ese , anabenge asangaliye oyo owantuma;khulwokhuba okhira okhuba omutono mwinywe mweesi__ nje okhira owukhongo. ⁴⁹ Yokana kawoola ati; Mwami wefwe khwawona omutu nikerusiya dayimoni mu litta lyawo khwakesakho okhumukaniya, olwokhuba simulala khwifwe. ⁵⁰ Ne Yesu kamuwoola ati, Mutamukaana,Khulwokhuba otaali musiku wenywe, ali khu luwande lwenywe.Okhuyingana Mu Samaliya ⁵¹ Endaalo chaye nichali nichiri ambi okhwoola okhuyiriwa mwikulu, Yesu kamalirira okhucha mu Yerusalemi. ⁵² Manu katuma ba wamuwanda okhumutangirira, abacha mu lukoongo lwa Samaliya okhumutekekhera ebitu. ⁵³ Ne abatu sibabasangalira khulwokhuba kali acha e Yerusalemi. ⁵⁴ Abeeki baye Yakobo nende Yokana nibawona bino, bateeba baati,Omwami, odakha khulange omuliro kwikhe okhutula mukulu kubasikhirise? ⁵⁵ Ne Yesu kakalukhana, kabawalabira, ⁵⁶ batulawo baacha mu lukoongo lundi. Ebidakhiwa Khwolonde Yesu ⁵⁷ Awo nibali bakenda khu ngira, omusaacha kamuwoola ati, Ndakhulondengekho wosi woosi wonabenge nocha. ⁵⁸ Yesu kamukowolamo ati, Amabbwe kali nende owiina, n'amayoni kali nebiswi, naye omwana womutu awuma ata atta omutwe kwaye. ⁵⁹ Nawoola omusaacha wundi ati; Nonde. Ne omusaacha kamukowolamo ati, Omwami, lekha male okhucha okhusiikha bbabba. ⁶⁰ Ne Yesu kamukowolamo ati; Lekha abafu basiikhe abafu basyaawe, ne ewe cha owuulire owenengo wa Weere. ⁶¹ Ne owundi kamuwoola ati, Ese ndakhulonde. Ne lekha mberi male okhucha okhusiiwula abo’munyumba yange. ⁶² Ne Yesu kamukowolamo ati, Awuma mutu odiira esyuma sirima khandi katingaala emukongo, syaba nakhoyera muwenengo wa Weere. Yesu Atuma Nsanfu