¹ Nikhwamala okhukawukhana nabo, khwatulayo khwengira eryato munyanja lyewunja esikobero sye Koosi, oludaalo lulondakho khwacha e Rodo nikhutulawo khwacha e Patara. ² Khwakaana emeeri niyambukha niyicha e Foyiniki yikhwaninakho yadiira olukendo. ³ Nikhwali khucha okhwewunja Kupulo ngababita emukulu wayo, emeeri yatwosa mu Busuuli. Khwakoba e Ttuulo, emeeri yefwe yiyali niyicha okhutwikhula emikuku chayo. ⁴ Yikhwakaana abeeki eyo, khwadonηηa nabo ejjuma enamba. Okhubitira mu Mwoyo basaba Paulo owutacha e Yerusalemi. ⁵ Naye ebikha byefwe nibiweye, khwasiingira khwawawo khulukendo lwefwe. Abeeki boosi nabakhasi bawe na’baana batuwerekesa khwatula mu sikko, khandi batwoosa khu sikobo yikhwasigama okhusaba. ⁶ Nikhumalire okhusewulana, khwaniina khu meeri, nabo bakowoolayo engo. ⁷ Khwachanakana nolukendo okhutula e Ttuulo, khwakoba e Putolemaayi, yikhwakhesaniya nabasyefwe, yikhwadoηηa nabo okhumala oludaalo. ⁸ Nikhuwawo oludaalo lulondakho, khwola e Kayisaliya khandi khwaba mu nyumba ya Firipo omuwuulisi we’njiri, mulala khu bo’musanfu. ⁹ Kali nabakhana banne abali nibatadeekha abalakula. ¹⁰ Nikhwali khwakhamalayo endaalo, nabbi olangiwa Agabasi katula assi e Buyudaaya. ¹¹ Kelungikha keecha yikhuli, kawukula olukhoba lwa Paulo, kawowa amakhono kaye namakulu nalwo, nawoola ati, “Omwoyo mwolerefu awoola ati, ‘Mungira yinno nje a Bayudaaya ba Bayerusalemi yibacha okhuwowa omwene no’lukhoba lunno khandi bamuweeyo eyiri abateende.’” ¹² Nikhwawulira binno, effwe na’batu abali awo khwekwedda Paulo owutacha e Yerusalemi. ¹³ Naye Paulo kakowolamo ati, “Lwasi mumoosa amasika ni mukhalaka omwoyo kwange? Ndi mwetekefu olwo’khutawoyewa khwonηηene, naye ata no’khufwira mu Yerusalemi khu lweriita lwo’Mwami Yesu.” ¹⁴ Nattanyala okhufukiirira, khwabiwaakho khandi khwawoola khuuti, “Okhudakha khwo’Mwami khukholewe.” ¹⁶ Abeeki bandi abatula e Kayisaliya bosi batweyimbakho khandi batuyira mu ddala lya Manasoni, yikhwali nokhuba. Kali musaacha otula mu Kupulo khandi nga mulala khu beeki batangira. Okhwola Khwa Paulo e’Yerusalemi ¹⁵ . Sinno nisyawa, khwetekekhera khandi khwaniina khwacha e Yerusalemi. ¹⁷ Nikhwola e’Yerusalemi, abasyefwe batusangaalira lukali. ¹⁸ Khuludaalo lulondakho Paulo nende efwe abadoηηire khwacha okhuwona Yakobo, nabakhuluutu boosi baliiwo. ¹⁹ Paulo kabakhesa, kabakaniyayira lukali lwene Weere bikali nakholire mu Bateende okhubitira mu wuweresa waye. ²⁰ Nibawulira sinno, bakiniya Weere. Nibamala nibawoolera Paulo baati: “Woona, mwaana wefwe, maliffu kanga aka’Bayudaya abanyalire okhufukiirira, ni khandi nga bafwira khulako. ²¹ Bawoolerwa baati osomesa a Bayudaaya boosi abamenya alala na’bateende bakalukhane okhutula khu Musa, nibabawolera okhutakheba abaana bawe oba okhumenya niboseresa emiduunga che si‘Yudaya. ²² Khunakhole khutye? Paka banawulire baati wichire, ²³ nolwesyo khola nga lu khukhuwoola. Aliwo abatu banne abali ninafwe abamalire okhulayira. ²⁴ Yira banno batu, munyale okhwelabya khandi osasule amakobi, khu banyale okhubekewa emitwe chawe. Awo wuli otula amanye niyawuma amasima mubibakhulomalomakho, ne mbo ewe wamwene siwalekha owulilira mu malako. ²⁵ Ne eyiri abafukiirira Bateende, khubawandiikiye nikhubekesa esibaaso syefwe khuuti bakhoyire okhulekhana nemere ye’misambwa, okhutula khu mabanga okhutalya enyama yebyayo bimike nende esifwaabi syo’wudamba.” ²⁶ Oludaalo lulondakho Paulo kawukula abatu kacha okhwelobya nabo. Namala acha mu nyumba ya Weere okhuwa endaalo echokhulabisiwa chiriwa khandi esiwewayo sinyale okhutusiwa khulwa wuli mulala khubo. Paulo Adiiriwa ²⁷ Endaalo musanfu nichali chiri ambi okhuwa, balala khu Bayudaaya bandi okhutula mu Asiya bawona Paulo mu nyumba ya Weere. Basangulusa esidiikha sya batu, bamala bamudiira. ²⁸ Nibakhumula baati, “Basaacha ba Yisirayiri, mutuyeede! Onno nje omusaacha osomesa abatu boosi wuli awutu nabakawulakawula namalako kefwe mu sifwo sinno. Notusakho esyo, aletire a Bayoonani ambi ne nyumba ya Weere anyasise ne’sifwo syolerefu sinno.” ²⁹ (Bali bawene Turofilimu omu’Efweso nali naye mu siko esyo nali nende Paulo oludaalo lwali khu’wukhye nibasibasise baati Paulo amuletire mu sifwo syo’lerefu.) ³⁰ Esikko syoosi syadumbukha na’batu batula mu wuli luwande niberukha. Baddira Paulo, bamubirikisa nibamutusa mu nyumba ya Weere, ebikha byene ebyo emiryango chebiriwa chekalwa.) ³¹ Nibali bakesakho okhumwitta, emboosi cholera omukhulutu wabasirikale chiiti esikko sya Yerusalemi sitawukhire. ³² Kanguyirawo okhuwukula balala khu basirikale na’bamaye bekhirira eyali okudiikha kwali kukhubba Paulo, manu okudiikha kwa batu bali bamukhubba nibawona abasirikale na’bakhongo bawe nibecha balekherawo okhukhubba Paulo. ³³ Omukhulutu wa basirikale kola nadiira Paulo kalagira bamuwowe nenjegere chibiri. Namala ateeba ati ono kali nje naanu ni khandi kali akholire si. ³⁴ Abandi mu kudiikha bakhumulanga esiitu sirala na’bandi esindi ne omukhongo nga lukali natengisa bibawolanga mukukhero nga syadisya masima okhwema khukukhero, kalagira ati Paulo bamuyire mu daala lyaye oba (Husiriwa sya Barakisi) ³⁵ Ne Paulo nikola khu madara kaniina amukulu, abasirikale bamukinga olwesidiikha okhwemeeda mukhutawukha no’wululu. ³⁶ Okunawungi kwa batu okwalondangakho kwemeeda okhukhumula kuuti, “Mu’mumalewo!” Paulo Alomaloma Eyiri Esidiikha ³⁷ Abasirikale nibali ambi okhumwingisa mu barakisi, kasaba omukhuluutu wa basirikale ati, “Mwankhafukiirira nalomalomakho esiitu syoosi yoli?” Omukhongo kamuteeba ati, “Olomaloma oluyonani?” Naye kabakowolamo ati. ³⁸ “Siniwe Omumisiri owaleeta akhediimo watangirira ambi ano abeeti eliffu chine wabayira musichimi?” ³⁹ Paulo kabakowolamo ati, “Ese ndi mu Yudaaya, otula mu Tarusisi mu Silisia omwiwulwa we’sikko sikhuluutu. Nkhusaba nomalomekho eyiri abatu.” ⁴⁰ Namalire okhufukirirwa nende omukhuluutu wabasirikale owo’wunyala, Paulo keema khumadara kakhosesa owuwonero okhuwunjeesa abatu. Nibawuleye bosi boosi, kabawolera mu lwi’Bbulaniya: