¹ Balamu n'a koba Balaki nti nzimbira wano ebyoto musanvu, ontegekere wano ente musanvu n'e ntama enume musanvu. ² Balaki n'a kola nga Balamu bwe yatumwire; Balaki n'o Balamu ni baweerayo ku buli kyoto ente n'e ntama enume. ³ Balamu n'a koba Balaki nti Yemerera awali ekyokyebwa kw'o waayo nanze nayaba; Koizi Mukama yaiza okusisinkana nanze era buli kyeyandaga nakikukobera. N'a yaba ku lusozi awanza. ⁴ Katonda n'a sisinkana no Balamu n’a mukoba nti ntegekere ebyoto omusanvu, era mpeereireyo ente n'e ntama enume ku buli kyoto. ⁵ Mukama n'a teeka ekigambo mu munwa gwa Balamu, n'a koba nti Irayo eri Balaki, era otyo bwewatumula. ⁶ N'a irayo eri iye, era yabbaire ayemereire awali ekyokyebwa kye yawaireyo, iye n'a bakulu bonabona aba Mowaabu. ⁷ N'a gera olugero lwe, n'a tumula nti Balaki yantoire mu Alamu, Kabaka wa Mowaabu yantoire mu nsozi egy'Ebuvaisana Iza olaame Yakobo, Era iza osoomozye Isiraeri. ⁸ Nalaama ntya oyo Katonda gw'a talaamanga? Nasoomozya ntya oyo Katonda gw'a tasoomozyanga? ⁹ Kubanga nyema ku ntiiko y'a mabbaale okumubona, N'o ku nsozi okumulengera Bona, niibo bantu ababba bonka, So tebalibalibwa mu mawanga. ¹⁰ Yani asobola okubala enfuufu ya Yakobo, Oba okubala ekitundu eky'o kuna ekya Isiraeri? Nfe ng'o mutuukirivu bw'afa, N’e nkomerero yange ey'o luvanyuma ebbe ng'e yiye! ¹¹ Balaki n'a koba Balamu nti onkolere ki? Nkutwaire okunaamira abalabe bange, era, bona, obasabiriire dala mukisa. ¹² N'a iramu n'a koba nti ti kiŋwanira kwekuuma kutumula ekyo Mukama kyateeka mu munwa gwange? ¹³ Balaki n'a mukoba nti Iza nanze, nkwegayiriire, mu kifo ekindi, w’osobola okwema okubalengera; wabona ekitundu kyabwe eky’e nkomerero kyonka, n'o tobona bonabona n’o yema awo okubalaama. ¹⁴ N'a mutwala mu itale lya Zofimu, ku ntikko ya Pisuga, n'a zimba ebyoto musanvu, n’a weerayo ente n'e ntama enune ku buli Kyoto. ¹⁵ N'a koba Balaki nti Yemerera wano awali ekyokyebwa ky'o waayo, nze nga bwe nasisinkaine n'o Mukama eyo. ¹⁶ Mukama n'a sisinkana n'o Balamu, n'a teeka ekigambo mu munwa gwe, n'a koba nti Irayo eri Balaki, era bwewatumula otyo. ¹⁷ N'a iza gy'ali, era, bona, yabbaire ayemereire awali ekyokyebwa kye yawaayo, n'a bakulu ba Mowaabu wamu naye. Balaki n'a mukoba nti Mukama atumwire ki? ¹⁸ N'a tumula olugero lwe n'a tumula nti golokoka, Balaki, owulire; ntegera ekitu, iwe mutaane wa Zipoli ¹⁹ Katonda ti muntu, okubbeya; So ti mwana w'o muntu, okwejusya Atumwire, n'o kukola talikikola? Oba akobere, n'o kutuukya talikituukya? ²⁰ Bona, ndagiirwe okuwa omukisa Yeena awaire omukisa, nzena ti nsobola kugwijulula. ²¹ Taboine butali butuukirivu ku Yakobo, So taboine bubambaavu ku Isiraeri Mukama Katonda we ali naye, n'o kutumulira waigulu okwa kabaka kuli mu ibo. ²² Katonda abatoola mu Misiri; alina amaani ng'a g'e mbogo. ²³ Mazima wabula irogo awali Yakobo, So wabula bulaguli awali Isiraeri Atyanu kyatumulwanga ku Yakobo n'o ku Isiraeri, nti Katonda ng'a kolere! ²⁴ Bona, abantu bagolokoka ng'e mpologoma enkali, Era beeyimusya ng'e mpologoma enume Taagalamire okutuusya lweyalya ku muyiigo, N'a nywa omusaayi gw'abo abaitiibwe. ²⁵ Awo Balaki n'a koba Balamu nti tobalaamanga n'a katono, so n'o mukisa tobasabiranga mukisa n'a katono. ²⁶ Naye Balamu n'a iramu n'a koba Balaki nti ti nakukobeire nti byonabyona Mukama by'a tumula, ebyo kiŋwanira okubikola? ²⁷ Balaki n'a koba Balamu nti Iza, nakutwala awandi; Koizi Katonda yasiima iwe okwema eyo okubanaamira. ²⁸ Awo Balaki n'a niinisya Balamu ku ntiiko ya Peoli, kw'o yema okulengera eidungu. ²⁹ Balamu n'a koba Balaki nti nzimbira wano ebyoto musanvu, ontegekere wano ente musanvu n'e ntama enume musanvu. ³⁰ Balaki n'a kola nga Balamu bwe yatumwire n’a weerayo ku buli kyoto ente n'e ntama enume. Ensuula