¹ Nibali nibamalire okhubita Anfwipoli nende mu Apoloniya, beecha boola mu Sessaloniika, eyali esinaggogi sya Bayudaaya. ² Nga ensambo yaye luyali, Paulo kengira musinaggogi, mundaalo che Sabbiiti chidatu kayingana nabo mu byawandiikiwa, ³ nanyonyoola khandi nakhakhasa ati Kurisito syamukhoyera okhusandisiwa nokhusyuukhira mu baffu. Kawoola ati, “Yesu ono yindi okhubawulirirakho nje Kurisito.” ⁴ Balala khu Bayudaaya bola bafukiirira beyimbaniya khu Paulo nende Siira, alala ne’sikaanda esya Bayonaani abatya Weere kho na’bakhasi aba’maani abataasi batono. ⁵ Naye Abayudaaya beecha baba nende embalikha; manu bawukula abatu babi okhutula mu khatale, bawuusa esidiikha bachaaka okhwesasaakula mu sikko sikhongo. Bacha wangu khu nyumba ya Yasooni nibakoonya Paulo nende Siira mbo babatuse erwanyi eyiri esidiikha. ⁶ Naye nibatabawukaana, bakhuruudya Yasooni nende abafukiirisi bandi babayira eyiri abowunyala mu sikko esikhongo, nibakhumula baati: “Abasaacha banno abaletire akhediimo mu syalo syoosi wunaanu bechire ano, ⁷ khandi Yasooni kabasangaalira kabengisa munyumba yaye. Boosi bali okhuyiinganiya amalako ka Kayisali, bawoola baati mbo aliwo omwene’ngo wundi, olangiwa Yesu.” ⁸ Nibawulira sinno, esidiikha nende abo’wunyala be sikko esikhongo syoosi basambikha. ⁹ Beecha beyimirira Yasooni nende abandi bamala babalekhuula. Mu Beroya ¹⁰ Esiro nisyola siiti, abafukiirisi batuma Paulo nende Siira okhucha e Beroya. Nibola eyo, bacha musinaggogi sya Bayudaaya. ¹¹ Aba Beroya bali balayi okhukhira abe Ssesalonika. Olwo’khuba bafuna owubakha n'okhudakha lukali khandi bewunjaanga ebyawandiikiwa wuli ludaalo okhuwona Paulo bikawoola nibituufu. ¹² Bangi khuba Yudaaya bafukiirira, nasirala nga bangi khu bakhasi a Bayonaani abemeeresi nende abasaacha a Bayonaani bangi lubali. ¹³ Manu Abayudaaya mu Ssesalonika nibasimanya baati Paulo kali awuulira emboosi ya Weere mu Beroya, bachayo yosi, basalaniya ebidiikha nende okhubachuuba. ¹⁴ Abafukiirisi wangu wene batuma Paulo khu Nyanja, naye Siira nende Timoseewo badonηηa e Beroya. ¹⁵ Abasaacha abayerekesa Paulo bamuyira mu Asene bamulekha nende ebiragiro mbo Siira nende Timoseewo bamwegatekho wangu nga lusinyalikha. Mu Asene. ¹⁶ Paulo nikali nasibaliinda mu Asene, Omwoyo kwamuchuuna lukali okhuwona ati esikko sikhongo syali sichuuye ebifananyi ebilongalongwe. ¹⁷ Manu kayingana nende aba Yudaaya musinaggogi nende aba’Yonaani abatya Weere, alala nende mu khatale wuli ludaalo nende abo ababangayo. ¹⁸ Omukanda kwa aba Epikulyo nende aba Firosoofwo bachaaka okhuyiingana naye. Balala khu bo bateeba baati, “Omunanaakisi ono akesakho okhuwoola ssi?” Abandi bawoola baati, “Ali nga okholerera emisambwa emikeni wussa.” Bawoola sinno olwokhuba Paulo kali awuulira emboosi endayi khu Yesu nende okhusyuukhira. ¹⁹ Manu beecha bamuwukula bamuyira mu lukhiikho lwa Aleyopago, yibamuwolera baati, “Khunyala okhumanyakho okhuwuulira okhuyakha khuno nga nikhuli khwooli okhutaawo?” ²⁰ Okhuleeta ebiitu ebiyaakha mu matwi kefwe, manu khudakha khumanye amakhuluutu kabyo.” ²¹ (Aba’Asene boosi nende abateende abamenyayo bamala ebikha byawe nga bawuma sibakhola okhutusakho okhulomaloma nende okhutekeeresa emboosi njaakha.) ²² Manu Paulo keecha keema akaati mu lukhiikho olwa Aleyopago kawoola ati: “Basaacha ba Asene! Mbona nti mungeri choosi muli abanadiini lukali. ²³ Olwokhuba nga ninakenda okhwewodokhaniya natingaala wulayi ebiitu byenywe bimwinamira, nokhuwona nawona worutaari niyirikho owuwandiike wunno mbo: EYIRI WEERE OTAMANYIKHANIRE. Wunaanu yimwinamira nga esiitu simutamanyire nja okhulangirira yimuli. ²⁴ “Weere owaloonga esyalo nende wuli esirimo nje Omwami owekkulu nende esyalo khandi syamenya mu byombakhe ebyombakhiwa nende amakhono ka’batu. ²⁵ Khandi syayeresewa nende amakhono ka’batu, nga odakha esiitu syoosi, olwokhuba ye omweene awa abatu owulamu nende okhuyera nende nawuli siitu syoosi. ²⁶ Okhutula mu mutu mulala kakhola wuli syalo esya’batu, ati banyale okhwichusa esyalo syoosi; khandi kakhengawo ebikha byawe nende ebifwo byeene yibakhoyire okhumenya. ²⁷ Weere kakhola sinno abatu kho bamwolekho nalundi bache bamukoonye, akakhaba mbo syali ale okhutula khunawuli mulala khwifwe. ²⁸ ‘Olwokhuba mu ye khuliwo khandi khukenda khandi khwabaawo.’ Nga wusa abayiiya enyembo benywe nibawoola baati, ‘Khuli baana abolwiwulo lwaye.’ ²⁹ “Nolwesyo nga nikhuli abaana ba Weere, sikhukhoya okhubaasa khuuti afwana nende esabbu oba efwessa oba ekina___ ebikholewa nende amakesi no’khumanya khwo’mutu. ³⁰ Khale Weere sikafwangayo khu wutamanya nga owo, naye wunaanu alagira abatu boosi woosi okhweyolobya. ³¹ Olwokhuba katawo oludaalo lwalikhengera esyalo omusango mu wulungifu nabitira mu mutu yikatawo kekeesa owukhakhafu eyiri abatu boosi nikamusiingisa okhumutusa mu baffu.” ³² Nibawulira ebyokhusyuukhira okhutula mu baffu, abandi bamukhomoola, naye abandi bawoola baati, “Khudakha khandi okhukhuwulira khu mboosi yinno.” ³³ Khwesyo, Paulo katula mu lukhiikho. ³⁴ Abasaacha batono baloonda Paulo khandi bafukiirira. Mubo mwalimo Diyonusiyo, omunasikaanda esya Oleyopago, nende omukhasi alangiwa Damali, nende abandi alala nabo. EBIKHOLWA