¹ Okukhero nikwawa, Paulo katumisa abeeki khandi, nikamala okhubakumya, kabasiiwula kawawo kaacha e Makedoni. ² Kakeenda nabita mu situndu esyo, nalomaloma emboosi nyingi echikumya eyiri abatu, kho khalekhale koola mu wuYonaani, ³ yikamenya emyeesi chidatu. Olwokhuba Abayudaaya bamukholera olukhwe nga nikali nali ambi akhwambukha okhucha e Busuli, kakhengawo okhukowolayo nabitira e Makedoni. ⁴ Kacha nende Sopateri omusyani wa Paulo okhutula e Bereya, Alisutaluko nende Sekundo okhutula e Ssesaloniika, Gayasi okhutula e Derube, Timoseewo yesi, nende Turofwiimu okhutula mu situndu sya Asiya. ⁵ Abasaacha bano bacha emutwe batulindira e Tulowa. ⁶ Naye khwecha khwambukha okhutula e Filipi olunyuma lwe’mbaga ye migaati echitaasi mibbakhe, ne endaalo chitaanu nichibitirewo khweyimbaniya khu bandi mu Tulowa yikhwamala endaalo musanfu. Yutuko Asyukhisiwa Mu Bafu Etorowa ⁷ Khu ludaalo olwamberi mu Ssabbiiti khwecha alala okhukhalaka emigaati. Paulo kalomalomera abatu ne, olwokhuba kadakha awewo oludaalo oluloondakho, kachanakana nende okhulomaloma okhwolera erala musiro akaati. ⁸ Yaliyo amataara mangi keene amukulu mu bisenge bye goroofwa yikhwawukananira. ⁹ Mu dinisa mwalimo omusyani omusiimbukha olaangiwa Yutuko, owali nakunukha endoolo lukali nga Paulo lukali nachanakana n'okhulomaloma. Manu endoolo nichamuyiingira, kakwa assi okhutula khu goroofwa eyokhudatu manu bamutusawo nafwiye. ¹⁰ Paulo kekha assi, kekhubba khu musyani omusiimbukha kamuwodookhaniya amakhono kaye. Kawoola ati, “Mutesiindukha, mulamu niye!” ¹¹ Kamala kaniina khu goroofwa khandi manu kamekula omugaati kaalya. Nikamala okhulomaloma pakka owiire wanuukha, kawawo. ¹² Abatu bayira omusyani omusiimbukha engo nimulamu manu bakwa emyoyo lukali. Okhusewula Khwa Paulo Eyiri Abakhuluutu ba Efweso ¹³ Khwacha emutwe eyiri emeeri khwambukha khwacha Aso, yikhwali nikhucha okhubitira Paulo. Kali okholire entekekha yinno olwokhuba kali wokhuchayo namakulu. ¹⁴ Nikatuwukaana Aso, khwamwiingisa mu meeri khwacha khwoola Emitulene. ¹⁵ Oludaalo olwalondakho khwefuka okhutula eyo manu khwoola khwakobera khu Kiyo. Khandi oludaalo lwalondakho khwambukha khwacha Samo, ne oludaalo oluloondakho khwoola mu Mireeto. ¹⁶ Paulo kali akhengirewo okhwambukha nabitira mu Efweso kho akhaye okhunyasa ebikha mu syalo sya Asiya, olwokhuba kali mu wangu okhwoola mu Yerusalemi, nisinyalikha, khu ludaalo olwa Pentekoti. ¹⁷ Okhutula e Mireeto, Paulo katumisa mu Efweso baleete abakhuluutu be kkanisa. ¹⁸ Niboola, kabawoola ati: “Enywe mumanyiire erala endaalo choosi chinamenya nanywe, okhutula khuludaalo olwamberi lunoolera mu syalo sya Asiya. ¹⁹ Nakholera Omwami nende omwoyo mulonga mulala nende amasika, anakhaba ninakhemewa lukali nende enkhwe echa Bayudaaya. ²⁰ Mumanyire muuti singanakanangakho okhuwulira esiitu syoosi esiri nowuyeedi yimuli naye nsomesiise lwatu khandi enyumba khu nyumba. ²¹ Nalangirira eyiri Abayudaaya nende Abayonaani nti batekwa okhukalukhanira Weere mu khweyolobya khandi babe nende enfukiirira mu Mwami Yesu. ²² “Ne wunaanu, nyiingiwa nende Omwoyo, ndi okhucha e Yerusalemi, nga simanyire esinanekholekho eyo. ²³ Manyire nti mu wuli sikko esikhongo omwoyo omwolerefu kandawula ati ejjeera nende okhusandisiwa bintingaaye. ²⁴ . Nelubiba biityo, mbona nga owulamu wange sisitu yiindi, nisiba mbo nyala okhumala olukendo namalirisa omulimo Omwami Yesu kukamba__ omulimo okwokhuwa owujjulisi owe’njiri ye’sissa sya Weere. ²⁵ “Wunaanu manyire nti yiwuma khwinywe bambitiremo nimbuulira Owene’ngo olimbonakho khandi. ²⁶ Nolwesyo, nangirira yimuli olwaleero nti mbuma musango khumabanga ka batu boosi. ²⁷ Olwokhuba singanakanire okhubatumbulira okhudakha khwa Weere khwoosi. ²⁸ Mweriinde enywe abene nebyayo byoosi omwoyo Omwolerefu yikabakhola okhuba abakhebesi. Mube baayi abe kkanisa ya Weere, yikakula nende amabaanga kaye keene. ²⁹ Manyire nti ni nakhamala okhutulawo, ebinamiindi ebyalaba byakhabengiremo khandi yiwuma byayo bibirirekhawo. ³⁰ Ata nende okhutula mwinywe abene abatu balisiingira okhusakuula amasima kho basalaniye abeeki enyuma waawe. ³¹ Manu mwerinde! Mwichulise muuti mu mbaka ye myaaka chidatu sinakamanga okhubalawula sya mulala esiro ne esideete mu masika. ³² “Wunaanu mbawayo eyiri Weere nende eyiri emboosi yaye eye’sissa, eyinyala yabombakha khandi yabawa owusikha mu abo boosi abalabisiwa. ³³ Sinekomba Efwessa oba Esaabbu yo’mutu yeesi oba enguwo. ³⁴ Enywe abene mumanyire muuti amakhono kange kano kamberesiise ebiitu bindakha byoosi alala nende bangenda nabo. ³⁵ Mubiitu byoosi binakhola, nabekesa nti okhukhola na maani nga khuno khutekwa okhuyeeda abanaffu, nikhwichulisa emboosi Omwami Yesu omwene chikawoola ati: ‘Okhukaba khwa nkhabi okhukhira okhufuna.’” ³⁶ Nikamala okhulomaloma binno, kasigama assi nabo boosi kekalikhira. ³⁷ . Boosi balira lukali nibamwewoyamo khandi nibamukwa mu sirifu. ³⁸ . Esyabadisya engisa lukali nje sikabawoola ati sibaliwona weni waye khandi. Manu bamala bamuwerekesa bacha naye khu meeri.