¹ Nolwesyo, abatu bakhoyire okhutuyira nga’bakhosi ba Kurisito khandi nga ababiikhi be byama bya Weere. ² Wunanu sikhoyera abo abayeresewa okhuba ababiikhi baba abesikwa. ³ Naye ese khu lwange nsiwona nga situ sitono ni nkhengerwa nanywe oba ni nkhengerwa ne koti cha’batu; ata ese omwene, sinyala khwekhengera ese omwene. ⁴ Mu khumanya khwange nkhwekhakhasa, ne sino si sikira nakhaya okhuba nomusango. Omwami nje owunkhengera. ⁵ Nolwesyo mutakhenganga syoosi ebikha ni bitoola; mulinde okhwola omwami lwalichira. Alita alafu ebyo ebyali nibyekisa musirema khandi alibakala ebigendererwa bye’myoyo chenywe. Ebikha ebyo nibiryoola wuli mulala alifuna omukawo kwaye okhutula eyiri Weere. ⁶ Wunanu, baana befwe, ngeranisye bino bitu khu samwene nende Apollo olwo wulayi wenywe, khu sinyalikhe enywe mwekere khwifwe amakhulutu kemboosi chino, “Mutatuma ebyawandikiwa” Kho awumewo mwinywe omutu yeesi owicha okhukwira mulala ngakekesa okhukhiririsa owundi. ⁷ Khuba nanu obakhola okhuba abenjawulo okhutula khu mutu yeesi? Sina syooli nasyo syotayeresewa? Ni noba ni wasifuna, oba wayeresewa lwasi wepakha okhuba nga otayeresewa? ⁸ Mbawo mwamala okhufuna, wuli simudakha! Mbawo mwamala okhuyiindiyala! Mufukhire bene’ngo__ khandi muli esyo efwe yikhutaali! Nakhekombire mube abene’ngo kho fweesi khu khunyale okhuba abene’ngo ni nanywe! ⁹ Khuba simbonekhera yindi siiti Weere kamala okhutukhola abatume khu mudaara mu makhenerekha, nga abatu bakhengerwa okwo’khufwa mu musse. Khwatewawo nge’syokhwelolera mu syalo syoosi, eyiri ba malayika nende eyiri abatu. ¹⁰ Efwe khuli basiru khu lwa Kurisito, naye enywe muli bakesi mu Kurisito! Efwe khuli abanafu, naye enywe muli bamaani! Muyeresewa oluyaali, ne efwe khulekeresewa! ¹¹ Okhwola khu bikha bikhulomalomeramo binno efwe khuwoonga enjala no’wuluwo, khuli mu bicheere, khubisiwa wubi no’khutochwa, khuwuma namadaala. ¹² Khukhola echo’luuya namakhono kefwe kano. Nikhulaamiwa, efwe khubasabira enkhabi; nibatubisya wubi, efwe khwesimirisa; ¹³ ni khuwayirisiwa, efwe khukowolamo no’wuloonga. Okhwola nebikha binno khwolire okhuba nge’bikokha ebye’syalo, nge ebitu ebyasyuliwa khu syalo. ¹⁴ Sindi huwandika binno okhubaswasa, naye mbalawula, nga abaana bange bankhira okhudakha. ¹⁵ Nende amwakhaba mbo muli nende abakeraki emitwaalo ekhumi mu Kurisito, simuli nende basenywe bangi, khu lwokhuba mu Kurisito Yesu nafuukha senywe okhubita mu njiri. ¹⁶ Sakira mbakhubirisa okhunekeraniyakho. ¹⁷ Khulwe mbosi yino ntuma Temisewo yimuli, omusyani wange yindakha lukali, omwesikwa lukali mu mwami. Kecha okhubakhewulisa ebidiira khu wulamu wange mu Kurisito Yesu, eyifukirisaniya nende binsomesa wuli atu mu wuli Kanisa. ¹⁸ Abandi khwinywe mufukhire besikhanyaali, oti fana simbeye ninja okhwicha yimuli. ¹⁹ Ne nja okhwicha yimuli khangu, Omwami na nabe nakanyire, khu male niche ngonyerese si syoηηene esikira abatu banno nibalomaloma ne sikhanyaali, no’khuwona maani sina kabali nako. ²⁰ Khulwo khuba Owene’ngo wa Weere si wuli mu khulomaloma wusa naye mu maani. ²¹ Siina simukhira okhudaha? Mudakha niche yimuli ne’ndawukhi oba mu khudakha nende omwoyo muloonga? 1