¹ Manu Apolo nikali naali mu Kkoliinso, Paulo kadiira engira kabitira mu katikati manu koola mu Efweso. Eyo kawukanayo abeeki band ² kabateeba ati, “Mwafuna Omwoyo mwolerefu nga nimwafukiirira?” Bakowolamo baati, “Bbe, khandi sikhuwulirangakho khuuti aliwo omwoyo mwolerefu.” ³ Manu Paulo kabateeba ati, “Ne wunaanu khubatiisiwa siina khumwafuna?” Bakowolamo baati, “Okhubatiisiwa khwa Yokana.” ⁴ Paulo kawoola ati, “Okhubatiisiwa khwa Yokana khwali khubatisiwa okhwokhweyolobya. Kawoolera abatu okhufukiiririra mu oyo owiicha enyuma waye, nje, mu Yesu.” ⁵ Nibawulira sinno, beecha babatiisiwa okhwingira mu liita lyo’Mwami Yesu. ⁶ Paulo nikabesakho amakhono kaye, omwoyo mwolerefu kabechakho, beemawo balomaloma mu nimi khandi bawoola ebicha okhubaawo. ⁷ Bali ambi abasaacha ekhumi nende babiri boosi alala. ⁸ Paulo kengira mu Sinaggogi kalomalomera eyo namaani okhumala emyesi chidatu nga syatya, nayinganiya khandi nabakhobya ebiddira khu wene’ngo wa Weere. ⁹ Naye abandi bakhaya; bakhayirira okhufukiirira khandi nga banyasa engira eya Weere alafu. Manu Paulo kabalekha. Kacha nende abeeki katesaanga nabo wuli ludaalo mu nyumba eyo’khwekeraamo mu Tulano. ¹⁰ Sinno syachanakana siityo okhumala emyaka chibiri, manu Abayudaaya boosi nende Abayonaani abamenya mu syalo esya Asiya baawulira emboosi yo’Mwaami. ¹¹ Weere kakhola ebyamayiya ebitabangawo nga abitira mu Paulo, ¹² khandi nende ebitambaara n'enguwo chaye ebyamwegeηηangakho nibabiyiriranga abalwaye baawe, endwaaye chawe chawonaanga khandi nende emisambwa emibi chabatulaangamo. ¹³ Abayudaaya bandi ababitaanga niberusya emisambwa mibi bakesakho okhukhosesa eriita lyo mwami Yesu okhutula khwabo abaliingi nibalikho emisambwa mibi. Bawolanga baati, “Muliita lya Yesu, Paulo lyawuulira, mbalagira mutule.’’ ¹⁴ Abasyaani musanfu aba Sekewa omu Yudaaya omukhongo wabakhawona, bali bakholaanga sinno. ¹⁵ Oludaalo lulala omusambwa mubi kwabakowolamo kuuti, “Yesu mumanyire, khandi manyire ebidiira khu Paulo, nanywe niinywe banaanu?” ¹⁶ Manu omusaacha owalikho omusambwa mubi kabatuumirakho kabakhira boosi amaani. Kabakhubba enkhubba yeene eyabeerusya batula erwanyi wenyumba sichula khandi nibadaacha. ¹⁷ Sinno nisyecha syamanyikha eyiri Abayudaaya nende Abayonaani abamenya mu Efweso, boosi badiiriwa owuti, khandi eriita lyo’mwami Yesu lyasingisiiwa mu luyaali olwa’mukulu. ¹⁸ Bangi khwabo abafukiirira wunaanu beecha mulwaatu okhweyolobya ebibi byawe. ¹⁹ Bangi khwabo abakholaanga ebyeroko baletanga ebittawo byaawe alala nibabisaamba alafu. Nibabala ebbeeyi yabyo, byosi byoosi Efwessa elifu amakhumi kataanu. ²⁰ Mumbeera yinno emboosi yo’mwaami yasasaana lukali khandi yemeedamo amaani. ²¹ Bino byoosi nibiweeye, Paulo kakhengawo okhucha e Yerusalemi, nabitira mu Makedoni nende Akiya. Kawoola ati, “Nimalire okhubaayo,” “ntekwa okhukeniyakho e Rooma yosi.” ²² Katuma babiri khu bayeedi baye, Timoseewo nende Erasuto, okhucha e Makedoniya, ne omwene kadonηηa mu syalo sibalanga Asiya embaka eyiyerakho. Emyeero Mu Efweso ²³ Ambi mubikha ebyo akwawo okhutawukha olwengira. ²⁴ Omwitanyi olangiwa Demeteriyo, owakholanga owuyumba wamasawo kefwessa owa Atemi kaleteranga abetaanyi basye erubya echitali ntono. ²⁵ Kabalanga boosi alala, na’betaanyi bandi bakali nafwananiya nabo emirimo, kabawoola ati; “Basaacha enywe, mumanyire muuti khufuna enyingisa endayi okhutula mu byasara binno. ²⁶ Khandi muwona khandi muwulira nga omutu onno Paulo nasendaseendire khandi kakosya abatu bangi ano mu Efweso nende esyalo syoosi esya Asiya. Awoola ati ba were abakholewa na’batu khaba siba Weere ata nawutono. ²⁷ Esidinyu siriwo siiti enfumwa ye’byasara byefwe sinje yoηene eyinakwe, naye nende enyumba ya were omukhongo Atemi yinemewe oluyaali, nende were mukhasi omwene, owinamirwa musitundu sya Asiya nende e syalo syoosi, acha okhunyakiwakho oluyaali lwaye olwo’wene’ngo.” ²⁸ Nibawulira sinno, badiriwa ettima lukali bachaaka okhukhumula baati: “Atemi owa Efweso nje omukhongo okhira!” ²⁹ Wangu wene esikko esikhongo syoosi syatawukha. Abatu badiira Gayo nende Alisitaluuko, abakendanga nende Paulo okhutula e Makedoni, baacha nga omutu mulala okhwingira mu nyumba eye misanyo. ³⁰ Paulo kadakha okhuwonekha eyiri esidiikha, naye abeeki sibamukanya. ³¹ Ata nende abandi khu bakhongo besitundu, abeecha ba Paulo, bamutumira owubakha nibamwekweeda atakesakho okhucha kengira munyumba eye misanyo eyo. ³² Olukhuηaano lwali mu wutawulirisaniya: Abatu bandi bali bakhumula esiitu sirala, ne abandi esiindi. Abatu bakhira owungi sibamanya ata lwasiina bali eyo. ³³ Abayudaaya basiindikha Alekezanda emutwe, khandi abandi mu sidiikha bakhubba okukhero okwebiragiro yali. Kabawola bawuleere kho kewosekho eyiri abatu. ³⁴ Naye beecha bamanya baati kali Omuyudaaya, boosi bakhubbira alala okukhero okhumala ambi esawa chibiri baati: “Atemi owa ba Efweso nje omukhongo lukali!” ³⁵ Omukaraani owe sikko esikhongo kawuleesa esidiikha nawoola ati: “ Enywe abatu ba Efweso, Esyalo syoosi sisimanyire siiti esikko sikhongo esya ba’Efweso nje esyaliinda enyumba ya were eya Atemi omukhoongo nende esifananyi syaye esyakwa okhutula mwikkulu? ³⁶ N'olwesyo, khasita ebituufu binno sibinyala byekaaniwa, muteekwa okhuwuleera khandi mutatulaniramo okhukhola esiitu syoosi esibi. ³⁷ Muletire abasaacha banno ano, abakhaba mbo sibanyaka enyumba cha Weere oba bafwotokheresa were wefwe omukhasi. ³⁸ Manu, nisiri mbo, Demeteriyo nende abetaanyi basye balikho no’khwekanyiisa khu mutu yeesi, enkhiikho njikule khandi abakhengi bemisango baliyo. Banyala okhuyira emisango. ³⁹ Ni aliwo esiitu syoosi esyemeedakho simudakha okhuleeta, siteekwa okhuwulirwa mulukhuηano lwa’malako. ⁴⁰ Nga ni siri, khuli mu wudinyu ow'okhukhengerwa omusango olwokhusasamasa olwebiitu ebikholirwe olwaleero. Mwisyo sibanyala okhusemba embeera embi yinno, nga lumuwuma esikira.” Nikamala okhulomaloma sin o, kasiiwula olukhuηηaano.