¹ Mukama n'a koba Musa nti ² Lagira abaana ba Isiraeri, baize mu lusiisira buli mugenge, na buli muziku, na buli atali mulongoofu olw'o mufu ³ abasaiza era n'a bakali mwabatolangamu, mwabafulumyanga ewanza w'o lusiisira; balekenga okwonoona olusiisira lwabwe, lwe ntyamamu wakati. ⁴ Abaana ba Isiraeri ni bakola batyo, ne babafulumya ewanza w'o lusiisira nga Mukama bwe yakobere Musa, abaana ba Isiraeri bwe baakolere batyo. ⁵ Mukama n'a koba Musa nti ⁶ Koba abaana ba Isiraeri nti Omusaiza oba omukali bweyakolanga ekibbiibi kyonakyona abantu kye bakola, okusobya Mukama, omuntu oyo n'abbaaku omusango; ⁷ kale bayatulanga ekibbiibi kye bakolere era yaliyiranga dala byonabyona olw'o musango gwe, n'a teekaku n'e kitundu kyabyo eky'okutaanu, n'a biwa oyo gw'akolereku omusango. ⁸ Naye omuntu oyo bw'aba nga abula mugande we gwe basobola okuliyira olw'o musango, ebyo bye baliwa olw'o musango bye baliyira Mukama byabbanga bya kabona; era n'e ntama enume ey'o kutangirira, gye bamutangiriryanga. ⁹ Na buli kiweebwayo ekisitulibwa ku bintu byonabyona ebitukuvu eby'a baana ba Isiraeri, bye baleetera kabona, kyabbanga kikye. ¹⁰ N'e bintu ebya buli muntu ebitukuzibwa, byabbanga bibye ekintu kyonakyona omuntu yenayena kyeyawanga kabona, kyabbanga kikye. ¹¹ Mukama n'a tumula n'o Musa nti ¹² Tumula n'a baana ba Isiraeri, obakobe nti omukali w'o muntu yenayena bweyakyamanga, n'a musobyaku, ¹³ omusaiza n'a gona naye, ni kigisibwa amaiso ga ibaye, ni kigisibwa, iye n'a yonooneka, ni watabba mujulizi amulumirirya, era nga ti bamusisinkanirirya; ¹⁴ omwoyo ogw'e iyali ni gumwizira, n'a kwatirwa mukali we eiyali, naye ng'a yonoonekere oba omwoyo ogw'e iyali bwe gwamwiziranga, n'a kwatirwa mukali we eiyali, so naye nga tayonoonekere ¹⁵ kale omusaiza yaleetanga mukali we eri kabona, n'a muleetera ekitone kye, ekitundu eky'e ikumi ekya efa eky'o bwita obwa sayiri; tafukangaku mafuta gonagona, so tateekangaku musita; kubanga niikyo kiweebwayo eky'o bwita olw'o buyaka, ekiweebwayo eky'o bwita eky'o kwijukirya, ekijukirya obutali butuukirivu. ¹⁶ Awo kabona yamusemberyanga, n'a muteeka mu maiso ga Mukama ¹⁷ kabona n'a irira amaizi amatukuvu mu kintu eky'e ibbumba; n'o ku nfuufu eri wansi mu weema kabona yatolangaku, n'a giteeka mu maizi ¹⁸ kabona n'a teeka omukali mu maiso ga Mukama n'a biikula ku nziiri egy'o ku mutwe gw'o mukali, n'a mukwatisya mu ngalo ekiweebwayo eky'o bwita eky'o kwijukirya, niikyo kiweebwayo eky'o bwita eky'o buyaka era kabona yakwatanga mu mukono gwe amaizi agakaawa agaleeta ekiraamo ¹⁹ awo kabona yamulayiryanga, n'akoba omukali nti oba nga wabula musaiza eyagonere naiwe, so tokyamanga eri obutali bulongoofu, ng'ofugibwa ibaawo, amaizi gano agakaawa agaleeta ekiraamo ti gakubbeeraku ²⁰ naye oba nga wakyamire, ng'o fugibwa ibaawo, era ng'o yonoonekere, era omusaiza ogondi oba nga yagonere naiwe awabula ibawo ²¹ awo kabona yalayilyanga omukali ekirayiro eky'okulaama, kabona n'akoba omukali nti Mukama akufuule ekiraamo n'e kirayiro mu bantu bo, Mukama bw'a koozimbyanga ekisambi kyo, n'a tumbiirya ekida kyo; ²² n'a maizi gano agaleeta ekikolimo gayaba mu madundu go, ni gatumbiirya ekida kyo, ne gakoozimbya ekisambi kyo; omukali n'atumula nti Amiina, Amiina. ²³ Awo kabona yawandiikanga ebikolimo ebyo mu kitabo, n'a byozaaku n'a maizi agakaawa ²⁴ n’a nywisya omukali amaizi agakaawa agaleeta ekiraamo amaizi agaleeta ekiraamo ni gayingira mu iye ni gakaawa. ²⁵ Awo kabona yatoolanga ekiweebwayo eky'o bwita eky'o buyaka mu mukono gw'o mukali, n'a wuuba ekiweebwayo eky'o bwita mu maiso ga Mukama, n'a kireeta eri ekyoto ²⁶ kabona n'a irira engalo yobwita obuweebwayo, okubba ekijukiryo kyabwo, n'a bwokyerya ku kyoto, oluvanyuma n'a nywisya omukali amaizi ago. ²⁷ Awo bweyamalanga okumunywisya amaizi, kale olwatuukanga, bweyabbanga ayonoonekere, era ng'asoberye ku ibaaye, amaizi agaleeta ekiraamo gayingirangamu iye ni gakaawa, n'e kida kye ni kitumbiira, n'e kisambi kye ni kikoozimba n'o mukali yabbanga kiraamo mu bantu be. ²⁸ Era omukali bweyabbanga tayonoonekere, naye nga mulongoofu; kale taabengaku kigambo, n'o kubba alibba kida. ²⁹ Eryo niilyo eiteeka ery'e iyali, omukali ng'a fugibwa ibaaye bweyakyamanga n'a yonooneka ³⁰ oba omwoyo ogw'e iyali bwe gwairiranga omusaiza, n'a kwatirwa mukali we eiyali; awo yateekanga omukali mu maiso ga Mukama, n'o kabona yamukoleranga eiteeka eryo lyonalyona ³¹ Omusaiza n'a tabbaaku butali butuukirivu, n'o mukali oyo yabbangaku obutali butuukirivu bwe. Ensuula