¹ Abaana ba Isiraeri ne batambula ni basiisira mu nsenyu gya Mowaabu emitala wa Yoludaani e Yeriko. ² Awo Balaki Mutaane wa Zipoli n'a bona byonabyona Isiraeri bye yabbaire akolere Abamoli. ³ Mowaabu n'atya inu abantu, kubanga bangi Mowaabu n'a keŋentererwa olw'a baana ba Isiraeri. ⁴ Mowaabu n'a koba abakaire ba Midiyaani nti atyanu ekibiina kino kyaba kukombera dala byonabyona ebitwetooloire, ng'e nte bw'e komba omwido ogw'o ku itale. Era Balaki mutaane wa Zipoli niiye yabbaire kabaka wa Mowaabu mu biseera ebyo. ⁵ N’atuma ababaka eri Balamu Mutaane wa Byoli, e Pesoli, ekiri ku lubalama lw'O mwiga, mu nsi y'a baana b'a bantu be, okumweta ng'a tumula nti Bona, waliwo abantu abaviire mu Misiri Bona, basaanikiire ku maiso g'e nsi, era batyaime okunjolekera ⁶ kale iza, nkwegayiriire, onaamire abantu bano kubanga banyingire Amaani Koizi ndiwangula, tubaite, mbabbinge mu nsi kubanga maite nga gw'o sabira iwe omukisa aweebwa omukisa, no gw'olaama alaamibwa. ⁷ Abakaire ba Mowaabu n'a bakaire b'e Midiyaani ne baaba nga balina omukemba mu ngalo gyabwe; ni baiza eri Balamu, ni bamukobera ebigambo bya Balaki. ⁸ N'a bakoba nti mugone wano obwire buno, nzena nabuulya ebigambo nga Mukama bweyankoba abakulu ba Mowaabu ni babba ewa Balamu. ⁹ Katonda n'a iza eri Balamu n'a koba nti bantu ki bano abali naiwe? ¹⁰ Balamu n'a koba Katonda nti Balaki Mutaane wa Zipoli kabaka wa Mowaabu, ya ntumiire ng'a tumula nti ¹¹ Bona, abantu abaava mu Misiri basaanikiire ku maiso g'e nsi Iza, obaanamire; koizi ndisobola okulwana nabo, ni mbagoba. ¹² Katonda n'a koba Balamu nti toyaba nabo; tolaama bantu abo kubanga ba weweibwe omukisa. ¹³ Balamu n'a golokoka amakeeri, n'a koba abakulu ba Balaki nti Mweyabire mu nsi yanyu kubanga Mukama againe okundagira okwaba na imwe. ¹⁴ Abakulu ba Mowaabu ni bagolokoka, ne bairayo eri Balaki, ni bakoba nti Balamu againe okwiza naife. ¹⁵ Balaki ni yeeyongera ate okutuma abakulu, abaasinga abo obungi era ababasinga n'e kitiibwa. ¹⁶ Ni baiza eri Balamu ni bamukoba nti atyo bwatumula Balaki Mutaane wa Zipoli nti Waleke okubbaawo ekintu, nkwegayiriire, ekyakuziyizya okwiza gye ndi ¹⁷ kubanga ndikukulya n'obba n'e kitiibwa kinene inu, na buli ky'o likoba ndikikola kale iza, nkwegayiriire, onaamire abantu bano. ¹⁸ Balamu n’a iramu n’a koba abaidu ba Balaki nti Balaki bw’alimpa enyumba ye ng’e izwire efeeza n'e zaabu, tinsobola kubita ku kigambo kya Mukama Katonda wange, okukendeeryaku oba okusukirirya. ¹⁹ Kale, mbeegayiriire mweena mugone wano obwire buno, kaisi manye Mukama ky'e yeyongera okunkobera. ²⁰ Katonda n’a iza eri Balamu obwire, n'a mukoba nti abantu abo oba nga baizire okukweta, golokoka oyabe nabo; naye ekigambo kyonka kye nkukobera ky'obba okola. ²¹ Balamu n'a golokoka amakeeri n'a teeka amatandiiko ku ndogoyi ye, n'a yaba n'a bakulu ba Mowaabu. ²² Obusungu bwa Katonda ni bubuubuuka kubanga yaabire malayika wa Mukama n'a yemerera mu ngira okumuziyizya. Era yabbaire yeebagaire ku ndogoyi ye, n'a baidu be bombiri babbaire naye. ²³ Endogoyi n'e bona malayika wa Mukama ng'a yemereire mu ngira, ekitala kye nga kisowoirwe nga kiri mu ngalo gye endogoyi n'e kyama okuva mu ngira, n'e yaba ku nsiko Balamu n'akubba endogoyi okugiirya mu ngira. ²⁴ Malayika wa Mukama kaisi n'a yemerera mu ngira ey'o mu kiwonvu eri wakati w'e nsuku gy'e mizabbibu olukomera nga luli ku luuyi, n'o lukomera ku luuyi. ²⁵ Endogoyi n'e bona malayika wa Mukama, ni yeenyigirirya ku lukomera, n'e bbetenta ekigere kya Balamu ku lukomera n'a gikubba ate. ²⁶ Malayika wa Mukama ni yeeyongera okusembera eyo, n'a yemerera mu ngira ey'a kanyigo, Awabula ibbanga lyo kukyukira ku mukono omulyo waire omugooda. ²⁷ Endogoyi n'e bona malayika wa Mukama, n'e galamira wansi wa Balamu obusungu bwa Balamu ni bubuubuuka, n'a kubba endogoyi n'o mwigo gwe. ²⁸ Mukama n'a yasamya omunwa gw'e ndogoyi, n'e koba Balamu nti nkukolere ki iwe okunkubba emirundi gino gyonsatu? ²⁹ Balamu n'akoba endogoyi nti Kubanga onduuliire singa mbaire n'e kitala mu ngalo gyange, watyanu nandikwitire. ³⁰ Endogoyi n'e koba Balamu nti tindi ndogoyi yo, gye weebagalaku obulamu bwo bwonabwona Okutuusya atyanu? nabbaire mbitirye okukukola ntyo? N'a koba nti bbe. ³¹ Awo Mukama kaisi azibula amaiso ga Balamu, n'a bona malayika wa Mukama ng'a yemereire mu ngira, ekitala kye nga kisowoirwe nga kiri mu ngalo gye n'a kutama omutwe gwe, n'a vuunama amaiso ge. ³² Malayika wa Mukama n'a mukoba nti Okubbiire ki endogoyi yo emirundi gino gyonsatu? Bona, nfulumire okukuziyizya, kubanga okutambula kwo kukakanyali mu maiso gange. ³³ Endogoyi n'e mbona n'e kyuka mu maiso gange emirundi gino gyonsatu singa tekyukire mu maiso gange, atyanu tinandirekere kukwita iwe, yoona ni ngiwonya okufa. ³⁴ Balamu n'a koba malayika wa Mukama nti Nyonoonere; kubanga tinamaite ng'o yemereire mu ngira okunziyizya kale atyanu, oba nga kikunyiizya, nairayo ate. ³⁵ Malayika wa Mukama n'akoba Balamu nti yaba n'a bantu abo naye ekigambo kyonka kye nakukobera ky'obba otumule. Awo Balamu n'a yaba n'a bakulu ba Balaki. ³⁶ Awo Balaki bwe yawuliire nga Balamu aizire, n'a fuluma okumusisinkana mu Kibuga kya Mowaabu, ekiri ku nsalo ye Alunoni, oguli ku nkomerero y'e nsalo. ³⁷ Balaki n'a koba Balamu nti ti nakutumiire okukweta ni nkutayirira? ekyakulobeire okwiza gye ndi ki? Ti nsobola dala kukukulya n'obba n'e kitiibwa? ³⁸ Balamu n'a koba Balaki nti bona, ngizire gy'oli atyanu nina obuyinza bwonabwona okutumula ekigambo kyonakyona? ekigambo Katonda kye yateeka mu munwa gwange, ekyo kye natumula. ³⁹ Balamu n’a yaba no Balaki, ni baiza e Kiriasikuzosi. ⁴⁰ Balaki n'a waayo ente n'e ntama, n'a tumilya Balamu n'a bakulu ababbaire naye. ⁴¹ Awo olwatuukire Amakeeri, Balaki n’a twala Balamu, n'a muniinisya ku bifo ebigulumivu ebya Baali, n'ayema eyo okulengera enkomerero y'a bantu. Ensuula