¹ Sindi mulekhule? Sindi mutume? Sinawonakho Yesu Omwami weffwe? Enywe simuli ebitula mu mulimo kwange mu mwami? ² . Nende nintaba omutume eyiri abandi, mumasima ndi omutume enywe yimuli! Olwokhuba ninywe sitampu yekesa owutume wange mu mwami. ³ Khuno nje okhwewosakho khwange eyiri abo abanjikhalira onkhunkhengera omusango. ⁴ . Sikhuli no’wunyala khu mmere ne byo’khunywa? ⁵ . Sikhuli no’wunyala okhwewukulira omukhasi wafukirira, nga abatume nende bamwanaηηina mwami nende Keefa nga lubakhola? ⁶ . Oba nise senηηene nende Bbalunaba abakhoyera okhukholanga emirimo kho khunyale okhwakana esyo’khulya? ⁷ . Mutu sinna onyala okhukhola ngo’musirikale khu lwaye omwene kamala kekabaniya omusara? Mutu sinna otaaka endalo ye’misabbibbu manu kakhaya okhulyakho ebyaamo byakwo? Nanu owaaya ebyaayo byaye kakhaya okhuηηwakhomo amabeere kabyo? ⁸ . Mubaasa muuti binno mala kabilomaloma olwowunyala wange ngo’mutu wusa? Amalako sikawoola esitu nasirala? ⁹ . Khuba syawandikiwa mu lako lya Musa siiti: “Otawowanga omunwa kwe’ηηombe endaawo kho yiri okhusiriita enηηano alwanyi.” Mukaala muuti Weere eŋŋombe endaawo nje chabaasakho? ¹⁰ . Masima awoola binno khulwefwe, si nje lusiri? Eeh, bino byatuwandikiwakho khulwokhuba olimya enηηombe nalima, nende omukhubbaki nakhubbaka, bakhoyire bakhole batyo nibali ne’suubi lyo’khukabanakho bibaba nibakesise. ¹¹ . Nikhuba nikhuwanyire emwo yo’mwoyo mwinywe, sikhukhoyera okhubakesamo ebituyeeda mu wulamu wo’mubiri? ¹² . Nisiba mbo abandi baba nowunyala wo’khubafunamo owuyeedi niwubatulamo, sikhunyala khwa bafunamo ata okhukhirakho abo? Naye sikhwakhosesa owunyala wuno. Khu luwande lundi, khugumira wuli sicha khukhaye no’khwikalira engira ye’mboosi endayi eya Kurisito. ¹³ . Si musimanyire muuti abo abakhola mu nyumba ya Weere bafuna ebyo’khulya byawe mu nyumba ya Weere, nende abo abaweresa khu alutari bakabana khu biwewayo khu alutari? ¹⁴ . Mungira nasirala, Weere kalagira ati abo abawuulira enjiri bakhoyera okhufuna owuyeedi wawe okhubita mu njiri. ¹⁵ . Naye esse si nakhosesa khu wunyala wuno ata. Khandi sindi khuwandiika bino ninsuubira nti munabinkholere. Khalukhi esse omwene nfwa okhukhira omutu onkhutusakho okhwewulira khwange. ¹⁶ . Ne lwoosi anakhawuulira enjiri, sinno syoηηene sisikira nepaakha, khulwokhuba ntekwa okhuwulira. chimbukanire nintawuulira enjiri! ¹⁷ . Nimba nimbuulira mukhwewayo khwange omweene, ndi nesiwanwa; atali okhwewayo, ndi khukukhola wusa omulimo kwamberesewa. ¹⁸ . Nolwesyo esiwanwa syange siri yeena? Sinno syoηηene: nti mu khuwuulira enjiri sinyalikhe noserese mukhudakha khwange omweene khuwerere, khandi nga sinkhosesise owunyala wange mu khuwuulira. ¹⁹ . Nende ndi mulekhule khandi nga sindi wo’mutu yeesi, nekhola samwene omudire eyiri nawuli otula, khu nyale okhuleeta bangi nga lu sinyalikha. ²⁰ . Eyiri aba Yudaaya neyira okhuba ngo’mu Yudaaya, khunyale okhuleeta aba Yudaaya. Eyiri abatukiwa namalako neyira okhuba ngo’wamalako, khunyale okhutusayo abali assi wa malako (nende ese omwene sindi asi wamalako). ²¹ . Eyiri abo abatali namalako, nefula naba ngo’tali nako (nende ese omwene sindi mulekhule mu malako ka Weere naye ndi assi wa malako ka Kurisito), khunyale okhuyira abatali na’malako. ²² . Eyiri abanaffu nafukha munafu, okhutusayo abanafu. Nefusise okhuba ebitu byoosi eyiri abatu boosi khu sinyalikhe mungira choosi echinyalikhana nyale okhuwoniyakho abandi. ²³ . Nkhola binno byoosi, khu lwe’njiri, kho nyale okhukabanakho enkhabi chayo. ²⁴ . Simusimanyire muuti mu mbiro chokhukerana, aberukhi boosi berukha, naye mulala njofuna esiwanwa? Yirukha mu ngeri nge’yo kho ofune esiwanwa. ²⁵ . Wuli mutu yeesi okeraana mu misanyo abita mu meeko momu. Basikhola okhufuna engule eyitakhinda; naye khusikhola khufune engule yoluberera. ²⁶ . Nolwesyo, sinirukha nga mutu wirukha natali nende syagenderera; sinwana ngo’mutu oli okhukhubba embewo. ²⁷ . Khaba, nkhubba omubiri kwange khandi nakukhola okhuba omuwambe wange kho sinyalikhe nti nimaliire okhuwuulira eyiri abandi, ese samweene ntatusiwa mu bafuna esiwanwa.