¹ Bino nibiweye, Paulo katula mu Asene kacha mu Kkoliinso. ² Eyo kawukaana Omuyudaaya olangiwa Akula, omwiwulanwa owo mu Ponto, owali nikakhecha okhutula mu Yitale nende omukhasi waye Pulisikira, olwokhuba Kulawudiyo kali alagiiye Abayudaaya boosi okhutula mu Rooma. Paulo kacha okhubawona, ³ khandi olwokhuba kali omukhosi owa maweema nga nibali, kamenya khandi kakholera alala nabo. ⁴ Wuli lwa Ssabbiiti kayingananga mu Sinaggogi, nga akesakho okhukhobya Abayudaaya nende Abayonaani bamuloonde. ⁵ Manu Siira nende Timoseewo nibeecha okhutula e Makedoni, Paulo kewaayo omweene yesi okhuwuulira nga ajjulira eyiri Abayudaaya ati Yesu nje Kurisito. ⁶ Naye Abayudaaya nibayiinganiya Paulo bachaka okhunyeka, kasisimula enguwo chaye mu’khubayiinganiya nabawoola ati, “Amabanga kenywe kabe khumitwe cheywe chene! Nomiisa binomaloma.Okhutula wunaanu nende okhwemeedayo nja okhucha mu Bateende.” ⁷ Manu Paulo keecha katula mu Sinaggogi kaacha khu mulyango okulondakho mu nyumba ya Tito Yusito, omwikalikhiri wa Weere. ⁸ Kulisupo, omutukki wa Sinaggogi, nende abomudaala lyaye boosi bafukiiririra mu’Mwami; khandi nende Abakkoliinso bangi abamuwulira bafukirira khandi babatiisiwa. ⁹ Oludaalo lundi esiro Omwami kalomaloma nende Paulo mukhuwonekherwa ati: “Otatya; chanakana nende okhulomaloma, otawulera. ¹⁰ Olwokhuba ndi nawe, khandi yiwuma mutu ocha okhukhuseeta khandi akhuwumise, olwokhuba ndi nende abatu bangi mu sikko sikhongo sinno.” ¹¹ Manu Paulo kamenya omwaka nende esitundu, nga abasomesa emboosi ya’Weere. ¹² Naye Galiyo nikali ni nje owesasa lye Akaya, Abayudaaya bakholera alala baseeta Paulo bamuleeta mu moni cholukhiikho. ¹³ Bamuwabira baati, “Omusaacha onno,” ali okhukhobya abatu, “Mbo benamire Weere mu ngira echikhalaka amalako.” ¹⁴ Nga Paulo lukali nali ambi okhulomaloma, Galiyo kawoola Abayudaaya ati, “Nisiba mbo enywe Abayudaaya mwali mwekanyiisa khu siitu esitacha wulayi oba omusango okwamaani, syakhalimo amakhuluutu ese okhubatekeresa. ¹⁵ Naye nga nisidiira khubiteebo ebidiira khu mboosi nende ameeta nende amalako kenywe keene__ abeene mubimaliirise. Esse sindaabe omulamusi khu biitu nga binno’’. ¹⁶ Manu kecha kaberusya okhutula mu lukhiikho. ¹⁷ Manu boosi bakalukhanira Sossene omukhuluutu owa Sinaggogi bamukhubbira mu moni cho’lukhiikho. Naye Galiyo sikafwayo bbe. Pulisikira, Akula Nende Apolo ¹⁸ Paulo badonηηa mu Kkoliinso olwesikha esiyera. Manu keecha kalekha abafukiirisi kawanikha amatanga kaacha e Busuuli, nali alala nende Pulisikira nende Akula. Natasiimbukha, kacha bamubekakho efwiiri lyaye e Kenkereya olwo’khwechuba khukali nakholire. ¹⁹ Boola mu Efweso, yi Paulo kalekha Pulisikira nende Akula. Ye omwene kengira mu Sinaggogi kayingana nende Abayudaaya. ²⁰ Nibamusaba abeekho nabo embaka ntono, kakaana. ²¹ Ni nga nikawawo, kasuubisa ati, “Nakhakowole nikhuba okhudaha khwa Weere.” Ne awanikha amatanga okhutula mu Efweso. ²² Nikakoba mu Kayisaliya, kaniina kaacha okhukheesa ekkanisa khandi kekhirira kaacha Antiyokiya. ²³ Nikamalakho endaalo echiyera mu Antiyokiya, Paulo kasiimbukhayo kakenda mu situndu sinno syosi syoosi nasiiri mu syalo sya Galatiya nende Fulugiya, nikomiisa abeeki boosi. ²⁴ Ebyo nibisiiri awo omuYudaaya olangiwa Apolo, owiwulwa mu Alegezandereya, keecha mu Efweso. Kali omusaacha owasoma, nga amanyire lukali ebyawandiikiwa. ²⁵ Kali kekesewa wulayi engira yo’mwami, khandi kalomalomanga nende okhudakha lukali khandi kasomesanga khu Yesu mu wulungifu, nende kali amanyirekho okhubatiisa khwa Yokana khwoηηene. ²⁶ Kachaka okhulomaloma nga syatya mu Sinaggogi. Manu Pulisikira nende Akula nibamuwulira, bamulanga abakeniye engo waawe bamunyonyoola engira ya Weere mu wichuffu okhukhirawo. ²⁷ Apolo nikadakha okhucha mu Akaya, abafukiirisi bamukhubbirisa khandi bawandiikira abeeki beeyo bamusangaalire. Mukhwoola, kali owowuyeedi wukali eyiri abo olwesisa abali nibafukiriiye. ²⁸ Olwokhuba kayinganiyanga lukali lwene Abayudaaya akaati mu batu, nga akhakhasa okhutula mu byawandiikiwa ati Yesu kali nje Kurisito.