¹ Baana befwe, sinanyala okhubalomalomera nga obo’mwoyo naye nga abe’syalo__nga abaana baddoto mu Kurisito. ² Nabawa amabeere, okhulekha ebyokhulya bigumu, khuba mwali mutoola okhubirya. Masima, musiiri ata no’khwola. ³ Musiiri wusa abe’syalo. Khulwokhuba nisiba mbo asiriwo omutoolyo no’khunyekana akati wenywe, si musiiri abe’syalo? Simuli khwebisya nga abatu wusa? ⁴ Khuba omutu nawoola ati, “Esse noonda Paulo,” no’wundi awoola ati, Esse noonda Apollo,” simuba nimuli batu wutu? ⁵ Ne wunaanu, Apollo nje nanu, ne Paulo nje nanu? Bano boosi bakhosi wukhosi, bamwabitiramo mwamala mwafukirira__ ngo’mwami lu kabatekekhera wuli otula no’mulimo kwaye. ⁶ Esse nataaka olumwo, Apollo kaluchukhirira amaachi, ne Weere kalukhola lwakhula. ⁷ Manu oyo owataka oba oyo owachukhirira si situ syoosi, naye Weere yeŋene, okhola ebitu byakhula. ⁸ Omutu ottaka nende oyo ochukhirira, baba nesigendererwa sirala, khandi wuli otula aliweresewa omukawo okhwema khu mulimo ku kakhola. ⁹ Khuba khuli bakhosi abakholera alala nende Weere; enywe muli ndalo ya Weere, enyumba ya Weere. ¹⁰ Olwe’ssisa sya Weere si kamba, natawo omusingi mugumu nga omwombakhi mulyepulyepu, khandi omutu wundi ali okhukwombakhirakho. Ne nawuli mutu ali no’khuba omwegenderefu engeri yi kombakhirakho. ¹¹ Khuba awuma owundi onyala okhutawo omusingi okhutusakho kula okwatewawo, nje Yesu Kurisito. ¹² Niwabawo omutu owombakha khukuno musingi nga akhosesa effessa, ebichuma, amakina kebeeyi, embawo, owunyasi, amakada, ¹³ omulimo kwaye kwicha okhweyekesa sina sikuli, khu lwokhuba Oludaalo lulikuleeta mu wulafu. Sinakisuliwe no’muliro, no’muliro kulipiima owulayi wo’mulimo kwa wuli mutu. ¹⁴ Nisiba mbo bikombakhire biwona, alifuna omusaara kwaye. ¹⁵ Ne nibiya byawawo, kecha okhufirwa omusaara kwaye; yee omwene kecha okhuwona, ne ngo’omutu lu kefubatula owoki wo’muliro. ¹⁶ Si musimanyire muuti enywe mwabeene muli nyumba ya Weere ni khandi muuti Omwoyo wa Weere abamenyamo? ¹⁷ Omutu yeesi nikononanga enyumba ya Weere, Weere ali mwonona; khuba enyumba ya Weere njolerefu, ninywe enyumba eyo. ¹⁸ Mutebachanga mwabene. Nisiba mbo mulala khwinywe abaasa ati mukesi khu luse luno, akhoyire kekhole okhuba “Omusiru” khwanyale okhuba omukesi. ¹⁹ Khuba amakesi ake’syalo sinno wusiru mu moni cha Weere. Nga lu syawandikiwa siiti: “Adiira abakesi mu wukesikesi wawe.” ²⁰ Ni khandi, “Omwami asimanyire ati ebibaso byo’mutu mukesikesi wusirusiru werere. ²¹ Manu sakira, awumewo okhwepakha khulwa’batu! Ebitu byosi byoosi byenywe, ²² akakhaba Paulo oba Apollo oba Kefwa, oba esyalo oba owulamu oba okhufwa oba ebya wunanu oba obye’ndaalo chiicha__ byoosi byenywe, ²³ nanywe muli ba Kurisito, naye Kurisito wa Weere.