¹ Wunanu, baana befwe, ndakha okhubakhewulisa khu njiri yinabawuulira, yimwafuna khandi yimwemirekho. ² Okhwema khu njiri yino mwawonesewa, nimuba mbo muyedirakho na’maani khu mboosi yinabawuulirira. Atali esyo, okhufukirira khwenywe khuba khwa wusa. ³ Khuba binamala nafuna, nabibosera nga nje’bikhulutu binasokherakho: siri mbo Kurisito kafwa olwebibi byefwe okhwema khu byawandikiwa, ⁴ Siiti kasikhiwa, khandi kasyukhisiwa khu ludaalo lwo’khudatu okhwema khubyawandikiwa, ⁵ khandi kawonekhera Petero nende ekhumi nababiri. ⁶ Namalire atyo, kawonekhera abafukirira abakhira emya chitanu mu bikha nasirala, abakhira owungi khwabo basiriwo balamu, nende abandi bamala okhukona. ⁷ Awene awo kawonekhera Yakobo, olunyuma kawonekhera abatume boosi, ⁸ khandi mu mamalirikha kabyoosi kambonekhera esse sessi, otewulwa nga abasyange lubewulwa. ⁹ Khulwokhuba nise okhiramo okhuba no’luyaali lwa assi, nsikhoyera no’khulangiwa omutume, khuba nasandiya ekanisa ya Weere. ¹⁰ Ne khulwe sisa sya Weere ndi sindi, ne sisa syaye yindi si syali sya wusa. Khaba, ese nakhola lukali okhubakhiraho boosi__ ate nga sise, ne sisa sya Weere esyali ni nange. ¹¹ Nisiba, olwo, nali nise oba bo, bino nje bikhuwuulira, nende bino nje bi mwafukiriramo. Okhusyukhira Khwa’bafu ¹² Ne nisiba mbo siwuulirwa siiti Kurisito kasyukhisiwa mu bafu, sinyalikha siitye abandi khwinywe okhuwoola muuti awumawo okhusyukhira khwa bafu? ¹³ Ni aba ni awumawo okhusyukhira khwa bafu, awo nende Kurisito yesi syaba kasyukhisiwa. ¹⁴ Ne nisiba mbo Kurisito sikasyukhisiwa, okhuwuulira khwefwe khuba khuwumamo amakhulutu ata ne’nfukirira yenywe. ¹⁵ Esikhirakho awo, khuba efwe khwakaniwa okhuba abajjulisi bo’wubacha eyiri Weere, khuba khuweye owujjulirwa khu Weere khuuti kasyukhisa Kurisito okhutula mu bafu. Ne sikamusyukhisa nisiba mbo amasima kene nti abafu sibasyukhisiwa. ¹⁶ Khuba nisinyala okhuba nti abafu sibasyukhisiwa, ata Kurisito yesi syaba nikasyukhisiwa. ¹⁷ Ne nisiba mbo Kurisito sikasyukhisiwa, enfukirira yenywe yiba yiwuma namakhulutu; muba musiiri mu bibi byenywe. ¹⁸ Ata nende abo bosi abakona mu Kurisito baba bakota. ¹⁹ Nisiba syoηηene mbo khulwowulamu wuno khuba khuli ne’suubi mu Kurisito, khukhoyire khusasirwe okhukhirakho abatu bandi boosi. ²⁰ Naye Kurisito mumasima kasyukhisiwa mu bafu, ebyamo bisokha ebyaabo abakona. ²¹ Khuba okhutula khu khufwa njo’mwatula omusaacha, okhusyukhira khwa bafu khwosi khwichira mu musaacha. ²² Khubanga boosi mu Adamu bafwa, sakira mu Kurisito boosi balikholewa baaba abalamu. ²³ Ne wuli mulala mu bikha byaye: Kurisito, esyamo esisokha; khandi, nalikowoola, eyiri abo abaye. ²⁴ Olwo enjakamo yiryola, naliba nawayo owe’nengo wa Weere eyiri Bbaabba naliba nasikhirisise boosi wuli wunyala wuli wutuki nende nawuli maani. ²⁵ Khuba alifuka okhwosa lwaliba nateye abasiku baye assi wa makulu kaye. ²⁶ Omusiku okhenerekhayo okhusikhirisiwa nje okhufwa. ²⁷ Khuba yee “Kata wuli situla assi wa makulu kaye.” Wunanu ni siwoolewa siiti, “wuli situ” syakhateewa assi waye, siba syowaakhaafu siiti sino sisiba siwambaniyamo Weere mweene, owatta wuli situla assi wa Kurisito. ²⁸ Naba nakholire sino, olwo omwana mweene aliba omutwe khu yee owatta wuli situla assi waye, khusibe nti Weere anyale okuba byoosi mu byoosi. ²⁹ Wunanu nisiba mbo awuma okhusyukhisiwa, abo balikhola si ababatisiwa olwa baffu? Nisiba nti abafu si basyukhisiwa ata nawutono, lwasi abaatu babatisiwa khu lwawe? ³⁰ Nende nga eyiri effwe, lwasi khweeta mu khabenje abeene wuli ssawa? ³¹ Nfwa wuli ludaalo__ Esse nekesa mbo, banaa befwe__ nga lusiri mu masima nga lunekhoyera mwinywe mu Kurisito Yesu Omwami wefwe. ³² Nisiri mbo nalwana nensolo cho’munyasi mu Efweso khulwe bitakhoya olwowutu, sina sinfuniremo? Nisiba mbo abaffu sibasyukhisiwa, “Mulekhe khulye khandi khunywe, Khuba muchuli khuli abo’khufwa.” ³³ Mutakosewanga: “Bokenda nabo ababi banyaasa ensambo ndayi.” ³⁴ Kowolamo amakesi nga lukhoyire, manu okhaye okhwonona; khuba yiriyo abo abandi abatamanyire Weere__ Mboola sino olwokhubaswasa. Okhusyukhira khwo’mubiri ³⁵ Naye omutu anyala kateeba ati, “Abafu basyukhisiwa baatye? Omubiri kubasyukhisiwa nakwo kufana kuutye?” ³⁶ Nga wusiru! Syo’wanya sisikowolamo owulamu okhutusakho nga sifwiiye. ³⁷ Nowanya, syo’taaka omubiri okuliba, naye olumwo wusa, fwana olwe’ηηano, oba olwe situ sindi. ³⁸ Ne Weere asiwa omubiri nga lwaba nakhengirewo, ne nawuli lumwo aluwa omubiri kwalwo. ³⁹ Omubiri kwoosi sikufanana: abatu bali ne’sikha syenyama, ebisolo biri nesikha sindi, amayoni esindi neηηeni esindi. ⁴⁰ Yiriyo nemibiri cho mwikulu khandi chabawo emibiri chomusyalo; no’luyaali lwe’mibiri cho mwikulu luli siikha sirala, lwe’mibiri cho’mu syalo lundi. ⁴¹ Omubasu kuli nesikha syo luyaali, no’mwesi no’lundi neηηiniηηini olundi; ne’ηηiniηηini yikawukhana oluyaali neηηiniηηini yindi. ⁴² Nolwesyo nje siriba nende okhusyukhira khwa bafu. Omubiri kuwanyiwa kufwa, khandi kwasyukhisiwa mu wutafwa; ⁴³ Kuwanyiwa mukhulekeresewa, kusyukhisiwa mu luyaali; kuwanyiwa muwunafunafu, kwasyukhisiwa mu maani; ⁴⁴ kuwanyiwa omubiri mulonge kwasyukhisiwa omubiri kwo’mwoyo. Nisiba mbo aliwo omubiri mulonge, ni aba aliwo omubiri kwo’mwoyo kwosi. ⁴⁵ Sakira syawandikiwa siiti: “Omutu wasokha Adamu kecha kekhola esitu siramu” Adamu okhenerekha kafuukha mwoyo okaba owulamu. ⁴⁶ Esyo’mwoyo sinje esyasokha, esya longewa nje esyasokha, esyo’mwoyo syalondakho. ⁴⁷ Omutu wamberi kali atula muloba lyo’khusyalo, omutu wo’khubiri katula mwikulu. ⁴⁸ Nga lu syali no’mutu wokhusyalo, nje lubali abo abokhusyalo; nende nje siri no mutu wo’mwikulu, nje siri nende bosi abo’mwikulu. ⁴⁹ Nende wusa nga lu khwiwulwa na’makuumba mu nfaani yo’mutu wo’khu syalo, nje lu khuliwukula enfaani yo’mutu wo’mwikulu. ⁵⁰ Nangirira yimuli, baana befwe, nti omubiri na’mabanga sikanyala kasikhira owene’ngo wa Weere, oba okhwakana ebiwaawo oba ebiwola byasikhira ebitawola. ⁵¹ Mutekerese, mbawolera ebyakisiwa: Fesi feesi sikhulikona, ne feesi khulikalukhanisiwa__ ⁵² mu khu myesukha, mukhutemya khwemoni, khukhulira khwe’turumbete yisembayo. Khuba eturumbete yiririra, abafu balisyukhisiwa owutawawo, manu khucha okhukalukhanisiwa. ⁵³ Khuba owuwola wutekwa wambasiwa owutawola, nende owufwa no’wutafwa. ⁵⁴ Ebifwa ni byakhamala okhwambasiwa owutafwa,khandi okhufwa khwambasiwa owutafwa, esyawandikiwa syolerere mu wutufu wasyo siiti: “Okhufwa khwamiriwa mu khuyiingira.” ⁵⁵ “Ewe, Oo okhufwa okhuyingira khwawo khuli yeena? Eeh, okhufwa, entununu yawo yiri yeena?” ⁵⁶ Entununu yo’khufwa nje esibi, namaani kesibi nje elako. ⁵⁷ Ne okhwebasa khuchire Weere! Atuwa okhuyiingira nga khubisirya mu Mwami wefwe Yesu Kurisito. ⁵⁸ Nolwesyo, baana befwe abadakhwa, mwomiire. Awumewo esibadenganiya. Mweweeyo mu wichufu khu mulimo kwa Weere, khulwo khuba mu manyire muuti esinani syenywe mu mwami si sya wusa.