¹ Awo Mukama n'a koba Musa na Alooni nti ² Abaana ba Isiraeri basiisiranga buli muntu okuliraana n'e bbendera ye, awali obubonero bw'e nyumba gya baitawabwe basiisiranga okwolekera eweema ey'o kusisinkanirangamu enjuyi gyonagyona. ³ Era abo abasiisira ku luuyi olw'e buvaisana okulingirira eisana gyeriva babbanga b'e bbendera yo lusiisira lwa Yuda, ng'eigye lyabwe bwe liri era Nakusoni mutaane wa Aminadaabu iye yabbanga omukulu w'a baana ba Yuda. ⁴ Era eigye lye n'abo ababaliibwe ku ibo babbaire emitwaalo musanvu mu lukaaga. ⁵ N'e kika kya Isakaali niibo basiisiranga okumuliraana era Nesaneeri mutaane wa Zuwaali niye yabbanga omukulu w'a baana ba Isakaali ⁶ n'e igye lye n'abo ababaliibwe ku ilyo babbaire emitwaalo itaanu mu nkumi ina mu bina ⁷ n'e kika kya Zebbulooni era Eriyaabu mutaane wa Keroni niiye yabbanga omukulu w'a baana ba Zebbulooni ⁸ n'e igye lye n'abo ababaliibwe ku ilyo babbaire emitwaalo itaanu mu kasanvu mu bina. ⁹ Bonabona abaabaliibwe ku lusiisira lwa Yuda babbaire kasiriivu mu mitwalo munaana mu lukaaga mu bina, ng'e igye lyabwe bwe lyabbaire. Niibo basookanga okusitula. ¹⁰ Ku luuyi olw'o bukiika obulyo niiwo wabbanga ebbendera ey'o lusiisira lwa Lewubeeni ng'e igye lyabwe bwe liri era Erizuuli mutaane wa Sedewuli niiye yabbanga omukulu w'a baana ba Lewubeeni. ¹¹ N'e igye lye n'abo ababaliibwe ku ilyo babbaire emitwaalo ina mu kakaaga mu bitaano. ¹² N'e kika kya Simyoni niibo basiisiranga okumuliraana era Serumyeri mutaane wa Zulisadaayi niiye yabbanga omukulu w'a baana ba Simyoni ¹³ n'e igye lye n'abo ababaliibwe ku ibo babbaire emitwaalo itaanu mu kenda mu bisatu ¹⁴ n'e kika kya Gaadi era Eriyasaafu mutaane wa Leweri niiye yabbanga omukulu w'a baana ba Gaadi ¹⁵ n'e igye lye n'abo ababaliibwe ku ibo babbaire emitwaalo ina mu nkumi itaanu mu lukaaga mu ataanu. ¹⁶ Bonabona abaabaliibwe ku lusiisira lwa Lewubeeni babbaire kasiriivu mu mitwaalo itaano mu lukumi mu bina mu ataanu, ng'e igye lyabwe bwe lyabbaire. Niibo baiririranga badi okusitula. ¹⁷ Eweema ey'o kusisinkanirangamu kaisi n'e tambulanga, wamu n'o lusiisira lw'Abaleevi wakati mu nsiisira; nga bwe basiisiire, bwe basitulanga batyo, buli muntu mu kifo kye, awali ebbendera gyabwe. ¹⁸ Ku luuyi olw'e bugwaisana niiwo wabbanga ebbendera ey'o lusiisira lwa Efulayimu ng'e igye lyabwe bwe liri era Erisaama mutaane wa Amaiikudi niiye abbanga omukulu w'a baana ba Efulayimu. ¹⁹ N'e igye lye n'abo ababaliibwe ku ibo, babbaire emitwaalo ina mu bitaano. ²⁰ N'e kika kya Manase niikyo kyamwiririranga era Gamalyeri mutaane wa Pedazuuli niiye yabbanga omukulu w'a baana ba Manase; ²¹ n'e igye lye n'abo ababaliibwe ku ibo babbaire emitwaalo isatu mu nkumi ibiri mu bibiri ²² n'e kika kya Benyamini era Abidaani mutaane wa Gidiyooni niiye yabbanga omukulu w'a baana ba Benyamini ²³ n'e igye lye n'abo ababaliibwe ku ibo babbaire emitwaalo isatu mu nkumi itaanu mu bina. ²⁴ Bonabona ababaliibwe ku lusiisira lwa Efulayimu babbaire kasiriivu mu kanaana mu kikumi, ng'e igye lyabwe bwe lyabbaire. Be baiririranga badi ate okusitula. ²⁵ Ku luuyi olw'o bukiika obugooda we wabbanga ebendera ey'o lusiisira lwa Daani ng'e igye lyabwe bwe liri era Akiyezeeri mutaane wa Amisadaayi niiye yabbanga omukulu w'a baana ba Daani. ²⁶ N'e igye lye n'abo ababaliibwe ku ibo babbaire emitwaalo mukaaga mu e nkumi ibiri mu lusanvu. ²⁷ N'e kika kya Aseri niibo basiisiranga okumuliraana era Pagiyeeri mutaane wa Okulaani niiye yabbanga omukulu w'a baana ba Aseri ²⁸ n'e igye lye n'abo ababaliibwe ku ibo babbaire emitwaalo ina mu lukumi mu bitaanu ²⁹ n'e kika kya Nafutaali era Akira mutaane wa Enani niiye yabbanga omukulu w'a baana ba Nafutaali ³⁰ n'e igye lye n'abo ababaliibwe ku ibo babbaire Emitwaalo itaano mu nkumi isatu mu bina. ³¹ Bonabona ababaliibwe ku lusiisira lwa Daani babbaire kasiriivu mu mitwaalo itaano mu kasanvu mu lukaaga. Niibo basembanga ng'e bbendera bwe giri. ³² Abo niibo babaliibwe ku baana ba Isiraeri ng'e nyumba gya baitawabwe bwe gyabbaire bonabona ababaliibwe ku nsiisira ng'e igye lyabwe bwe lyabbaire babbaire obusiriivu mukaaga mu nkumi isatu mu bitaanu mu ataano. ³³ Naye Abaleevi ti babaliibwe mu baana ba Isiraeri; nga Mukama bwe yalagiire Musa. ³⁴ Abaana ba Isiraeri bwe bakolere batyo; nga byonabyona bwe byabbaire Mukama bye yalagiire Musa, bwe basiisiranga batyo awali ebendera gyabwe, era batyo bwe basitulanga, buli muntu ng'e nda gyabwe bwe gyabbaire, ng'e nyumba gya ba itawabwe bwe gyabbaire. Ensuula