¹ Era kuno niikwo kuzaala kwa Alooni n'o Musa ku lunaku Mukama lwe yatumuliiremu n'o Musa ku lusozi Sinaayi. ² Era gano niigo maina g'a baana ba Alooni; Nadabu, omuberyeberye, n'o Abiku, Eriyazaali, n'o Isamaali. ³ Ago niigo maina g'a baana ba Alooni, bakabona abaafukiibweku amafuta, be yayawire okuweereryanga mu bwakabona. ⁴ Era Nadabu n'o Abiku ni bafiira mu maiso ga Mukama, bwe bawaireyo omusyo ogutali gugwe mu maiso ga Mukama, mu idungu lya Sinaayi, ni batabba n'a baana awo Eriyazaali n'o Isamaali ni baweerereryanga mu bwakabona mu maiso ga Alooni itawabwe. ⁵ Mukama n'a koba Musa nti ⁶ Semberya ekika kya Leevi, obateeke mu maiso ga Alooni kabona, bamuweereryenga. ⁷ Era bakuumanga ebyo iye bye yalagiirwe, n'ebyo ekibiina kyonakyona bye kyalagiirwe, mu maiso g'e weema ey'o kusisinkanirangamu, okukolanga okuweererya okw'o mu nyumba. ⁸ Era bakuumanga ebintu byonabyona eby'o mu wema ey'o kusisinkanirangamu, n'ebyo abaana ba Isiraeri bye balagiirwe, okukolanga okuweererya okw'o mu nyumba. ⁹ Era waawa Alooni n'a baana be Abaleevi baweeweibwe dala iye ku bw'a baana ba Isiraeri. ¹⁰ Era watekawo Alooni n'a baana be, era bakuumanga obwakabona bwabwe n'o munaigwanga yasemberanga yaitibwanga. ¹¹ Awo Mukama n'a koba Musa nti ¹² Nzena, bona, nze ntoire Abaleevi mu baana ba Isiraeri mu kifo ky'a baberyeberye abaigulanda mu baana ba Isiraeri; n'Abaleevi baabbanga bange ¹³ kubanga ababereberye bonanona bange; ku lunaku lwe naitiiremu ababeryeberye bonabona mu nsi y'e Misiri neetukulirya ababeryeberye bonabona mu Isiraeri, abantu era n'e nsolo baabbanga bange; nze ndi Mukama. ¹⁴ Awo Mukama n'a kobera Musa mu idungu lya Sinaayi nti ¹⁵ bala abaana ba Leevi ng'e nyumba gya baiitawabwe bwe giri, ng'e nda gyabwe bwe giri buli mwana mwisuka eyaakamala omwezi ogumu n'o kusingawo wababala. ¹⁶ Musa n'a babala ng'e kigambo kya Mukama bwe kyabbaire, nga bwe yalagiirwe. ¹⁷ Era bano niibo baana ba Leevi ng'a maina gaabwe bwe gabbaire; Gerusoni n'o Kokasi n'o Merali. ¹⁸ Era gano niigo maina g'a baana ba Gerusoni ng'e nda gyabwe bwe gyabbaire; Libuni n'o Simeeyi. ¹⁹ N'a baana ba Kokasi ng'e nda gyabwe bwe gyabbaire; Amulaamu n'o Izukali, Kebbulooni n'o Wuziyeeri. ²⁰ N'a baana ba Merali ng'e nda gyabwe bwe gyabbaire; Makuli n'o Musi. Egyo nigyo enda gy'Abaleevi ng'e nyumba gya baitawabwe bwe gyabbaire. ²¹ Mu Gerusoni niimwo mwaviire enda y'Abalibuni, n'e nda y'Abasimeeyi egyo niigyo enda gy'Abagerusoni. ²² Abo ababaliibwe ku ibo ng'o muwendo gw'a basaiza bonabona bwe gwabbaire, abaakamala omwezi ogumu n'o kusingawo, abo abaabaliibwe ku ibo babbaire kasanvu mu bitaanu. ²³ Enda gy'Abagerusoni basiisiranga enyuma w'e nyumba ku luuyi olw'e bugwaisana. ²⁴ N'o mukulu w'e nyumba ya baitawabwe ey'Abagerusoni yabbanga Eriyasaafu mutaane wa Laeri. ²⁵ Era abaana ba Gerusoni kye balagiirwe mu weema ey'o kusisinkanirangamu kyabbanga nyumba n'e wema, ekigibiikaku, n'e ijiji ery'o mulyango gw'e weema ey'o kusisinkanirangamu, ²⁶ n'e gitimbibwa egy'o luya, n'e ijiji ery'o mulyango gw'o luya oluli ku nyumba era olwetooloola ekyoto, n'e miguwa gyalwo olw'o kuweererya kwalwo kwonakwona. ²⁷ N'o mu Kokasi mwe mwaviire enda y'Abamulaamu, n'e nda y'Abaizukaali, n'e nda y'Abakebbulooni, n'e nda y'Abawuziyeeri egyo niigyo enda gy'Abakokasi. ²⁸ Ng'o muwendo gw'a basaiza bonabona bwe gwabbaire abaakamala omwezi ogumu n'o kusingawo babbaire kanaana mu lukaaga abaakuumanga awatukuvu we baalagiirwe. ²⁹ Enda gy'a baana ba Kokasi basiisiranga ku luuyi olw'e weema olw'o bukiika obulyo. ³⁰ Era omukulu w'e nyumba ya baitawabwe ey'Abakokasi yabbanga Erizafani mutaane wa Wuziyeeri. ³¹ Era kye balagiirwe kyabbanga sanduuku, n'e meenza, n'e kikondo, n'e byoto, n'e bintu eby'o mu watukuvu bye baweerereesya, n'e ijiji n'o kuweererya kwalyo kwonakwona. ³² N'o Eriyazaali mutaane wa Alooni kabona niiye yabbanga omukulu w'a bakulu b'Abaleevi, ng'a labirira abo abakuuma awatukuvu we balagiirwe. ³³ Mu Merali niimwo mwaviire enda y'Abamakuli, n'e nda y'Abamusi egyo niigyo nda gya Merali. ³⁴ Era abo ababaliibwe ku ibo, ng'o muwendo gw'a basaiza bonabona bwe gwabbaire, abaakamala omwezi ogumu n'o kusiingawo, babbaire kakaaga mu bibiri. ³⁵ Era omukulu w'e nyumba ya baitawabwe ey'e nda gya Merali yabbaire Zuliyeeri mutaane wa Abikayiri abo basiisiranga ku luuyi lw'e nyumba olw'o bukiika obugooda. ³⁶ N'o mulimu ogulagirwa ogw'a baana ba Merali gwabbanga embaawo egy'e nyumba, n'e misituliro gyayo, n'e mpango gyayo, n'e biina byayo, n'e bintu byayo byonabyona, n'o kuweererya kwayo kwonakwona; ³⁷ n'e mpango egy'o luya olwetooloola, n'e biina byagyo, n'e ninga gyagyo, n'e miguwa gyagyo. ³⁸ N'abo abasiisiranga mu maiso g'e nyumba ku luuyi olw'e buvaisana, mu maiso g'e weema ey'o kusisinkanirangamu okwolekera eisana ngalivaayo, baabbanga Musa, n'o Alooni n'a bataane be, nga bakuuma awatukuvu we balagiirwe, olw'o kulagirwa kw'a baana ba Isiraeri; n'o munaigwanga eyasemberanga yaitibwanga. ³⁹ Bonabona abaabaliibwe ku Baleevi, Musa n'a Alooni be baboine olw'e kiragiro kya Mukama ng'e nda gyabwe bwe gyabbaire, abasaiza bonabona abaakamala omwezi ogumu n'o kusingawo, babbaire Emitwaalo ibiri mu nkumi ibiri. ⁴⁰ Mukama n'a koba Musa nti Bala abasaiza ababeryeberye bonabona ku baana ba Isiraeri abaakamala omwezi ogumu n'o kusingawo, otwale omuwendo gw'a maina gaabwe. ⁴¹ Era olintwalira nze Abaleevi nze Mukama mu kifo ky'a baberyeberye bonabona ku baana ba Isiraeri; n'e bisibo by'Abaleevi mu kifo ky'e mberyeberye gyonagyona ku bisibo by'a baana ba Isiraeri. ⁴² Awo Musa n'abala, nga Mukama bwe yamulagiire, ababeryeberye bonabona ku baana ba Isiraeri. ⁴³ N'a basaiza bonabona ababeryeberye, ng'o muwendo gw'a maina bwe gwabbaire, abaakamala omwezi ogumu n'o kusingawo, abo ababaliibwe ku ibo, babbaire emitwalo ibiri mu nkumi ibiri mu bibiri mu nsanvu mu basatu. ⁴⁴ Mukama n'a koba Musa nti ⁴⁵ Twala Abaleevi mu kifo ky'a baberyeberye bonabona ku baana ba Isiraeri n'e bisibo by'Abaleevi mu kifo ky'e bisibo byabwe era Abaleevi babbanga bange; nze Mukama. ⁴⁶ N'o lw'o kununula ababeryeberye b'a baana ba Isiraeri bibiri mu nsanvu na basatu, abafiikirewo ku muwendo gw'Abaleevi, ⁴⁷ wasoloozyanga sekeri itaanu buli muntu ng'e mitwe bwe giri; wagitwalanga nga sekeri ey'o mu watukuvu bw'eri sekeri gy'e igera abiri ⁴⁸ era wawanga efeeza enunula omuwendo gwabwe ogufiikawo Alooni na bataane be. ⁴⁹ Musa n'a basoloozyaku efeeza enunula abo abafiikirewo ku abo abaanunuliibwe n'Abaleevi ⁵⁰ ababeryeberye b'a baana ba Isiraeri be yasoloozeryeku efeeza; sekeri lukumi mu bisatu mu nkaaga na isatu, nga sekeri ey'omu watukuvu bw'eri ⁵¹ awo Musa n'awa Alooni na bataane be efeeza enunula, ng'e kigambo kya Mukama bwe kyabbaire nga Mukama bwe yalagiire Musa.