¹ Londa engira yo’khudakha khandi olubirire niwekomba ebiyanwa byo’myoyo, okhukhiririsa ebyo’wunabbi. ² Khuba oyo yeesi olomaloma mu lulimi syaba nalomalomera abatu ne abalomalomera Weere. Mukhukhakhasa, aba awumawo omutegeera; byaba natumbula bimanyikkhana no’mwoyo kwaye kwoηηene. ³ Ne wuli olakula alomaloma eyiri abatu olwo’khubawa amaani nabomiisa, nabakumya no’khubakowosamo emyoyo. ⁴ Oyo yeesi olomaloma mu lulimi aba keyikusa omwene, ne oyo olakula aba kekusa ekanisa. ⁵ Nakhadakhire wuli otula khwinywe olomalomere mu nimi, ne syakhabeye sirayi mwalakula. Oyo olakula ali amukulu woyo olomaloma mu nimi, okhutusakho nga akalukhaniya, kho ekanisa yinyale okhwombakhiwa. ⁶ Wunanu, basyange, nimba ni nicha yimuli ninomalomera mu nimi, syakhaba sirayi sina yimuli, okhutusakho nga mbaletera ebyo’khuwikhulirwa oba amakesi oba okhulakula, oba emboosi okhubekesa esyo’khukhola? ⁷ Ata abyakhaba mu bitu bitali no’wulamu ebireeta amakono, nga akhalere oba esiyiriri, ne ni bitaleeta amakono ko’khwawulamo, omutu amanya atye ekono liba niryemba okhutusakho nga’bawo esikira wakawukhaniya mu makono ako? ⁸ Khandi, nisiba mbo eturumbete niritatusa ekono lyatukha mu khulanga, nanu oba nanetekekhe okhucha mu bitta? ⁹ Sakira siri yoli. Okhumalakho nga mutumbula emboosi chitegerekhekha, omutu kakhamanya atye bimuba muwoye? Muba wusa nga balomalomera embewo. ¹⁰ Atali okhukanakana aliwo enimi nyingi mu syalo, ni awumawo olulimi lutalimo amakhulutu. ¹¹ Nisiba mbo simbulira olulimi lwoyo olomaloma mba ndi muteende eyiri omutu oyo, yesi aba muteende yindi, ¹² nje esiri siityo yi muli. Nga lu mulubirira okhufuna ebiyanwa byo’mwoyo, mukesekho okhukhiririsa ebiyanwa byo’mbakha ekanisa. ¹³ No’lwembosi eyo wuli yeesi alomaloma mu lulimi akhoyire kekalikhire anyale okhukalukhaniya byaba nawooye. ¹⁴ Khulwokhuba nimba ni nekalikhira mu lulimi, omwoyo kwange kuba kwekalikhira, ne ebibaso byange biba wusa. ¹⁵ Sakira nkhole ntye? Nicha okhwekalikhira no’mwoyo kwange, ne lwosi nja okhwekalikhira mubibaso byange; nicha okhwemba no’mwoyo kwange, no’khwemba khwosi nebibaso byange, ¹⁶ nawo noba nofumya Weere no’mwoyo kwawo, omutu keyakana atye mwabo abatategeera kawoola ati, “Amina” khukhwebasa khwawo, khuba oyo syamanyire syoba noli okhuwoola? ¹⁷ Onyala okhuba noli okhwebasa wulayi, ne ola mutu simwikufu. ¹⁸ Nebasa Weere khuba nomaloma mu nimi okhubakhira mweesi. ¹⁹ Naye mu kanisa nakhakhoyire nomalome emboosi chitanu echiwulirikhana echa’makesi echisomesa abandi okhukhira emboosi omutwalo mu nimi. ²⁰ Baana befwe, mulekhere awo okhubasanga nga baana bayere. Ebiddira khu sibi mube baana badoto, no’khubaasa khwenywe mube bakhulutu. ²¹ Mu lako syawandikiwa siiti: “Okhubitira mu nimi cha’batu batamanyikhanire nende eminwa cha bateende nja okhulomaloma eyiri abatu bano, nende siri siityo sibecha nkhuntekeresa,” awoola omwami. ²² Enimi, olwo, nicho okhawonero, si eyiri abafukirira, ne olwa’batafukirira; owunabbi, wo wabafukirira si wa batafukirira. ²³ Nisiba mbo ekanisa yoosi yicha alala ne nawuli mutu alomaloma mu nimi, nabatu bandi abatabamanyire oba obatafukirira ba bengiramo, sibanawoole baati mukwiye eralu? ²⁴ Ne nisiba mbo abatafukirira oba omutu otategeera kecha kengira bano boosi nibalakula, kecha okhufukirisiwa ati mwononi khandi alikhengerwa omusango nende boosi. ²⁵ Khandi ebyama byo’mwoyo kwaye birikisulwa. Sakira alikwa assi kekalikhira Weere, nawuka ati, “Weere masima ali mwinywe!” Okhusaba Okhutekekhirwe Wulayi. ²⁶ Wunanu sina syeene sikhunawoole baana befwe? Nimuba ni mwichire alala, wuli mulala khwinywe ali nolwembo, oba embosi yokhukeraka, o’khuwikhulirwa, enimi oba okhukalukhaniya ni abawo amakhulutu ke’mboosi, bino byoosi bikhoyerwa okhwekhola khulwokhwomisa ekanisa. ²⁷ Ni abawo olomaloma mu lulimi, babiri__ oba okhutakhiririsa badatu__ balomelome mulala sya mulala, ne omutu yeesi atekwa okhukalukhaniya. ²⁸ Ni aba ni awuma omutu yeesi onyala kakalukhaniya, omulomalomi akhoyire awulere mu kanisa alomelome yenηηene nende Weere. ²⁹ Ba nabbi babiri oba badatu bakhoyire okhulomaloma, ne abandi bakhoyire betakerese obilomwalomwa nowegenderesa. ³⁰ Ne ni abawo okhuwikhulirwa khu mutu yeesi obeye nikekhaye, omulomalomi osokha akhoyire awulere. ³¹ Khuba mwesi munyala mwalakula muwuleeka embaka khu wuli mulala anyale okhukerakiwa no’khwongerwa amaani. ³² Emyoyo cho’khulakula chifukiwa naba lakula. ³³ Khuba Weere si Weere wo’khuduwuula naye we’mirembe. Nga lubiri mu makhuηηaniro koosi akabolerefu, ³⁴ abakhasi bakhoyire bawulerenge mu makanisa. Sibafukirirwa okhulomaloma, ne batekwa okhulongowala nga amalako lu kawoola. ³⁵ Ni badakhanga okhweteeba esitu batebenge bawamwawe engo; khuba syensoni omukhasi okhulomalomanga mu kanisa. ³⁶ Embosi ya Weere yachakira khwinywe? Oba ninywe mweηηene yiyolakho? ³⁷ Nisiba mbo omutu abasa ati munabbi oba ali ne’siwanwa syo’mwoyo, akhoyire afukirire bi mbawandikiye ati silagiro syo’mwami. ³⁸ Namala kalekha bino, yesi omwene alirekhewa. ³⁹ Nolwesyo, baana befwe, mulubirire okhwekomba okhulakula, khandi mutakaniyanga okhulomaloma mu nimi. ⁴⁰ Ne wuli situ sikholewenge mu ngeri ndayi nende entekekha endayi.