¹ Mukama n'a tumula n'o Musa nti ² Tumula n'a baana ba Isiraeri, obakobe nti omusaiza oba omukali bwe yeyamanga obweyamu ku bubwe yenka, obweyamu obw'o muwonge, okwewonga eri Mukama ³ yeyawulanga n'o mwenge n'e kitamiirya; tanywanga ku mwenge omukaatuuki, waire ekitamiirya ekikaatuuki, so tanywanga ku maizi g'e izabbibu, so talyanga izabbibu eibisi waire eikalu. ⁴ Enaku gyonagyona egy'o kwewonga kwe talyanga kintu ekiva ku muzabbibu, waire ensigo waire ebikuta. ⁵ Enaku gyonagyona egy'o bweyamu bwe obw'okwewonga akamwanu ti kabitanga ku mutwe gwe okutuusya enaku lwe gyatuukiriryanga, gye yeewongeramu eri Mukama, yabbanga mutukuvu, yalekanga emivumbo gy'e nziiri egy'o ku mutwe gwe okukula. ⁶ Enaku gyonagyona gye yeewongeiremu eri Mukama, tasembereranga mulambo. ⁷ Teyeefuulanga atali mulongoofu lwa itaaye, waire lwa maye, waire lwa mugande we, waire lwa mwanyokowe, bwe baafanga kubanga okwewonga kwe eri Katonda kuli ku mutwe gwe. ⁸ Enaku gyonagyona egy'o kwewonga kwe aba mutukuvu eri Mukama. ⁹ Era omuntu yenayena bweyafanga amangu einu ng'a muliraine naye n'a yonoona omutwe ogw'o kwewonga kwe; kale yamwanga omutwe gwe ku lunaku olw'o kulongoosebwa kwe ku lunaku olw'o musanvu kweyagumweranga. ¹⁰ N'o ku lunaku olw'o munaana yaleetanga bukaamukuukulu bubiri, oba amayemba amatomato mabiri, eri kabona, ku mulyango gw'e weema ey'o kusisinkanirangamu ¹¹ awo kabona yawangayo akamu okubba ekiweebwayo olw'e kibbiibi, n'a k'o kubiri okubba ekiweebwayo ekyokyebwa, n'a mutangirira, kubanga yayonoonere olw'a bafu, n'a tukulya omutwe gwe ku lunaku olwo. ¹² Era yewonganga eri Mukama enaku egy'o kwewonga kwe, n'a leeta omwana gw'e ntama omulume ogukaali kumala mwaka gumu okubba ekiweebwayo olw'o musango naye enaku egisookere gyabbanga gifiire, kubanga okwewonga kwe kwayonoonekere. ¹³ Era lino niiryo eiteeka ery'o muwonge, enaku egy'o kwewonga kwe bwe gyatuukiriranga yaleetebwanga ku mulyango gw'e weema ey'o kusisinkanirangamu ¹⁴ n'a waayo ekitone kye eri Mukama, omwana gw'e ntama omulume gumu ogukaali kumala mwaka gumu ogubulaku buleme okubba ekiweebwayo ekyokyebwa, n'o mwana gw'e ntama omuluusi gumu ogukaali kumala mwaka gumu ogubulaku buleme okubba ekiweebwayo olw'e kibbiibi, n'e ntama enume imu ebulaku buleme okubba ebiweebwayo olw'e mirembe, ¹⁵ n'e kiibo eky'e migaati egitazimbulukuswa, ebitole eby'o bwita obusa obutabwirwemu amafuta, n'e migaati egy'e mpewere egitazimbulukuswa egisiigiibweku amafuta, n'o bwita bwaku obuweebwayo, n'e byokunywa byaku ebiweebwayo. ¹⁶ Awo kabona yabyanjulanga mu maiso ga Mukama, n'a waayo ky'a waayo olw'e kibbiiki, n'ekyo ky'a waayo ekyokyebwa ¹⁷ n'a waayo entama enume okubba sadaaka ey'e biweebwayo olw'e mirembe eri Mukama, awamu n'e kiibo eky'e migaati egitazimbulukuswa era kabona yawangayo n'o bwita obiweebwayo byaku, n'e byokunywa byaku ebiweebwayo. ¹⁸ Era omuwonge yamweranga omutwe ogw'o kwewonga kwe ku mulyango gw'e weema ey'o kusisinkanirangamu, n'a irira enziiri egyoku mutwe ogw'o kwewonga kwe, n'a giteeka mu musyo oguli wansi we sadaaka ey'e biweebwayo olw'e mirembe. ¹⁹ Awo kabona yatwalanga omukono omufumbe ogw'e ntama enume, n'e kitole kimu ekitazimbulukuswa ng'a kitoola mu kiibo, n'o mugaati ogw'e mpewere gumu ogutazimbulukuswa, n'a biteeka mu ngalo gy'o muwonge, ng'a malire okumwa omutwe ogw'o kwewonga kwe ²⁰ awo kabona yabiwuubawuubanga okubba ekiweebwayo ekiwuubibwawuubibwa mu maiso ga Mukama; ebyo byayawuliirwe kabona, awamu ni kibba ekiwuubibwawuubibwa n'e kisambi ekisitulibwa oluvannyuma omuwonge kaisi n'a sobola okunywa omwenge. ²¹ Eryo niilyo eiteeka ery'o muwonge eyeeyama obweyamu, n'e kitone kye ky'awa Mukama olw'o kwewonga kwe, obutateekaku ebyo by'a sobola okufuna ng'o bweyamu bwe bweyeyamanga bwe bwabbanga, kityo bwe kimugwanira okukola ng'e iteeka ery'o kwewonga kwe bwe liri. ²² Mukama n'a tumula no Musa nti ²³ Tumula n'Alooni n'a bataane be nti mutyo bwe mwasabiranga omukisa abaana ba Isiraeri mwabakobanga nti ²⁴ Mukama akuwe omukisa, akukuume ²⁵ Mukama akwakirye amaiso ge, akukwatirwe ekisa ²⁶ Mukama akuyimusirye amaiso ge, akuwe emirembe. ²⁷ Batyo bwe bateekanga eriina lyange ku baana ba Isiraeri; nzena na bawanga omukisa. Essuula