¹ Oludaalo lundi Yesu kali nga kekalikhira mu sifwo sindi. Nikamala, mulala khu beeki baye namuwoola ati, Omwami, tusomese okhwekalikhira, nga Yokana lukasomesa abeeki baye. ² Kabawoola ati, Nimwekalikhira, muwoolenge muuti: Bbaabba,eritta lyawo lifumisiwe, Owen’engo wawo wiiche. ³ Tuwerese olwalero ebyokhulya byefwe ebya wuli ludaalo. ⁴ Tulekheremo ebibi byefwe, Nga fwesi lukhulekheramo abatukhola owubi. Otatuyira mukhukhemewa okhutusakho otuwoniye eyiri Omusuku. ⁵ Namala abawoola ati, nanu khwiinywe oli nende omwicha, olicha ewaye musiro akati na muwoola ati, mwicha wange, mbole emigaati chidatu, ⁶ khulwohuba omwicha wange kechire atula mu lukendo, ne sindikho nende sinakhamuwa kaalya. ⁷ N'ola oli mu nyumba, nakowolamo ati, otankhedya. Ata nolwiiki lwiikale, esse nabaana bange, khumalire okhukona. Siinyala nasingira okhukhuwa esitu syoosi. ⁸ Mbawolera nti, nende akakhaba natanyala khusingira kamuwa esyokhulya khulwokhuba mwicha waye, ne olwowutatya womusaacha ono asingira kamuwa mu wungi byoosi byadakha. ⁹ Sakira mbawoola nti: musabe khandi muliyeresewa; mukoonye muluwukaana; mukhubbe koodi mulikulirwawo. ¹⁰ Khulwokhuba wuli mutu yeesi osaba ayiwewa; nende okoonya, kakaana; nokhubba koodi alikulirwawo. ¹¹ Khandi, naanu khwiinywe abewusi basaacha, omwana wawo musyani nakhusaba eηηeni, namuwa enjokha? ¹² Oba namusaba ekki namuwa otwere? ¹³ Nisiba enywe, ababi, mumanyire okhuweresa abaana benywe ebiyanwa birayi, senywe oli mukulu syalikhira lukali lwene okhuweresa omwoyo mwolelerefu abo abamusaba!” Yesu nende Beerusebuli ¹⁴ Yesu kali nga kerusya dayimoni eyali ni yitalomaloma. Awo dayimoni nikamutulakho, omudiimbe kalomaloma, esidiikha syawuka lukali. ¹⁵ Ni abatu bandi bawoola baati, Okhubitira mu Beerusabuli omusyani wowenengo wa dayimoni, sakira kerusya dayimoni. ¹⁶ Ne abandi nga bamukhema nibadakha abekese akhawonero akhatula mukulu. ¹⁷ Ne Yesu omwene nikamanya ebibaaso byaawe, kabawoolera ati: Wuli Owene’ngo woosi niwukawukhanamo wusikhirira ne nyumba niyikawukhanamo enyumba eyo yikwa. ¹⁸ Ne setaani nikawukhanamo omwene, owene’ngo waye wulyemawo wutye? Mboola bino khulwokhuba enywe muwola muuti nirusya dayimoni khulwa amaani ka Beerusabuli. ¹⁹ Wunanu nisiba mbo nirusya dayimoni hulwa amaani ka Beerusabuli, ne ababalonda nabo berusya dayimoni khulwa maani kananu? Sakira abeene abo balibakhengera emisango. ²⁰ Naye nimba nirusya dayimoni khulwa Weere, syekesa siiti owenengo wa Weere wubecheeye. ²¹ Omutu wamaani oli nebirwaniso naliinda olwanyi lwaye, ebitu byaye biba birayi. ²² Naye okhira oyo amaani namuseeta, amunyuula ebyokhulwanisa byaye bikeesika nasalaniya ebitu byaye. ²³ Oyo yeesi otali nange nje omusiku wange, khandi oteecha alala nange asalaniya. ²⁴ Omwoyo mubi natula mu mutu, abita mu bifwo bitalimo maachi nakoonya awokhuwulukhira, nakhaywa. Nawoola ati, khangowoleyo mu nyumba yinatulamo. ²⁵ Nikoola, kakaana enyumba ni njeye wulayi nibayitimbire. ²⁶ Wunanu acha kaleeta emyoyo mibi chindi musanfu ababi okhukhira oyo omwene, wunanu bengira baaba omwo. Manu ebyo’lunyuma byomutu oyo, biba bibi okhukhira ebyatangira. ²⁷ Awo olwoola nikali nalomaloma ebyo omukhasi wo musidiikha natusayo ekono lyaye nalomeralomera amukulu nawoola ati, Ali nenkhabi mama wakhwiwula khandi kakhukhusa. ²⁸ Kakowolamo ati, Okhukhirira erala bali nenkhabi abo abawulira emboosi ya Weere manu bayikholerakho.Akhawonero Kha Yona ²⁹ Nga ebidiikha ni byemeeda, Yesu kawoola ati, oluse luno lubi. Lukoonya akhawonero khebyamayiya, ne si luliwewa akhawonero okhutusakho akhawonero kha Yona. ³⁰ Khulwokhuba nga Yona lukali akhawonero eyiri abatu ba Ninefe, nasilala omwana womutu nje lwaliba akhawonero eyiri oluse luno. ³¹ Omwenengo mukhasi owe mwalo we syalo, alyeema mu musango alala nende abatu boluse luno, kabakhisa omusango. Khulwokhuba, katula esyalo yisyaakama okhutekeresa amakesi ka Sulemani, ne wona, okhira Sulemani ali ano. ³² Abatu abe Ninefe balyeema mu musango alala noluse luno bakhira omusango, khulwokhuba beyolobya olwokhuwuulira khwa Yona, ne wonakho okhira Yona ali ano. Etaara Lyomubiri ³³ Si ali owambya etaara kaalita mu wina, oba mukkati wesidubi, ne alita khu sisindi kho niwo abatu bawone nga lulyaadukha. ³⁴ Emoni yawo nje Etaara yomubiri kwawo, emoni chawo nichiba endayi, omubiri kwawo kwoosi kuba kwichuye owulafu. Naye nichiba embi omubiri kwawo kwosi kuba kwichuye esirema. ³⁵ Wona oti, manu, owulafu wuli mwiwe wukhaye okhuba esiirema. ³⁶ Nolwesyo omubiri kwawo kwoosi nikwichula owulafu, nga simuli esitundu sindi esyesiirema, kwosi kulichula owulafu ngetaara luyikhumulikhira nende owulafu waayo. Ebyengisa mukaaga. ³⁷ Yesu nikali namalire okhulomaloma, omu Falisaayo kamulanga okhulya naye, manu kengira kekhala okhulya naye. ³⁸ Omufalisaayo nikawona kawuka khulwokhuba Yesu sikesaaba kho kemawo kaalya. ³⁹ Manu Omwami kamuwoola ati, Enywe aba Falisaayo mwosa khumukulu wesikombe, nende khu wesikaye, ne mukkati mwinywe, muchuye omutolyo nende owubi. ⁴⁰ Enywe abatu basiru! Oyo owakhola ebyokhumukulu si nje mulala oyo owakhola ebyo mukkati? ⁴¹ . Ne muwe abaati ebiri mukkati wolukaye, kho ebisikaye bibe ebirayi yimuli. ⁴² Ne endaalo chibawukanire enywe aba Falisaayo, khulwokhuba musasula Weere silala syekhumi esyo wuyiinda wenywe nebyomundalo neryani lyoosi, amasima no khudakha Weere mubibita ⁴³ Mwakhakholire ebyemutwe nimutalekhireyo ebyenyuma nibitakholekhirwe. Endaalo chibakanire eywe aba Falisaayo, khulwokhuba mudakha ebisaala byo mu moni mu masinaggogi, nabatu okhubakheesera mu wutale. ⁴⁴ Endaalo chibakanire khulwokhuba mufwana ngebirindwa ebitalikho khawonero, abatu khubakendera nga sibamanyire. ⁴⁵ Mulala khubasomesa ba malako omulyepulyepu, kakowolamo namuwoola ati, Omwekesa, nolomaloma ebitu bino otyo fwesi oba otunyeka. ⁴⁶ Yesu kabakowolamo ati, Mwesi abalyepulyepu ba malako, chibawukanire enywe khulwokhuba mutwiikha abatu emikukku chibatanyala. Enywe abeene chimutanyala khugenηηakho no’lwaala lwenywe okhubayeeda. ⁴⁷ Endaalo chibawukaanire, khulwokhuba mwombakha ebirindwa bya ba nabbi, ne nga ba kuuka yenywe nje ababeeta. ⁴⁸ Nolwesyo muli bajulisi, khandi musiima ebikholwa bya ba kuukka yenywe khulwokhuba nje abeeta ba Nabbi nanywe mwombakha ebirindwa byaawe. ⁴⁹ Amakesi ka Weere sakira kawola kaati, Ndi batumira ba Nabbi nende abatume abandi khwabo balibeeta, ne abandi balibataakho enkhiinda. ⁵⁰ Nolwesyo oluse luno amabanga ka ba nabbi boosi akedikha okhutula khukhulongwa khwe syalo, ⁵¹ kutewe khu boluse luno okhutula khu mabanga ka Abbiri okhwola khu mabanga ka Zakaliya, owetewa akati wolutaari nende enyumba ya Weere. Yee, mbawoolera, aboluse luno baliba nomusango khu lwebitu bino byosi byoosi. ⁵² Endaalo chibawukanire enywe abasomesa balyepulyepu mu malako, khulwokhuba mwayira esisumuluso syamakesi. Enywe abeene simwengira, ni khandi mwakayira abali nibengira. ⁵³ Yesu nikatula awo, aba Falisaayo nabasomesa bamalako nibachaaka okhumuyinganiya lukali lwene, nokhumukhemeresa emboosi nyingi ⁵⁴ nibamuteka emboosi eyinatule mu munwa kwaye.